ប្រភពដដែលបានបញ្ជាក់ថាបក្ខពួកយាយព្រឿងបានប្រមូលទិញឈើប្រណីតពី ប្រជាពលរដ្ឋយកមកទុកតាមមាត់ទន្លេជាច្រើនកន្លែង ហើយយកទូកទៅដឹកពីស្រុកសៀមប៉ាង និងស្រុកសេសានមកកាន់ទីរួមខេត្តដើម្បីចែកចាយបន្ដតាមរោងសិប្បកម្ម ក្នុងខេត្តស្ទឹងត្រែង។ ប្រជាពលរដ្ឋស្រុកសៀមប៉ាងបានឲដឹងថាការពិតប្រជាពលរដ្ឋមួយចំនួនបានទទួល ប្រាក់ពីយាយព្រឿងតាំងពីមុនពេលដែលពួកគេចូលទៅកាប់ឈើនៅក្នុងព្រៃ ហើយសន្យាថានឹងយកឈើដែលកាប់បានពីតំបន់អភិរក្សយកមកលក់ឲ្យយាយ ព្រឿង និងបក្ខពួក។
ប្រជាពលរដ្ឋស្រុកសៀមប៉ាង ខេត្តស្ទឹងត្រែង បានរាយការណ៍មកថាមេឈ្មួញឈើជាជនជាតិយួនមានឥទ្ធិពលឈ្មោះយាយព្រឿង បានយកលុយឲ្យកូនចៅទៅទិញឈើពីប្រជាពលរដ្ឋនៅតាមស្រុកនានាដែលនៅមាន ឈើប្រណីត។
សកម្មជនព្រៃឈើនៅខេត្តស្ទឹងត្រែងបានបញ្ជាក់ថាក្រុមឈ្មួញដែលកំពុង បំផុសបំផុលឲ្យមានការកាប់ឈើនោះមិនមែនមានតែក្រុមយាយព្រឿងទេ តែឈ្មួញឈ្មោះយាយព្រឿងជាមេឈ្មួញដែលជួលប្រជាពលរដ្ឋឲ្យចូលកាប់ឈើ មានឥទ្ធិពលនិងទ្រង់ទ្រាយធំជាងគេ។ ប្រភពដដែលបានបញ្ជាក់ថាមានឈ្មួញខ្លះបានឃុបឃិតជាមួយមន្ត្រីមានអំណាច នៅក្នុងខេត្តស្ទឹងត្រែងនាំឈើប្រណីតយកទៅលក់ឲ្យឈ្មួញធំៗនៅក្នុង ទឹកដីខេត្តត្បូងឃ្មុំនិងកំពង់ចាមហើយឈ្មួញនៅខេត្តទាំងពីរបាននាំឈើ ទាំងនោះយកទៅលក់បន្តឲ្យឈ្មួញជនជាតិយួននៅតាមព្រំដែន។សកម្មជនព្រៃឈើ នៅខេត្តស្ទឹងត្រែងបានបញ្ជាក់ថាបច្ចុប្បន្នមានឈើមួយចំនួនធំត្រូវបាន គេកែច្នៃជាគ្រឿងសង្ហារឹមក្នុងរោងសិប្បកម្មនៅខេត្តស្ទឹងត្រែងរួច នាំយកទៅលក់នៅបណ្តាខេត្តជិតខាង និងរាជធានីភ្នំពេញតែគ្មានសមត្ថកិច្ចជំនាញណាចេញមុខបង្ក្រាបនោះឡើយ។
ប្រជាពលរដ្ឋខេត្តស្ទឹងត្រែងបានអំពាវនាវឲ្យថ្នាក់ដឹកនាំខេត្តនិង មន្ត្រីពាក់ព័ន្ធធ្វើការទប់ស្កាត់បទល្មើសព្រៃឈើឲ្យមានប្រសិទ្ធភាព សម្រាប់ជនល្មើសគ្រប់រូបព្រោះកន្លងមកមានឈ្មួញខ្លះសមត្ថកិច្ចជំនាញ មិនហ៊ានបង្ក្រាបនោះទេខណៈជនល្មើសផ្សេងទៀតត្រូវសមត្ថកិច្ចបង្ក្រាប ដោយគ្មានការលើកលែងឡើយ។ជាក់ស្តែងមេឈ្មួញឈើនៅខេត្តស្ទឹងត្រែងឈ្មោះ យាយព្រឿងដែលកំពុងជួលពលរដ្ឋចូលកាប់ឈើយកមកលក់ឲ្យខ្លួនមិនដែល ត្រូវបានសមត្ថកិច្ចជំនាញខេត្តស្ទឹងត្រែងបង្ក្រាបនោះទេបើទោះជា ប្រជាពលរដ្ឋខេត្តស្ទឹងត្រែងបានដឹងច្បាស់ថាយាយព្រឿងជាអ្នកបាន ប្រព្រឹត្តបទល្មើសព្រៃឈើច្រើនឆ្នាំ ហើយក្តី ៕
