កណ្តាល ៖ ថ្មីៗនេះ លោក ឡេង ឡារ៉ូ មន្ត្រីនគរបាលសេដ្ឋកិច្ចក្រសួងមហាផ្ទៃ បច្ចុប្បន្នបាននិងកំពុងធ្វើឱ្យប្រជាពលរដ្ឋរអ៊ូរទាំ និងក្តៅក្រហាយ ដោយសារតែសកម្មភាពចេញដាក់កុងត្រូលជជុះ នៅតាមបណ្តោយផ្លូវជាតិលេខ ២-៣ ដើម្បីកោសរូសទារ លុយពីប្រជាពលរដ្ឋរកស៊ីដឹកជញ្ជូនទំនិញ កសិផលបន្តិចបន្តួច យកទៅលក់នៅភ្នំពេញនោះកំពុងតែសកម្មយ៉ាងអនាធិបតេយ្យ បំផុត ។
តាមប្រជាពលរដ្ឋបានឱ្យដឹងថា ទីតាំងកុងត្រូលជជុះរបស់លោក ឡេង ឡារ៉ូ ដែលលួចដាក់ជាប្រចាំនោះ ស្ថិតនៅក្នុង តំបន់ស្រុកកណ្តាលស្ទឹង ខេត្តកណ្តាល សម្រាប់ធ្វើសកម្មភាពចល័ត ប្រដេញចាប់ឃាត់រថយន្តដឹកជញ្ជូនទំនិញរបស់ប្រជាពល រដ្ឋ និងក្រុមឈ្មួញធំៗជម្រិត ឱ្យចូលបង់លុយយកទៅធ្វើមានបានផ្ទាល់ខ្លួន មិនរើសមុខដោយមិនដែលខ្វល់ខ្វាយពីបទបញ្ជា របស់ថ្នាក់លើនោះទេ ។
បើតាមប្រភពមន្ត្រីមូលដ្ឋានប្រតិកម្មឱ្យដឹងថា លោក ឡេង ឡារ៉ូ តែងតែអួតអាងថា គាត់បានទទួលលិខិតបេសកកម្ម ពីអគ្គស្នងការនគរបាលជាតិឱ្យចុះទៅប្រចាំការតាផ្លូវជាតិលេខ ២-៣ នេះឱ្យធ្វើព្យុះភ្លៀងគាប.កក្រុមប្រជាពលរដ្ឋ និងឈ្មួញ តាមតែទំនើងចិត្ត (Sic) ។ ប៉ុន្តែការអនុវត្តជាក់ស្តែង ផ្ទុយពីគោលការណ៍របស់ថ្នាក់លើ និងបំពានទៅលើកំណែទម្រង់ស៊ី ជម្រៅ របស់អគ្គស្នងការនគរបាលជាតិ និងអនុសាសន៍របស់លោកនាយករដ្ឋមន្ត្រី ហ៊ុន សែន យ៉ាងពេញបន្ទុក ។
ជាងនេះទៅទៀត តាមសកម្មភាពដែលគេឃើញ គឺលោក ឡេង ឡារ៉ូ បែរជាបញ្ចោញកម្លាំងឱ្យធ្វើសកម្មភាព បង្កើត កុងត្រូលជជុះផ្ទុយពីគោលនយោ បាយទាំង ៩ចំណុច ភូមិ-ឃុំ មានសុវត្ថិភាពយ៉ាងគឃ្លើនបំផុត ផ្ទុយពីការងារទប់ស្កាត់បទ ល្មើសសេដ្ឋកិច្ចទៅជាក្តោបក្តាប់ប្រមូលសេដ្ឋកិច្ចចូលហោប៉ៅគ្រួសារ បក្ខពួកនិយម និងប្រឹងប្រមូលលុយបំប៉នថ្នាក់លើឱ្យទប់ កៅអីគាត់ទៅវិញ ។
ប្រភពពីប្រជាពលរដ្ឋអ្នករកស៊ីដឹកជញ្ជូន ទំនិញស្របច្បាប់ និងខុសច្បាប់គ្រប់ប្រភេទ តាមបណ្តោយផ្លូវជាតិលេខ ២-៣ បានឱ្យដឹងថា កម្លាំងរបស់ លោក ឡេង ឡារ៉ូ បានគំរាមកំហែងដល់ក្រុមអ្នករកស៊ី ដឹកជញ្ជូនទំនិញដែលមិនព្រម បង់លុយ ឱ្យពួកគេទៅតាមការកំណត់ដោយព្រមានចាប់ឃាត់ បញ្ជូនទៅថ្នាក់លើ ឬបង់ពិន័យ តាមច្បាប់តែម្តង ប្រសិនជាពុំបានតាម សំណើរពួកខ្លួនតម្រូវឱ្យបង់ជើងបង់ខែទេនោះ ហើយមិនថា តែទំនិញលោតឆ័ត្រ ឬទំនិញ បង់ពន្ធ ១០០% នោះទេ ដាច់ខាត ត្រូវតែបង់លុយបាយ ១០ម៉ឺន-២០ម៉ឺន ជាបន្ថែមទៀតផង ។
ដោយឡែក ប្រភពខាងលើឱ្យដឹងទៀតថា កន្លងមកថ្មីនេះ លោក ឡេង ឡារ៉ូ អាងខ្លួនជានគរបាលសេដ្ឋកិច្ចក្រសួង មហាផ្ទៃ បានធ្វើសកម្មភាពប្រដេញចាប់ឃាត់រថយន្តដឹកគោរបស់ប្រជាពលរដ្ឋដែលបើក ឆ្លងកាត់កុងត្រូលជជុះរបស់ពួកគេ ដោយកោសរូសទារលុយពីប្រជាពលរដ្ឋយ៉ាងចាស់ដៃ ហើយធាតុពិតគោដែលប្រជាពលរដ្ឋ ដឹកតាមរថយន្តនេះមានចំនួន ២ក្បាល គឺពួកគាត់ ទិញយកទៅ សម្រាប់ប្រើប្រាស់ជាកម្លាំងអូសទាញ ធ្វើស្រែចម្ការគ្រាន់តែឆ្លងកាត់ពីស្រុកមួយ ទៅស្រុកមួយសោះ ក៏ត្រូវ ចំណាយលុយបង់ឱ្យ លោក ឡេង ឡារ៉ូ ដោយគ្មានការយោគយល់នោះទេ បើទោះបីជាពួកគាត់ប្រាប់អង្វរថា ទិញគោយកមកប្រើប្រាស់ ហើយមានលិខិតស្នាមបញ្ជាក់ពីភូមិ-ឃុំ ក៏ដោយ ។
ពាក់ព័ន្ធនឹងបញ្ហានេះមិនគួរបើអគ្គស្នងការនគរបាលជាតិទុកឱ្យគាត់នូវចាប់គាបជម្រិតធ្វើបាបប្រជាពលរដ្ឋនោះទៀត ទេ ៕
ដោយ ៖ ស្ទាំងស
