មន្ត្រីរាជការនៅក្រសួងប្រៃសណីយ៍និងទូរគមនាគមន៍ បានឲ្យដឹងថា កាលពីប៉ុន្មានខែមុននេះពេលដែលលោក ឡាយ ម៉ារីវ៉ូ នៅកាន់តំណែងជាអគ្គនាយកទូរគមនាគមន៍កម្ពុជា ត្រូវមន្ត្រីក្រោមឱវាទបើកកកាយពីរឿងពុករលួយធ្វើឲ្យបាត់លុយជាង២៣ ម៉ឺនដុល្លារអាមេរិក។ ក៏ប៉ុន្តែជុំវិញអំពើពុករលួយនេះ ក្រសួងប្រៃសណីយ៍និងទូរគមនាគមន៍ បានត្រឹមតែដកហូតតំណែងលោក ឡាយ ម៉ារីវ៉ូ ហើយតែងតាំងអ្នកថ្មីជំនួសប៉ុណ្ណោះ ដោយមិនទាន់ឃើញអង្គភាពប្រឆាំងអំពើពុករលួយ ចាត់វិធានការតាមច្បាប់លើលោក ឡាយ ម៉ារីវ៉ូ នៅឡើយទេ។ ហេតុនេះហើយទើបមានការអំពាវនាវឲ្យអង្គភាពប្រឆាំងអំពើពុករលួយ ចាត់វិធានការតាមច្បាប់ទៅលើលោក ឡាយ ម៉ារីវ៉ូ អតីតអគ្គនាយកទូរគមនាគមន៍កម្ពុជា ដែលល្បីល្បាញខាងប្រព្រឹត្តអំពើពុករលួយឲ្យដូចចំណាត់ការទៅលើលោក ចែម សង្វារ ផងដែរ។
ប្រភពពីមន្ត្រីតុលាការកំពូលបានឲ្យដឹងថា លោក ចែម សង្វារ អតីតអគ្គាធិការ នៃអគ្គាធិការដ្ឋានអធិការកិច្ចក្រសួងប្រៃសណីយ៍ និងទូរគមនាគមន៍ ដែលប្រព្រឹត្តអំពើពុករលួយលើទំហំទឹកប្រាក់ប្រមាណ៧០ម៉ឺនដុល្លារ អាមេរិក នឹងត្រូវតុលាការកំពូលបើកសវនាការជំនុំជម្រះទោសនៅថ្ងៃទី០៣ ខែមិថុនា ឆ្នាំ២០១៦។ ប្រភពបានឲ្យដឹងទៀតថា សវនាការជំនុំជម្រះនោះដឹកនាំដោយលោក ឃឹម ប៉ុណ្ណ អនុប្រធានតុលាការកំពូល និងលោក ឈួន ចាន់ថា ជាតំណាងអយ្យការអមតុលាការកំពូល។ សំណុំរឿងនេះត្រូវមជ្ឈដ្ឋាននានាតាមដានដោយយកចិត្តទុកដាក់ ហើយគេក៏រង់ចាំមើលសំណុំរឿងលោក ឡាយ ម៉ារីវ៉ូ អតីតអគ្គនាយកទូរគមនាគមន៍កម្ពុជាផងដែរ។
មន្ត្រីទូរគមនាគមន៍កម្ពុជា បានឲ្យដឹងថា អង្គភាពប្រឆាំងអំពើពុករលួយ បានចាត់វិធានការខុសគ្នារវាងលោក ចែម សង្វារ និងលោក ឡាយ ម៉ារីវ៉ូ ព្រោះរហូតមកដល់ពេលនេះលោក ឡាយ ម៉ារីវ៉ូ អាចគេចផុតពីវិធានការច្បាប់យ៉ាងសុខស្រួល។ លោក ចែម សង្វារ ត្រូវបានអង្គភាពប្រឆាំងអំពើពុករលួយ ឃាត់ខ្លួនកាលពីថ្ងៃទី០២ ខែឧសភា ឆ្នាំ២០១៤ ជាប់ពាក់ព័ន្ធនឹងអំពើពុករលួយ ចំណែកលោក ឡាយ ម៉ារីវ៉ូ បែរជាគេចផុតពីវិធានការច្បាប់យ៉ាងក្រអឺតក្រទម ៕
