ប្រជាពលរដ្ឋចង់ឲ្យមន្ត្រីអាជ្ញាធរស្រុក និងមន្ត្រីអាជ្ញាធរខេត្ត បញ្ជាក់ឲ្យច្បាស់ពីរឿងលក់ដីឡូត៍នេសាទលេខ៣នៅក្នុងភូមិទួលក្ដី ឃុំត្រើយស្លា ស្រុកស្អាង។ ជាមួយគ្នានេះប្រជាពលរដ្ឋដែលខ្លាចការគំរាមកំហែងរបស់ក្រុមហ៊ុនឧកញ៉ា ឈាង ប៉ាក់សួ អ្នកខ្លះមិនហ៊ានចូលទៅដាំដំណាំលើដីនោះដូចកាលពីមុនទៀតទេ ហើយដំណាំដែលដាំដុះរួចមួយចំនួនត្រូវខូចខាតអស់គ្មានសល់ ព្រោះតំណាងក្រុមហ៊ុនឧកញ៉ា ឈាង ប៉ាក់សួ បានព្រមានចាប់ពួកគាត់ដាក់គុកច្រវាក់។
រឿងរ៉ាវឧកញ៉ា ឈាង ប៉ាក់សួ ធ្វើបាបប្រជាពលរដ្ឋនៅភូមិទួលក្ដី ហៅពាមសូ ក្នុងឃុំត្រើយស្លា ស្រុកស្អាង ខេត្តកណ្ដាល កំពុងធ្វើឲ្យមានការរិះគន់យ៉ាងខ្លាំង ហើយប្រជាពលរដ្ឋបានអំពាវនាវឲ្យលោក ម៉ៅ ភិរុណ អភិបាលខេត្តកណ្ដាល ជួយដោះស្រាយពួកគាត់ ។ តំណាងប្រជាពលរដ្ឋនៅភូមិទួលក្ដី ឃុំត្រើយស្លា បានសម្ដែងការខឹងសម្បាចំពោះអាជ្ញាធរឃុំត្រើយស្លា និងក្រុមហ៊ុនឧកញ៉ា ឈាង ប៉ាក់សួ ដែលបានធ្វើទុក្ខបុកម្នេញហាមឃាត់មិនឲ្យពួកគាត់ប្រមូលផលដំណាំក្នុង ចម្ការដែលពួកគាត់បានដាំដុះ ព្រោះដំណាំទាំងនោះត្រូវពួកគាត់ចងការលុយពីធនាគារយកមកដាំដុះ បង្កបង្កើនផល។ បញ្ហានេះអាជ្ញាធរស្រុកស្អាង និងអាជ្ញាធរខេត្តកណ្ដាល គួរចាត់វិធានការជួយដោះស្រាយប្រជាពលរដ្ឋរងគ្រោះជាបន្ទាន់។
តាមការអះអាងរបស់ប្រជាពលរដ្ឋរងគ្រោះបានឲ្យដឹងថា ដីធ្លីមានទំនាស់នោះពួកគាត់បានកាប់ឆ្ការអាស្រ័យផលតាំងពីពេល រដ្ឋាភិបាលកាត់ឡូត៍នេសាទមកម្ល៉េះ ស្ថិតនៅក្នុងតំបន់ឡូត៍លេខ៣ ហើយពួកគាត់ដាំដុះដំណាំផ្សេងៗជារៀងរាល់ឆ្នាំ។ ប្រជាពលរដ្ឋរងគ្រោះបានឲ្យដឹងទៀតថា ពួកគាត់គ្មានបំណងកាន់កាប់ដីនោះជាកម្មសិទ្ធិទេ ហើយពេលណារដ្ឋដកហូតយកវិញពួកគាត់យល់ព្រមតាមជាក់ស្ដែង ហើយច្រើនឆ្នាំកន្លងមកនេះពួកគាត់បង្កបង្កើនផលដោយមិនមានមន្ត្រី អាជ្ញាធរណា ឬបុគ្គលណាចូលមកហាមឃាត់ឡើយ។ ទើបតែថ្មីៗនេះស្រាប់តែតំណាងក្រុមហ៊ុនឧកញ៉ា ឈាង ប៉ាក់សួ ឈ្មោះ លាន់ ឡា បានមកអះអាងថាដីនេះជារបស់ឧកញ៉ា ឈាង ប៉ាក់សួ ហើយបានហាមឃាត់មិនឲ្យដាំដុះលើដីនេះបន្តទៀត ព្រមទាំងព្រមានចាប់ដាក់គុកច្រវាក់យ៉ាងកំរោលទៀតផង។
ដោយសារតែទទួលរងនូវការគំរាមកំហែងបែបនេះហើយ ទើបប្រជាពលរដ្ឋសុំអន្តរាគមន៍ពីអាជ្ញាធរស្រុកស្អាង ក៏ដូចជាពីលោក ម៉ៅ ភិរុណ អភិបាលខេត្តកណ្ដាល ឲ្យជួយដោះស្រាយដល់ពួកគាត់ជាបន្ទាន់ដើម្បីកុំឲ្យក្រុមហ៊ុនឧកញ៉ា ឈាង ប៉ាក់សួ មកគំរាមកំហែងពួកគាត់តាមអំពើចិត្តទៀត។ ប្រជាពលរដ្ឋបានលើកឡើងថា ដីនោះជាតំបន់ឡូត៍នេសាទលេខ៣ជាដីរបស់រដ្ឋសម្រាប់ទុកឲ្យពួកគាត់ ប្រកបរបរនេសាទជាលក្ខណៈគ្រួសារ ចុះហេតុអ្វីបានជាក្រុមហ៊ុនឧកញ៉ា ឈាង ប៉ាក់សួ អះអាងថាជាដីកម្មសិទ្ធិរបស់ខ្លួនទៅវិញ។
