ក្រុមឈ្មួញនិងអាជីវកររកស៊ីនាំចូលទំនិញពីប្រទេសសៀមតាមច្រក បឹងត្រកួន ស្រុកថ្មពួក ខេត្តបន្ទាយមានជ័យ បានឲ្យដឹងថាពួកគាត់ជួបការលំបាកយ៉ាងខ្លាំង ព្រោះគយចល័ត២ក្រុមនោះតែងជំរិតយកលុយពីពួកគាត់តាមអំពើចិត្ត បើទោះបីពួកគាត់បង់ពន្ធត្រឹមត្រូវនៅច្រកព្រំដែនយ៉ាងណាក៏ដោយ។ ចំណែកឈ្មួញធំៗបានឃុបឃិតជាមួយលោក ឡាំ ប៊ុនថន ប្រធានការិយាល័យគយច្រកបឹងត្រកួន និងគយចល័ត២ក្រុមនោះ ទើបគេអាចដឹកជញ្ជូនទំនិញគេចពន្ធ និងទំនិញខុសច្បាប់តាមរថយន្តធំៗពីទឹកដីសៀមចូលទឹកដីខ្មែរយ៉ាង រលូន។ រឿងរ៉ាវដែលរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ លោក អូន ព័ន្ធមុនីរ័ត្ន ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករ មិនត្រូវមើលរំលងនោះគឺករណីលោក ឡាំ ប៊ុនថន បើកដៃឲ្យឈ្មួញនាំចូលរថយន្តចង្កូតស្ដាំតាមច្រករបៀងចំការគ ក្បែរច្រកព្រំដែនបឹងត្រកួន។ ដោយហេតុថា ច្រករបៀងចំការគ គឺជាកន្លែងដែលឈ្មួញនាំចូលរថយន្តចង្កូតស្ដាំតាមអំពើចិត្តដោយមាន ការឃុបឃិតជាមួយសមត្ថកិច្ចគយ និងសមត្ថកិច្ចពាក់ព័ន្ធដទៃទៀតបំពានទៅលើបំរាមរបស់រដ្ឋាភិបាលោក ហ៊ុន សែន។
ប្រភពពីសមត្ថកិច្ចពាក់ព័ន្ធនៅច្រកព្រំដែនបឹងត្រកួន ស្រុកថ្មពួក ខេត្តបន្ទាយមានជ័យ បានឲ្យដឹងថា លោក ឡាំ ប៊ុនថន ប្រធានការិយាល័យគយច្រកបឹងត្រកួន និងបក្ខពួកកំពុងឃុបឃិតគ្នាប្រព្រឹត្តអំពើពុករលួយប្រមូលលុយចែកគ្នា ធ្វើមានធ្វើបានយ៉ាងសុខស្រួល។ ប្រភពបានឲ្យដឹងទៀតថា លោក ឡាំ ប៊ុនថន និងបក្ខពួកបើកដៃឲ្យឈ្មួញនាំចូលរថយន្តចង្កូតស្ដាំដើម្បីជាថ្នូរ នឹងលុយកាក់យ៉ាងច្រើន ហើយបើឈ្មួញណាមិនទាក់ទងជាមុនទេនោះ ប្រាកដជាត្រូវប្រឈមនឹងការបង្ក្រាបជាមិនខាន។ ជាងនេះទៅទៀតលោក ឡាំ ប៊ុនថន មានបក្ខពួកជាមន្ត្រីគយចល័ត២ក្រុមសម្រាប់ដេញបង្ក្រាបរថយន្ត ចង្កូតស្ដាំ និងទំនិញគេចពន្ធផងដែរ។
សមត្ថកិច្ចនៅច្រកបឹងត្រកួន បានឲ្យដឹងថាកាលពីវេលាម៉ោង៨យប់ថ្ងៃទី១៤ ខែមីនា ឆ្នាំ២០១៦ កម្លាំងនគរបាលស្រុកថ្មពួក បានស្ទាក់ឃាត់ចាប់រថយន្តចង្កូតស្ដាំ១គ្រឿងម៉ាកនីសាន់ណាវរ៉ា ពណ៌ស ពាក់ស្លាកលេខក្លែងក្លាយភ្នំពេញ2A-8518 ដែលឈ្មួញនាំចូលពីស្រុកសៀមតាមច្រករបៀងចំការគ ជិតច្រកបឹងត្រកួន ដែលនៅទីនោះមានលោក ឡាំ ប៊ុនថន ជាប្រធានការិយាល័យគយនិងរដ្ឋាករ។ គេសង្ស័យថាលោក ឡាំ ប៊ុនថន គឺជាអ្នកបើកដៃឲ្យឈ្មួញនាំចូលរថយន្តចង្កូតស្ដាំដើម្បីជាថ្នូរនឹង ផលប្រយោជន៍ ប៉ុន្តែពុំមានការសម្របសម្រួលជាមួយសមត្ថកិច្ចនគរបាលទើបឈានដល់ ការបង្ក្រាបតែម្តង។ ប្រភពបានឲ្យដឹងទៀតថា លោក ឡាំ ប៊ុនថន មានក្រុមការងារគយចល័ត២ក្រុមសម្រាប់ប្រដេញទប់ស្កាត់បង្ក្រាបនិង ត្រួតពិនិត្យទំនិញ ប្រសិនបើឈ្មួញមិនឃុបឃិតបង់លុយតាមការកំណត់៕
