ខេត្ត ឧត្ដរមានជ័យ ៖ ប្រភពដដែលបានបន្ដឱ្យដឹងថា រាល់ថ្ងៃព្រហស្បត្ដិ៍ និងថ្ងៃអាទិត្យ គេតែងសង្កេតឃើញមានរថយន្ដជាច្រើនដង្ហែជួរគ្នាដូចហែរកឋិន ដឹកទំនិញចូលមកកម្ពុជា ប៉ុន្តែគេសង្កេតឃើញថា មន្ដ្រីពាក់ព័ន្ធទាំង៣ស្ថាប័នដូចជាពុំបានត្រួតពិនិត្យទំនិញ ទាំងនោះ ឱ្យបានហ្មត់ចត់ លើការបង់ពន្ធ និងគុណភាពទំនិញនោះទេ តែបែរជាដើរប្រមូលលុយពីក្រុមឈ្មួញទាំងនោះ មកដាក់ហោប៉ៅខ្លួន និងបក្ខពួក ទៅវិញ។ លើសពីនេះទៀត រាល់ថ្ងៃគេបានសង្កេតឃើញមានទំនិញជាច្រើនមុខ ដូចជាភេសជ្ជៈ ស៊ីម៉ងត៍ ដែលបានដាក់លក់នៅផ្សារអន្លង់វែងយ៉ាងសេរី ដោយពុំមានបិទស្លាកសញ្ញាបង់ពន្ធ(រ៉ែម) ឡើយ។ ក្រៅពីនេះទៀត នៅមានជើងមាន់ ឆ្អឹងមាន់ និងម៉ឹក ដែលសុទ្ធតែគ្មានគុណភាព ក៏បានដាក់លក់យ៉ាងអាណាធិបតេយ្យជារៀងរល់ថ្ងៃ ។
ស្ថាប័ន៣ ដែលប្រចាំការនៅច្រកអន្តរជាតិជាំស្រង៉ាំ បានរងការរិះគន់យ៉ាងខ្លាំង លើការបណ្ដែតបណ្ដោយឱ្យទំនិញគេចពន្ធ គ្មានគុណភាព និងប្រើប្រាស់សារធាតុគីមី នាំចូលមកប្រទេសកម្ពុជា ដោយគ្មានការត្រួតពិនិត្យនិងវាយតម្លៃ។
ប្រភពព័ត៌មានបានឱ្យដឹងថា គណៈកម្មការច្រកទ្វារ កាំកុងត្រូល និងសាខាគយ និងរដ្ឋាករប្រចាំច្រកអន្តរជាតិជាំសាង៉ាំ កំពុងឃុបឃិតគ្នាចងអង្រឹងដេកមើលបទល្មើសសេដ្ឋកិច្ចដែលកំពុងតែកើតមានពេញបន្ទុកនៅតាមច្រក ។ មួយថ្ងៃៗពួកគេហាក់ពុំបានគិតគូរយកចិត្តទុកដាក់បំពេញការងារទៅតាម កតព្វកិច្ច ភារកិច្ចរបស់ខ្លួននោះ។ ផ្ទុយទៅវិញ ជនទាំងនោះហាក់ប្រព្រឹត្តផ្ទុយស្រឡះពីភារកិច្ច ដោយបណ្ដែតបណ្ដោយឱ្យទំនិញគេចពន្ធ ទំនិញខូចគុណភាព និងទំនិញដែលប្រើប្រាស់សារធាតុគីមីនាំចូលមកពីប្រទេសក្រៅចូលមក កម្ពុជាដោយរលូន ៕
