ប្រភពពីមន្ត្រីនគរបាលនៅក្នុងនាយកដ្ឋានប្រឆាំងបទល្មើសសេដ្ឋកិច្ច មួយចំនួនបានឲ្យដឹងថា លោក អ៊ុំ មុនី កំពុងទទួលបានតួនាទីយ៉ាងសំខាន់ក្នុងការប្រមូលផលប្រយោជន៍សេដ្ឋកិច្ច ធំជាងគេ បើប្រៀបធៀបទៅនឹងមន្ត្រីនគរបាលដទៃទៀតក្នុងនាយកដ្ឋាន។ ប្រភពបានឲ្យដឹងទៀតថាលោក អ៊ុំ មុនី ដែលទទួលបានតួនាទីសំខាន់ថ្មីៗនេះ ក៏បានយកមន្ត្រីនគរបាលម្នាក់ឈ្មោះ សាន សាធុការ ជាមនុស្សជំនិតរបស់ខ្លួនដើម្បីឲ្យប្រមូលលុយពីឈ្មួញរកស៊ីដឹកជញ្ជូន ទំនិញគេចពន្ធនិងទំនិញខុសច្បាប់តាមអំពើចិត្ត។ ទន្ទឹមនឹងនេះលោក អ៊ុំ មុនី បានរៀបចំការងាររួចជាស្រេចឲ្យមន្ត្រីជំនិតរបស់ខ្លួនចុះធ្វើស្ថិតិ ពីចំនួនឃ្លាំងស្តុកទំនិញ និងទំនិញដែលឈ្មួញនាំចូលក្នុងរាជធានីភ្នំពេញដើម្បីក្ដាប់ប្រភព ចំណូលគ្រប់ជ្រុងជ្រោយ។ ដូច្នេះលោក អ៊ុំ មុនី អាចប្រមូលចំណូលបានយ៉ាងច្រើន ដើម្បីដោះស្រាយតាមតម្រូវការរបស់ថ្នាក់លើ ។
ចាប់តាំងពីលោក ចាន់ វ៉ាន់ធឿន ឡើងកាន់តំណែងជាប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចរួចមក មានសេចក្ដីរាយការណ៍ថា លោក ចាន់ វ៉ាន់ធឿន បណ្ដោយឲ្យកូនចៅក្រោមឱវាទមួយចំនួនធ្វើអ្វីៗតាមអំពើចិត្តដើម្បី ប្រមូលផលប្រយោជន៍តាមរបៀបពុករលួយ។ ក្នុងនោះថ្មីៗនេះលោក អ៊ុំ មុនី ជាអនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច បន្ទាប់ពីឈរជើងអស់រយៈពេលជិត១០ឆ្នាំមកហើយនោះ ត្រូវបានតែងតាំងឲ្យជំនួសការងារលោក ឡុង ស្រេង។ មានន័យថា លោក អ៊ុំ មុនី ធ្វើជាអនុប្រធាននាយកដ្ឋាន នគរបាលប្រឆាំងបទល្មើសសេដ្ឋកិច្ចទទួលបន្ទុកការគ្រប់គ្រង បង្ការបង្ក្រាបបទល្មើសសេដ្ឋកិច្ច ក៏ដូចជាទប់ស្កាត់ការហូរចូលនៅចំណីអាហារមានជាតិពុលនៅក្នុងរាជធានីភ្នំពេញ។
\មន្ត្រីនគរបាលនៃនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃ បានឲ្យដឹងថា លោក សាន សាធុការ ដែលជាមនុស្សជំនិតរបស់លោក អ៊ុំ មុនី ធ្លាប់មានជំនាញនិងស្នាដៃខាងប្រមូលលុយពីឈ្មួញដឹកជញ្ជូនទំនិញ ឆ្លងកាត់ផ្លូវជាតិលេខ១ លេខ២ លេខ៣ លេខ១១០ និង២១០ផងដែរ។ ដូច្នេះនៅពេលទទួលបានសិទ្ធិអំណាចពីលោក អ៊ុំ មុនី គឺលោក សាន សាធុការ អាចប្រើអំណាចនេះដើម្បីប្រមូលផលប្រយោជន៍យ៉ាងសុខស្រួលជាមិនខាន ព្រោះនៅក្នុងរាជធានីភ្នំពេញមានឃ្លាំងស្តុកទំនិញគេចពន្ធ និងទំនិញខុសច្បាប់ជាច្រើនកន្លែង ហើយតាមផ្លូវជាតិដូចរៀបរាប់ខាងលើនេះ ជាទីតាំងដែលឈ្មួញនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់យ៉ាងពេញបន្ទុកតែម្តង។
