ប្រភពពីសមត្ថកិច្ចពាក់ព័ន្ធនិងមន្ត្រីរាជការក្នុងខេត្តសៀមរាប បានឲ្យដឹងថា លោក ទា គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប លោក ម៉ុង ប៊ុនលីម នាយផ្នែករដ្ឋបាលព្រៃឈើសៀមរាប និងលោក យឹម ស៊ីវន នាយសង្កាត់រដ្ឋបាលព្រៃឈើសៀមរាប ទំនងទទួលបានផលប្រយោជន៍ជាប្រចាំពីឈ្មួញឈ្មោះ ស៊ីណា ទើបមិនហ៊ានប៉ះពាល់ឈ្មួញឈើរូបនេះ។ សកម្មភាពជួញដូរឈើនិងដឹកជញ្ជូនឈើប្រណីតយកមកស្តុកទុកក្នុងបរិវេណ សណ្ឋាគារអង្គរអេរ៉ា គឺជារឿងដែលគណៈកម្មការជាតិដើម្បីទប់ស្កាត់និងបង្ក្រាបបទល្មើស ព្រៃឈើ មិនគួរមើលរំលងនោះទេ ហើយត្រូវចាត់វិធានការតាមច្បាប់ដើម្បីព្រមានដល់ឈ្មួញខិលខូចដទៃទៀត ។ សព្វថ្ងៃនេះក្នុងខេត្តសៀមរាប បទល្មើសដឹកជញ្ជូនឈើនៅតែកើតឡើងយ៉ាងអានាធិបតេយ្យដោយសារសមត្ថកិច្ច ពាក់ព័ន្ធឃុបឃិតគ្នាបើកដៃឲ្យឈ្មួញធ្វើអ្វីៗតាមអំពើចិត្តជាថ្នូរ នឹងផលប្រយោជន៍។
ថ្មីៗនេះសេចក្ដីរាយការណ៍ពីសមត្ថកិច្ចពាក់ព័ន្ធបានឲ្យដឹងថា នៅផ្នែកខាងក្រោយនៃបរិវេណសណ្ឋាគារអង្គរអេរ៉ា(ANGKOR ERA) ក្នុងភូមិខ្នារ សង្កាត់ជ្រាវ ក្រុងសៀមរាប មានស្តុកឈើប្រណីតរាប់រយម៉ែត្រគូបនិងមានឈើប្រភេទលេខ១ ប្រភេទលេខ២ជាច្រើនផងដែរ។ ឈ្មួញដែលដឹកជញ្ជូនឈើមកស្តុកនៅផ្នែកខាងក្រោយសណ្ឋាគារអង្គរអេរ៉ា ត្រូវបានគេស្គាល់ថាឈ្មោះ ស៊ីណា ជាមន្ត្រីយោធានិងជាកូនប្រសារបស់ម្ចាស់សណ្ឋាគារ ។ ឈ្មួញឈ្មោះ ស៊ីណា មានទំនាក់ទំនងយ៉ាងជិតស្និទ្ធជាមួយមន្ត្រីរដ្ឋបាលព្រែឈើ និងសមត្ថកិច្ចពាក់ព័ន្ធដទៃទៀត ហេតុនេះហើយទើបអាចបន្តជួញដូរនិងស្តុកឈើប្រណីតដោយគ្មានញញើត ។
មន្ត្រីរាជការក្នុងខេត្តសៀមរាប បានលើកឡើងថាថៅកែសណ្ឋាគារអង្គរអេរ៉ា មានខ្សែស្រឡាយយ៉ាងធំមានឋានៈឧបនាយករដ្ឋមន្ត្រីទៀតផង ហេតុនេះហើយទើបមន្ត្រីរដ្ឋបាលព្រៃឈើបានត្រឹមតែឃុបឃិតដើម្បីទទួលផល ប្រយោជន៍មិនហ៊ានបង្ក្រាប ។ ដូច្នេះគណៈកម្មការជាតិដើម្បីទប់ស្កាត់និងបង្ក្រាបបទល្មើសព្រៃឈើ គួរបើកការស៊ើបអង្កេតទៅលើឈ្មួញឈើឈ្មោះ ស៊ីណា ជាកូនប្រសាថៅកែសណ្ឋាគារអង្គរអេរ៉ាជាបន្ទាន់ ព្រោះមួយរយៈពេលចុងក្រោយនេះមានឈើប្រណីតនិងឈើប្រភេទលេខ១ លេខ២ ច្រើនរយម៉ែត្រគូបត្រូវបានគេដឹកយកមកស្តុកដោយគ្មានញញើត ។ លោក ទា គឹមសុទ្ធ និងមន្ត្រីក្រោមឱវាទនាំគ្នាសម្ងំស្ងាត់ឈឹងដើម្បីផលប្រយោជន៍មិនចាត់វិធានការទប់ស្កាត់បទល្មើសព្រៃឈើ ៕
