ប្រភពពីមន្ត្រីអាជ្ញាធរឃុំរកាខ្ពស់ និងមន្ត្រីសាលាស្រុកស្អាង បានឲ្យដឹងថា ឧកញ៉ា ខូវ អ៊ុយប៉ាង បានឃុបឃិតជាមួយអាជ្ញាធរស្រុកស្អាង ប្រធានភូមិបាលស្រុក និងមន្ត្រីរដ្ឋបាលជលផលស្រុកស្អាង ក្នុងការទិញលក់ដីបឹងអតីតឡូត៍នេសាទលេខ១ នៅខាងលិចបឹងទឹកជោរាប់រយហិកតា។ ក្រោយពេលទិញរួចឧកញ៉ា ខូវ អ៊ុយប៉ាង បានរត់ការដោយឃុបឃិតជាមួយមន្ត្រីពុករលួយធ្វើប័ណ្ណកម្មសិទ្ធិ កាន់កាប់ដីបឹងអតីតឡូត៍នេសាទលេខ១យ៉ាងរលូន ក្នុងខណៈដែលអភិបាលខេត្តកណ្ដាល លោក ម៉ៅ ភិរុណ ធ្វើមិនដឹងមិនឮអ្វីទាំងអស់។ បន្ទាប់មកឧកញ៉ា ខូវ អ៊ុយប៉ាង បានជួលគ្រឿងចក្ររាប់សិបគ្រឿងជីកនិងកាយអាចមន៍ដីយកទៅចាក់លុបបឹង អតីតឡូត៍នេសាទលេខ១ ពង្រីកបន្ថែមដើម្បីសាងសង់រោងចក្រផលិតទុយោជ័រ១កន្លែងបន្ថែមទៀត។
រឿងរ៉ាវឧកញ៉ា ខូវ អ៊ុយប៉ាង ថៅកែរោងចក្រទុយោខេអេភី(KAP) ចាក់ដីលុបបឹងនៅឃុំរកាខ្ពស់ ស្រុកស្អាង ខេត្តកណ្ដាល ត្រូវបានគេហទំព័រ និងសារព័ត៌មាននានា ចុះផ្សាយជាបន្តបន្ទាប់ ក៏ប៉ុន្តែរហូតមកដល់ពេលនេះលោក ម៉ៅ ភិរុណ អភិបាលខេត្តកណ្ដាល ក៏ដូចជាក្រសួងពាក់ព័ន្ធ ធ្វើមិនដឹងមិនឮអ្វីទាំងអស់។ ប្រការនេះធ្វើឲ្យប្រជាពលរដ្ឋក្នុងឃុំរកាខ្ពស់ ស្រុកស្អាង សង្ស័យថាមន្ត្រីអាជ្ញាធរថា្នក់ស្រុក ថ្នាក់ខេត្ត និងមន្ត្រីជំនាញ ព្រមទាំងក្រសួងពាក់ព័ន្ធទទួលបានផលប្រយោជន៍ពីឧកញ៉ា ខូវ អ៊ុយប៉ាង ទើបបណ្ដោយឲ្យឈ្មួញរូបនេះ ធ្វើអ្វីៗតាមអំពើចិត្ត។ បញ្ហានេះរដ្ឋមន្ត្រីក្រសួងរៀបចំដែនដី គួរពិនិត្យឡើងវិញផងដែរ ព្រោះដីបឹងរាប់រយហិកតានៅឃុំរកាខ្ពស់ ស្រុកស្អាង ត្រូវឧកញ៉ា ខូវ អ៊ុយប៉ាង ទន្ទ្រានកាន់កាប់យកធ្វើជាកម្មសិទ្ធិ ។
មន្ត្រីរាជការសាលាខេត្តកណ្ដាល បានឲ្យដឹងថា ការដែលឧកញ៉ា ខូវ អ៊ុយប៉ាង ថៅកែក្រុមហ៊ុនទុយោខេអេភី ហ៊ានធ្វើអ្វីៗតាមអំពើចិត្តគឺមានការឃុបឃិតជាប្រព័ន្ធពីមន្ត្រី ជំនាញ និងមន្ត្រីអាជ្ញាធរគ្រប់លំដាប់ថ្នាក់។ ហេតុនេះហើយទើបមន្ត្រីអាជ្ញាធរស្រុកស្អាង និងលោក ម៉ៅ ភិរុណ អភិបាលខេត្តកណ្ដាល រក្សាភាពស្ងៀមស្ងាត់បើទោះបីឧកញ៉ា ខូវ អ៊ុយប៉ាង ចាក់ដីលុបប្រឡាយមេទឹក២ខ្សែដែលមានទទឹង៤០ទៅ៥០ម៉ែត្រ និងមានបណ្ដោយរាប់ពាន់ម៉ែត្រយ៉ាងណាក៏ដោយ។ បញ្ហានេះក្រសួងរៀបចំដែនដីនគរូបនីយកម្ម មិនត្រូវបណ្ដែតបណ្ដោយតទៅទៀតទេ ព្រោះដីបឹងអតីតឡូត៍នេសាទលេខ១រាប់រយហិកតា កំពុងធ្លាក់ក្នុងកណ្ដាប់ដៃឧកញ៉ា ខូវ អ៊ុយប៉ាង ។ ចំណែកមន្ត្រីអាជ្ញាធរ និងមន្ត្រីជំនាញកំពុងសប្បាយក្នុងការទទួលផលប្រយោជន៍ ៕
