ប្រភពពីសមត្ថកិច្ចពាក់ព័ន្ធ និងមន្ត្រីអាជ្ញាធរក្នុងខេត្តត្បូងឃ្មុំ បានឲ្យដឹងថាឧកញ៉ា វ័ន ប៊ុនថៃ មានខ្នងបង្អែកក្រាស់ទើបហ៊ានបំពានទៅនឹងវិធានការបង្ក្រាបបទល្មើស ព្រៃឈើដែលគណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ កំពុងអនុវត្តន៍ដោយយកចិត្តទុកដាក់។ សកម្មភាពជីកដីកប់ឈើប្រណីតនៅក្រោយឃ្លាំងរបស់ខ្លួនក្នុងស្រុក អូររាំងឪ ជាភស្តុតាងបង្ហាញថាឧកញ៉ា វ័ន ប៊ុនថៃ មិនញញើតទៅនឹងវិធានការរបស់រាជរដ្ឋាភិបាលក្នុងការទប់ស្កាត់បទល្មើស ព្រៃឈើនិងបង្ក្រាបបទល្មើសរត់ពន្ធឈើទៅស្រុកយួននោះទេ។ ក្រសួងនិងស្ថាប័នពាក់ព័ន្ធ ជាពិសេសលោកនាយករដ្ឋមន្ត្រី ហ៊ុន សែន គួរមានវិធានការទៅលើឧកញ៉ា វ័ន ប៊ុនថៃ ជាបន្ទាន់កុំឲ្យឈ្មួញឈើរូបនេះធ្វើអ្វីៗយ៉ាងក្រអឺតក្រទមបន្តទៀត។
ថ្មីៗនេះក្នុងខណៈដែលកម្លាំងគណៈកម្មការជាតិដើម្បីទប់ស្កាត់ និងបង្ក្រាបបទល្មើសព្រៃឈើ កំពុងចាត់វិធានការត្រួតពិនិត្យឃ្លាំងស្តុកឈើរបស់ឧកញ៉ា លឹម ប៊ុណ្ណា ហៅខ្នា និងឧកញ៉ា សឹង សំអុល នៅស្រុកមេមត់ ខេត្តត្បូងឃ្មុំនោះ ស្រាប់តែឧកញ៉ា វ័ន ប៊ុនថៃ បន្តសកម្មភាពដឹកឈើទៅលក់នៅស្រុកយួនយ៉ាងងងើល។ ប៉ុន្តែរថយន្តដឹកឈើរបស់ឧកញ៉ា វ័ន ប៊ុនថៃ ត្រូវសមត្ថកិច្ចកងរាជអាវុធហត្ថបង្ក្រាបបាននៅក្នុងទឹកដីខេត្តព្រៃវែង ហើយរហូតមកដល់ពេលនេះមិនទាន់ឃើញគណៈកម្មការជាតិដើម្បីទប់ស្កាត់និង បង្ក្រាបបទល្មើសព្រៃឈើ ចាត់វិធានការទៅលើឧកញ៉ា វ័ន ប៊ុនថៃ តាមច្បាប់នៅឡើយទេ។
ឥឡូវនេះសេចក្ដីរាយការណ៍ពីមន្ត្រីអាជ្ញាធរនិងសមត្ថកិច្ចស្រុក អូររាំងឪ ខេត្តត្បូងឃ្មុំ បានឲ្យដឹងថា ឧកញ៉ា វ័ន ប៊ុនថៃ បានជីកដីកប់ឈើប្រណីតនៅខាងក្រោយឃ្លាំងស្តុកឈើរបស់ខ្លួនក្នុងស្រុក អូររាំងឪ ខេត្តត្បូងឃ្មុំ។ ទង្វើរបស់ឧកញ៉ា វ័ន ប៊ុនថៃ ត្រូវបានមជ្ឈដ្ឋាននានារិះគន់ថា ជាការផ្គើនទៅនឹងវិធានការបង្ក្រាបបទល្មើសព្រៃឈើរបស់រាជរដ្ឋាភិបាល យ៉ាងគឃ្លើនបំផុត។ រូបភាពនៃការជីកដីកប់ឈើប្រណីតរបស់ឧកញ៉ា វ័ន ប៊ុនថៃ ត្រូវបានផ្សព្វផ្សាយតាមបណ្ដាញទំនាក់ទំនងសង្គមហ្វេសប៊ុកផងដែរ។ ហេតុនេះគណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ គួរមានវិធានការតាមច្បាប់ទៅលើឧកញ៉ា វ័ន ប៊ុនថៃ ដើម្បីជាការព្រមានដល់ឈ្មួញឈើដទៃទៀតផងដែរ កុំឲ្យបន្តបំពានច្បាប់៕
