ប្រជាសហគមន៍ ការពារព្រៃឈើស្រុកកែវសីមា បានឲ្យដឹងថារយៈពេល ប្រមាណ៣ខែកន្លង ទៅនេះឈ្មួញ នៅតែបន្តសកម្មភាព ដឹកជញ្ជូនឈើឆ្លងកាត់ ស្រុកកែវសីមា យកទៅលក់នៅ ស្រុកយួនតាមច្រករបៀង ង៉ាំយូលិត ដោយគ្មាន ញញើតអ្វីទាំងអស់ ។ ចំណែកសមត្ថកិច្ចពាក់ព័ន្ធ ជាពិសេសមន្ត្រីយោធា និងមន្ត្រីនគរបាលការពារព្រំដែនក្នុងស្រុកកែវសីមា តែងតែបិទបាំងការពិតរឿងឈ្មួញធ្វើសកម្មភាពដឹកជញ្ជូនឈើទៅលក់នៅ ស្រុកយួនយ៉ាងអនាធិបតេយ្យតាមច្រករបៀងង៉ាំយូលិត។ រីឯលោក វង់ សុក្រសិរី នាយខណ្ឌរដ្ឋបាលព្រៃឈើខេត្តមណ្ឌលគិរី និងប្រធានមន្ទីរបរិស្ថានខេត្តនេះ ធ្វើមិនដឹងមិនឮអ្វីទាំងអស់ចំពោះបទល្មើសដឹកឈើទៅលក់នៅស្រុកយួន។ បញ្ហាដែលគួរឲ្យងឿងឆ្ងល់នោះ គឺសមត្ថកិច្ចបានដឹងយ៉ាងច្បាស់ថាឈ្មួញដែលដឹកជញ្ជូនឈើទៅលក់នៅ ស្រុកយួនតាមច្រករបៀងង៉ាំយូលិត ជាមន្ត្រីយោធាឈ្មោះ វ៉ាត ប៉ុន្តែពួកគេមិនចាត់វិធានការបង្ក្រាបឡើយ។
សេចក្ដីរាយការណ៍ពីប្រជាពលរដ្ឋក្នុងឃុំស្រែខ្ទុម ស្រុកកែវសីមា ខេត្តមណ្ឌលគិរី បានឲ្យដឹងថាក្នុងមួយថ្ងៃៗជាពិសេសនៅពេលយប់ឈ្មួញធ្វើសកម្មភាព ដឹកជញ្ជូនឈើទៅលក់នៅស្រុកយួនតាមច្រករបៀងង៉ាំយូលិត តាមរថយន្តមិនតិចជាង៥ទៅ១០គ្រឿងនោះទេ។ ប្រភពបានឲ្យដឹងទៀតថាច្រករបៀងង៉ាំយូលិត ស្រុកកែវសីមា គ្រប់គ្រងដោយលោក ទា ខូវម៉េង មេបញ្ជាការកងអនុសេនាធំលេខ២ និងលោក ប៊ូល សំអុល មេប៉ុស្ដិ៍ឡាបាខេ។ ប្រជាពលរដ្ឋបានរាយការណ៍ថាកាលពីយប់ថ្ងៃទី២៥ឈានចូលថ្ងៃទី២៦ ខែមិថុនា ឆ្នាំ២០១៦ តាមតំបន់ព្រំដែនក្នុងឃុំស្រែខ្ទុម ស្រុកកែវសីមា មានរថយន្តដឹកឈើទៅលក់នៅស្រុកយួនតាមច្រករបៀងង៉ាំយូលិត ជាច្រើនគ្រឿងដោយគ្មានសមត្ថកិច្ចណាចាត់វិធានការទប់ស្កាត់ឡើយ។
សកម្មជនព្រៃឈើនិងប្រជាពលរដ្ឋរស់នៅក្នុងឃុំស្រែខ្ទុម បានឲ្យដឹងទៀតថារថយន្តដឹកឈើប្រណីតនិងឈើប្រភេទលេខ១ទៅលក់នៅ ស្រុកយួនតាមច្រករបៀងង៉ាំយូលិត បានបើកបរឆ្លងកាត់មុខស្នាក់ការរដ្ឋបាលព្រៃឈើស្រុកកែវសីមា មុខស្នាក់ការអភិរក្សជីវៈចម្រុះសីមា មុខស្នាក់ការបរិស្ថានស្រុក និងមុខស្នាក់ការបញ្ជាការការពារព្រំដែន។ ទោះជាយ៉ាងណាសមត្ថកិច្ចពាក់ព័ន្ធដូចរៀបរាប់ខាងលើនេះ មិនចាត់វិធានការបង្ក្រាបក្រុមឈ្មួញដែលដឹកជញ្ជូនឈើទៅលក់នៅស្រុក យួនតាមច្រករបៀងង៉ាំយូលិតនោះទេ ប្រហែលជាខ្លាចបាត់បង់ផលប្រយោជន៍។ ក្នុងនោះលោក ទា ខូវម៉េង មេបញ្ជាការកងអនុសេនាធំលេខ២ និងលោក ប៊ូល សំអុល មេប៉ុស្ដិ៍ឡាបាខេ ត្រូវប្រជាពលរដ្ឋសង្ស័យថា ជាអ្នកទទួលបានផលប្រយោជន៍យ៉ាងច្រើនពីឈ្មួញដឹកឈើ និងបែងចែកទៅថ្នាក់លើតាមលំដាប់លំដោយ៕
