ថ្មីៗមានករណីបែកធ្លាយរិះគន់ថា លោក អ៊ុំ ប៉ុណ្ណាការ ដែលមានតួនាទីជាខុទ្ទកាល័យរងនៃទីចាត់ការលទ្ធកម្ម សម្រាប់ការវិនិយោគនៃសាលាខេត្តកំពង់ចាម បានឃុបឃិតបើកកញ្ចប់ចងមុងដេញថ្លៃគម្រោងអភិវឌ្ឍន៍ហេដ្ឋារចនាសម្ព័ន្ធ មូលដ្ឋានជា “គោលនយោបាយមូលនិធិជាតិ និងមូលនិធិភូមិ ឃុំ សង្កាត់”ទៅឱ្យឈ្មោះ ហង្ស សុគា ជាបក្ខពួក ដើម្បីងាយ ស្រួលប្រព្រឹត្តអំពើពុករលួយ ។ ហើយដែលគេស្គាល់ថា លោក ហង្ស សុគា ជានាយសឹករងស្រុកព្រៃឈរ ជាដៃគូជិតដិតរបស់ លោក អ៊ុំ ប៉ុណ្ណាការ នោះតែម្តង ។
ពាក់ព័ន្ធនឹងករណីដេញថ្លៃវិនិយោគនៅខេត្តកំពង់ចាម បានខ្សឹបទម្លាយព័ត៌មានដ៏រសើបនេះ បន្ទាប់ពីគម្រោងដេញថ្លៃ ជួសជុលផ្លូវ ២ខ្សែ នៅឃុំមៀន និងឃុំក្រូច ស្រុកព្រៃឈរ កាលពីពេលថ្មីៗនេះ ទំនងជាបង្កប់នូវភាពមិនប្រក្រតី ដែលពួក គាត់សង្ស័យជាការដេញថ្លៃចងមុងចែកគ្នាស៊ី កេងប្រវ័ញ្ចលុយជាតិ ។ ហើយដែលជាទូទៅមន្ត្រីក្រុមហ៊ុនចងមុងដេញថ្លៃទាំង នោះ ច្រើនទុកគម្រោងជាសាច់កាប់ ។
ក្រុមហ៊ុនវិនិយោគទាំងនោះ បានខ្សឹបទម្លាយឱ្យដឹងទៀតថា កាលពីព្រឹកថ្ងៃទី ១១ ខែមិថុនា ឆ្នាំ២០១៥ កន្លងទៅ នេះ គឺសាលាឃុំមៀន ស្រុកព្រៃឈរ ខេត្តកំពង់ចាម បានបើកគម្រោងដេញថ្លៃ អភិវឌ្ឍន៍ហេដ្ឋារចនាសម្ព័ន្ធមូលដ្ឋាន ( មូលនិធិភូមិ ឃុំ សង្កាត់)ដោយមេឃុំទាំងពីរ ជាម្ចាស់លទ្ធកម្ម និងមានការចូលរួមពីសំណាក់ លោក អ៊ុំ ប៉ុណ្ណាការ នាយករង ទីចាត់ការវិនិយោគខេត្តកំពង់ចាមជាប្រធាន ។
តាមប្រភពទម្លាយដូចជា ក្នុងគម្រោងទី ១ នៅឃុំមៀនបានចំណាយទឹកប្រាក់ ជួសជុលផ្លូវជាង ២គីឡូម៉ែត្រ ដែល មានទឹកប្រាក់ចំនួន ៩៣.៨៦០.៧៣០០រៀល ។ ដូចជា គម្រោងជួសជុលផ្លូវឃុំក្រូចវិញ មានទឹកប្រាក់ចំនួន ៥២.៨៦០.៧៣០ រៀល ហើយអ្នកមានសិទ្ធិចូលរួមដេញថ្លៃ មានតែ ៤ក្រុមហ៊ុន ចូលរួមដេញថ្លៃជួសជុលផ្លូវទាំង ២ឃុំនោះ ដោយឈ្មោះ ហង្ស សុគា មេបញ្ជាការសឹករងស្រុកព្រៃឈរបានទទួលគម្រោងនោះ ពុំបាច់ចំណាយញើសឈាមទាល់តែសោះ ។
តាមក្រុមអ្នកវិនិយោគខាងលើបានខ្សឹបឱ្យដឹងទៀតថា ការដេញថ្លៃនោះទំនងជាបង្កប់ទៅដោយអំពើពុករលួយ ព្រោះ ប្រាក់ប៉ាន់ស្មាន និងប្រាក់លម្អៀងដែលដេញបាននោះ វាខុសគ្នាយ៉ាងច្រើន និងបានធ្វើឱ្យរដ្ឋខាតបង់តែចំណេញក្រុមហ៊ុន និងបក្ខពួក ដែលគេរៀបចំជាប្រព័ន្ធចងមុងទុករួចជាស្រេច ។
យោងតាមទឹកប្រាក់ប៉ាន់ការដេញថ្លៃនៅឃុំមៀន ចំនួន ៩៣.៨៦០.៧៣០០រៀល គេដេញចុះមកត្រឹមតែ ៩២.៤៦៦.០០០រៀល ធ្លាក់តែជាង ១លានរៀលប៉ុណ្ណោះ ហើយប្រាក់ប៉ាន់ស្មាននៅឃុំក្រូចចំនួន៥២.៨៦០.៧៣០ រៀល គេដេញចុះមកត្រឹម ៥១.៥០០.០០០រៀលប៉ុណ្ណោះ គឺធ្លាក់តែជាង ១លានរៀលដូចគ្នា ។ ដូច្នេះការដេញថ្លៃនេះ គ្មានគណនេយ្យភាព និងតម្លាភាពទេ គឺជាការរៀបចំគម្រោងរបស់ក្រុមបក្ខពួកដែលខុសពីការដេញថ្លៃ កាលពីថ្ងៃទី ១២ ខែមិថុនា ឆ្នាំ២០១៥ លើគម្រោងជួសជុលផ្លូវនៅឃុំមេព្រីង ស្រុកបាធាយ ខេត្តកំពង់ចាមដែរនោះ គឺគេដេញថ្លៃដ៏មានតម្លា ភាពមួយ ហើយរដ្ឋសល់លុយចំណេញច្រើន គឺប្រាក់ប៉ាន់ស្មានជាង ៤០លានរៀល គេដេញបានតែជាង ១៥លានរៀលប៉ុណ្ណោះ គឺរដ្ឋ ចំណេញលុយច្រើន តែគម្រោងដេញថ្លៃ ២ឃុំខាងលើនេះ បែរជារដ្ឋសល់លុយតែជាង ១លានរៀល ក្នុង១គម្រោង ហើយអ្វី ដែលគេសង្ស័យបំផុតនោះ គឺមានអ្នកចូលរួមដេញថ្លៃតែ ៤ក្រុមហ៊ុនប៉ុណ្ណោះ ឯក្រៅពីនេះ គេមិនឱ្យចូលដេញថ្លៃទេ បិទការលក់ Bid ស្ងាត់ៗ ។ ដូច្នេះហើយទើបបានជាក្រុមហ៊ុនទម្លាយឱ្យកាសែតចុះផ្សាយ និងគួរតែអង្គភាពប្រឆាំងអំពើពុករលួយ បើកការស៊ើបអង្កេតការដេញថ្លៃនៅឃុំមៀន និងឃុំក្រូច ឡើងវិញផង ។
ដោយឡែកឈ្មោះ អ៊ុំ ប៉ុណ្ណាការ នេះតាមប្រភពបង្ហើបថា គឺល្បីល្បាញរត់ការដូរដាក់ត្រូវប៉ាន់បំផុតជាមួយ និងគម្រោងលទ្ធកម្មដេញនានាក្នុងសាលាខេត្តកំពង់ចាម ហើយដែលក្នុងថ្ងៃនេះដែរការិយាល័យរបស់យើងពុំអាចសុំទំនាក់ ទំនងបានពីឈ្មោះពាក់ព័ន្ធខាងលើឡើយ ៕
ដោយ ៖ ស្ទាំងខ្មៅ
