គេពុំច្បាស់ទេថា ក្រុមហ៊ុនដីសម្បទានសេដ្ឋកិច្ចឈ្មោះ អានម៉ារឌីគ្រុប របស់ឧកញ៉ា អាន ម៉ារឌី ត្រូវបានគេដឹងថា ទទួលបាន ដីសម្បទានសេដ្ឋកិច្ចទំហំរាប់ម៉ឺនហិកតានៅក្នុងស្រុកសណ្តាន់ ខេត្តកំពង់ធំ សម្រាប់ដាំកៅស៊ូ។ ក៏ប៉ុន្តែជាក់ស្តែងក្រុមហ៊ុនរបស់ ឧកញ៉ា អាន ម៉ារឌី ដាំកៅស៊ូបានតិចជាង៥០០ហិកតាប៉ុណ្ណោះ ក្រៅពីនេះគឺប្រើប្រាស់រូបភាពដីសម្បទានសេដ្ឋកិច្ចដើម្បីកាប់ ឈើនិង ប្រមូលទិញឈើដឹកជញ្ជូនទៅលក់នៅស្រុកយួនតាមអំពើចិត្ត។
ជាក់ស្តែងនៅក្នុងបរិវេណដីសម្បទានសេដ្ឋកិច្ចរបស់ក្រុមហ៊ុនឧកញ៉ា អាន ម៉ារឌី ត្រូវបានគេរកឃើញស្តុកទុកឈើជាច្រើនក្នុង ពេលថ្មីៗនេះ។
តាមប្រភពពីមន្ត្រីដែលចូលរួមក្នុងប្រតិបត្តិការរបស់គណៈកម្មការ ជាតិដើម្បីទប់ស្កាត់និងបង្ក្រាបបទល្មើសព្រៃឈើ បានឱ្យដឹងថា នៅក្នុងដីសម្បទានរបស់ក្រុមហ៊ុនឧកញ៉ា អាន ម៉ារឌី មានរោងចក្រអារច្រៀកឈើចំនួន២កន្លែង ហើយក្នុងមួយថ្ងៃៗមានរថយន្តយីឌុបមិនតិចជាង១០គ្រឿងទេដែលចូលទៅ ដឹកឈើចេញពីរោងចក្រនោះ។
ថ្មីៗគេបានរកឃើញថា ក្រុមហ៊ុនឧកញ៉ា អាន ម៉ារឌី មិនបានដាំកៅស៊ូដូចអ្វីដែលមានចែងក្នុងកិច្ចសន្យាជាមួយក្រសួង កសិកម្ម និងរាជរដ្ឋាភិបាលនោះទេ ហើយគេបែរជាធ្វើសកម្មភាពកាប់ឈើដឹកចេញពីព្រៃឡង់យកមកអារច្រៀក ក្នុងរោងចក្ររបស់ខ្លួន ហើយដឹកជញ្ជូនចេញទៅលក់នៅស្រុកយួនដោយគ្មានសមត្ថកិច្ចណាហ៊ាន រារាំង ឡើយ។
ប្រភពបានឱ្យដឹងទៀតថា ទីតាំងដីសម្បទានសេដ្ឋកិច្ចរបស់ឧកញ៉ា អាន ម៉ារឌី នៅក្នុងឃុំសណ្តាន់ ស្រុកសណ្តាន់ ខេត្តកំពង់ធំ ហើយទីតាំងនោះក្លាយជាតំបន់អបគមន៍ជាយូរមកហើយ ព្រោះមានការយាមកានយ៉ាងតឹងតែងមិនឱ្យអ្នកសារព័ត៌មានចូល បានទេ។
ដោយឡែកថ្មីៗនេះ គេបានឃើញលោក ហ៊ុន សែន នាយករដ្ឋមន្ត្រីថ្លែងការពារថា ក្រុមហ៊ុននេះពុំមានការកាប់ឈើខុសច្បាប់ ទេ ។ ដូច្នេះគណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ គួរបើកការស៊ើប អង្កេតជាបន្ទាន់ ព្រោះឧកញ៉ា អាន ម៉ារឌី កាប់ឈើដឹកជញ្ជូនធ្វើអាជីវកម្មខុសច្បាប់ជាយូរមកហើយ ធ្វើឱ្យឈើប្រណីតនិងឈើប្រភេទលេខ១ ក្នុងព្រៃឡង់ នៃខេត្តកំពង់ធំ ស្ទើរតែវិនាសសាបសូន្យ ។
ទោះយ៉ាងណា ប្រសិនបើគណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ មិនហ៊ានចាត់ការលើមេឈ្មួញ អាន ម៉ារឌី ទេនោះគឺវិធានការទប់ស្កាត់បទល្មើសព្រៃឈើនឹងក្លាយជារឿងឥតន័យ ជាមិនខាន តែយ៉ាងណាក៏ដោយក៏គេសង្ស័យថា កន្ទេលធំអាចមានបទល្មើសបន្លំដេក ដែលគួរគណៈកម្មការថ្នាក់ជាតិដាក់ការសង្ស័យស៊ើបអង្កេតពីជម្រៅផង ។/
ដោយ ៖ វេហ៌ា
