តាមប្រភពពីមន្ត្រីនគរបាលនិងមន្ត្រីរាជការក្នុងខេត្តកោះកុង បានឲ្យដឹងថាច្រើនឆ្នាំកន្លងទៅនេះចែរតនៈ ដែលអាងប្ដីរបស់ខ្លួនជាខ្នងបង្អែកបានធ្វើសកម្មភាពនាំចូល ទំនិញគេចពន្ធ ទំនិញបង់ពន្ធមិនគ្រប់ពីទឹកដីសៀមកាន់តែច្រើនឡើងៗ ធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុង មួយខែៗ។ ប្រភពបានឲ្យដឹងទៀតថា មន្ត្រីគយ និងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃឈរជើងនៅខេត្តកោះកុង មិនហ៊ានប៉ះពាល់ចែរតនៈ ទេព្រោះខ្លាចខាតបង់ប្រភពចំណូលរបស់ខ្លួន ហើយពួកគេមានតែឃុបឃិតជួយបិទបាំងមុខជំនួញរបស់ចែរតនៈទៀតផង។ បញ្ហានេះលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករ ក៏ដូចជាលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ គួរពិនិត្យមើលខ្លះផង ព្រោះករណីចែរតនៈ នាំទំនិញគេចពន្ធពីទឹកដីសៀមចូលតាមខេត្តកោះកុង ធ្វើឲ្យរដ្ឋខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ ។
កេរ្ដិ៍ឈ្មោះរបស់លោក យឹម ផេង ស្នងការនគរបាលខេត្តកោះកុង ទទួលបន្ទុកផ្នែកបង្ក្រាបបទល្មើសសេដ្ឋកិច្ច កំពុងល្បីល្បាញកាន់តែខ្លាំងមួយរយៈពេលចុងក្រោយនេះ ដែលប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ មិនគួរមើលរំលងនោះទេ។ ភាពល្បីល្បាញរបស់លោក យឹម ផេង មិនមែនកើតឡើងដោយសារគាត់មានស្នាដៃក្នុងការបង្ក្រាបបទល្មើស សេដ្ឋកិច្ចឡើយ ផ្ទុយទៅវិញគឺគាត់ល្បីខាងធ្វើជាខ្នងបង្អែកឲ្យប្រពន្ធនាំចូល ទំនិញគេចពន្ធស្រេចតែអំពើចិត្ត។ មានការសង្ស័យថាស្នងការនគរបាលខេត្តកោះកុង ទទួលបានផលប្រយោជន៍ពីបទល្មើសនាំចូលទំនិញគេចពន្ធ របស់ភរិយាលោក យឹម ផេង ។
មន្ត្រីរាជការនិងប្រជាពលរដ្ឋក្នុងខេត្តកោះកុង បានឲ្យដឹងថាអ្នកស្រី ពែក រតនៈ ហៅចែរតនៈ បច្ចុប្បន្ននេះនៅតែបន្តនាំទំនិញគេចពន្ធពីប្រទេសសៀមទាំងតាមផ្លូវ ទឹកនិងផ្លូវគោកចូលខេត្តកោះកុង យ៉ាងពេញបន្ទុកដោយគ្មានសមត្ថកិច្ចណាបង្ក្រាបឡើយ។ ប្រភពបានឲ្យដឹងទៀតថា ទាំងសមត្ថកិច្ចគយនិងនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ដែលឈរជើងនៅខេត្តកោះកុង សុទ្ធតែរក្សាភាពស្ងៀមស្ងាត់ចំពោះបទល្មើសនាំចូលទំនិញគេចពន្ធរបស់ចែ រតនៈ ភរិយាលោក យឹម ផេង ស្នងការរងនគរបាលខេត្តកោះកុង។ ការដែលអ្នកស្រី ពែក រតនៈ ហ៊ានធ្វើអ្វីៗតាមអំពើចិត្តបែបនេះ គឺដោយសារអាងអំណាចប្ដីរបស់ខ្លួនជាមន្ត្រីនគរបាលជាន់ខ្ពស់ ខេត្តកោះកុង ហើយមានទំនាក់ទំនងជាមួយសមត្ថកិច្ចជាច្រើនស្ថាប័ន។
