បន្ទាយមានជ័យ៖ តាមដំណឹងច្រំដែលៗថា ច្រករបៀងគ្រប់គ្រងដោយលោក សូ ចាន់ណារី មេបញ្ជាការនគរបាល វរៈការពារព្រំដែនលេខ ៩១១ បាននិងកំពុងកើតមាន បទល្មើសការនាំចូល ទំនិញគេចពន្ធ និងទំនិញខុសច្បាប់ ព្រមទាំងការបើកដៃ ឲ្យពលករខ្មែរ ឆ្លងដែនខុសច្បាប់ ចូលទឹកដីថៃ ស្ទើររាល់យប់ថ្ងៃ បន្តមកដល់សម័យ លោកឧត្តមសេនីយ៍ អាត់ ខែម ត្រូវបានថ្នាក់លើ តែងតាំងឲ្យធ្វើជា ស្នងការនគរបាល ខេត្តបន្ទាយមានជ័យ ដែលដោះដូរចៅហ្វាយខេត្ត ២-៣ ដងកន្លងមកហើយនេះ ។
យោងតាមប្រភពព័ត៌មាន ពីបងប្អូនប្រជាពលរដ្ឋ រស់នៅក្បែរព្រំដែនខ្មែរ-ថៃ និងកូនចៅមន្ត្រីៗ ប៉ូលិសតូចតាចមួយចំនួន បាននិយាយប្រាប់ថា ក្រោយពីឯកឧត្តម នាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដកមុខតំណែងលោក ឈូក អាង ពីតួនាទីជាមេបញ្ជាការ នគរបាលវរៈសេនាតូច ការពារព្រំដែនគោកលេខ ៩១១ ដោយតែងតាំងលោក សូ ចាន់ណារី ឲ្យឡើងធ្វើជា មេបញ្ជាការថ្មី មកដល់ពេលនេះ បាននិងកំពុងធ្វើឲ្យ កើតមានបទល្មើសជាច្រើន នៅក្នុងភូមិសាស្ត្រនោះ ។
បទល្មើសដែលត្រូវគេរិះគន់ថា វាបាននិងកំពុងកើតឡើង យ៉ាងអនាធិបតេយ្យ ដោយសារតែទង្វើ អសមត្ថភាពរបស់ សូ ចាន់ណារី ខ្វះភាពជាមេដឹកនាំ និងដោយសារតែការ ឃុបឃិតគ្នាជាប្រព័ន្ធ ដើម្បីឆ្លៀតឱកាសស្វែងរក ប្រយោជន៍ផ្ទាល់ខ្លួន និងបក្ខពួកនោះ មានដូចជាបទល្មើស ការបណ្ដោយឲ្យមាន ការហូរចេញ-ចូល នូវទំនិញគេចពន្ធ និងពលករចំណាកស្រុក ស្ទើររៀងរាល់ថ្ងៃ ។ លើសពីនេះ ក៍កើតមានការបើកដៃ ឲ្យជនបរទេស(ថៃ) តែងនាំគ្នាឆ្លងដែន ខុសច្បាប់ទាំងហ្វូងៗ ចូលមកលេងល្បែងស៊ីសង នៅកាស៊ីណូមួយចំនួន នៅក្រុងប៉ោយប៉ែត ដោយគ្មានការត្រួតពិនិត្យ ល្អិតល្អន់ទៀតផង ។
បងប្អូនប្រជាពលរដ្ឋ និងមន្ត្រីៗប៉ូលិស តូចតាចមួយចំនួន បាននិយាយប្រាប់ថា ទោះយ៉ាងណា កាលពីជំនាន់លោក ឈូក អាង នៅធ្វើជាមេបញ្ជាការ នគរបាលវរៈសេនាតូច ការពារព្រំដែនគោកលេខ៩១១នោះ មិនសូវកើតមានបទល្មើស ច្រើនដូចខាងលើនេះទេ ។ តែសព្វថ្ងៃ ក្នុងសម័យលោក សូ ចាន់ណារី ធ្វើជាមេបញ្ជាការថ្មីនេះ បែរជាកើតមានបទល្មើស នៅតាមច្រករបៀងប្រមាណ ១០កន្លែងឯណោះ ចាប់ពីចំណុចឈរជើង របស់នគរបាល វរៈសេនាតូចការពារ ព្រំដែនគោក៩១១ នៅស្នាក់ការការិយាល័យ ទំនាក់ទំនងព្រំដែនកម្ពុជា-ថៃចាស់ រហូតមកទល់នឹងតំបន់ប្រាំ, ចំការគរ និងអូរបីជាន់ ។
ប្រភពបាន បញ្ជាក់ថា ក្នុងចំណោមច្រករបៀងទាំងនោះ មានតែច្រកបឹងស្រគូមួយគត់ ដែលជាច្រករបៀងដ៍សំខាន់មួយ កើតមានបទល្មើសច្រើនជាងគេ ។ ក្រៅពីពួកគេអនុញ្ញាត ឱ្យមានការធ្វើចំណាកស្រុក ដោយខុសច្បាប់ ស្ទើររាប់មិនអស់ របស់ពលករខ្មែរ ចូលទៅរកការងារធ្វើ នៅប្រទេសថៃ គឺពួកគេក៍មានការឃុបឃិតគ្នា បណ្ដោយឲ្យមានការហូរចូល – ហៀរចេញ នូវទំនិញគេចពន្ធ ជាច្រើនប្រភេទដូចជា ការនាំចូលពីថៃនូវ ទំនិញហ្គាសគេចពន្ធ យកមកចែកចាយលក់ នៅខេត្ដបន្ទាយមានជ័យ និងការនាំចេញនូវស្រូវ-អង្ករ ព្រមទាំងខោអាវគីបទាំងរថយន្តៗ ពីកម្ពុជាទៅថៃ ស្ទើរាល់យប់ថ្ងៃជាដើម ។ ក្នុងនោះក៍ធ្លាប់ឮថា មានការលួចដឹកឈើប្រណីត តាមច្រករបៀង មួយចំនួនផងដែរ… ប៉ុន្តែរាល់ព័ត៌មាន អាស្រូវទាំងនោះ គេតែងតែធ្លាប់ឮលោក សូ ចាន់ណារី និយាយការពារខ្លួនឯងថា …វាមិនមែនជាការពិតទេ… ។
តាមប្រភពពីកូនប៉ូលិស ថ្នាក់ក្រោមភាគច្រើន បានឱ្យដឹងទៀតថា ប៉ូលិសវរៈសេនាតូច ការពារព្រំដែនគោក៩១១ ស្ថិតនៅក្រោមការ គ្រប់គ្រងរបស់លោក សូ ចាន់ណារី សព្វថ្ងៃនេះ ខុសគ្នាឆ្ងាយណាស់ ពីកាលជំនាន់គ្រប់គ្រង ដឹកនាំដោយលោក ឈូក អាង ជាមេបញ្ជាការ ។ ព្រោះថា មេបញ្ជាការថ្មី សូ ចាន់ណារី គិតតែពីរឿងរកលុយ ដោយមិនសូវខ្វល់ខ្វាយ ពីកិត្តិយសរបស់មេៗថ្នាក់លើ ឬក៍អង្គភាពផ្ទាល់ខ្លួន និងសុខទុក្ខរបស់កូនចៅ ថ្នាក់ក្រោមៗដូចលោក ឈូក អាង នោះឡើយ ហើយគាត់ (សូ ចាន់ណារី ) ក៍មិនសូវមានបទពិសោធន៍ ឬជំនាញពិតប្រាកដ ក្នុងការដឹកនាំការងារ ការពារព្រំដែននោះដែរ គឺបានតែពូកែ… ជាមួយខ្មែរតូចតាច គ្នាឯងប៉ុណ្ណោះ ។
ផ្ទុយទៅវិញ ប្រជាពលរដ្ឋ និងកូនប៉ូលិសក្រោមឱវាទ បាននិយាយថា លោក សូ ចាន់ណារី ធ្លាប់មានតែជំនាញ ប៉ិនប្រសប់ក្នុងការរកស៊ី បើកហាងដូរលុយ និងវេរលុយ ដែលមានសាខាធំ នៅក្រុងប៉ោយប៉ែត ព្រមទាំងបច្ចុប្បន្ន មានជំនាញតែខាង ដាក់បញ្ជាឱ្យមន្ត្រីៗ នៅក្រោមបញ្ជារបស់ខ្លួន ត្រូវធ្វើយ៉ាងណារកលុយ ឲ្យបានច្រើនពីប៉ុស្តិ៍ ច្រករបៀងទាំង ៩ កន្លែងនោះ ។ ដែលបញ្ហានេះ ថ្នាក់លើៗត្រូវតែ ធ្វើការពិចារណា ក្នុងការសម្រេចចិត្ត ដកហូតមុខតំណែង លោកមេបញ្ជាការ សូ ចាន់ណារី និងមេបញ្ជាការរង សួង សៅ ដើម្បីដាក់មន្ត្រីល្អៗជំនួសវិញ ទើបជាការល្អប្រសើរ សក្ដិសមជាសម័យ កែទម្រង់ស៊ីជម្រៅ ក្រោមការដឹកនាំដ៍ឈ្លាសវៃ របស់សម្ដេចតេជោ នាយករដ្ឋមន្ត្រី ហ៊ុន សែន ប្រកបដោយគតិបណ្ឌិត នៃកម្ពុជាយើង ។
ព័ត៌មានថ្មីផ្សេងពីនេះ កាលពីថ្ងៃទី០៧ ខែមិថុនា ឆ្នាំ២០១៦ វិទ្យុអាស៊ីសេរី បានបង្ហោះផ្សាយ នៅវេបសាយរបស់ខ្លួន នូវអត្ថបទមួយ មានចំណងជើងថា «ពលរដ្ឋ ៥៤គ្រួសារ នៅក្រុងប៉ោយប៉ែត ចោទប៉ូលិសព្រំដែនថា មិនឲ្យសង់ផ្ទះថ្មី នៅទីតាំងចាស់» ដែលមានខ្លឹមសារដើម ទាំងស្រុងដូចខាងក្រោម ៖
ប្រជាពលរដ្ឋរស់នៅ ជាប់ព្រំដែនកម្ពុជា-ថៃ នៃក្រុងប៉ោយប៉ែត ខេត្តបន្ទាយមានជ័យ ចំនួន ៥៤គ្រួសារ ចោទប្រកាន់មេបញ្ជាការ នគរបាលវរការពារ ព្រំដែនលេខ ៩១១ ថា បានរារាំងមិនឲ្យពួកគាត់ សង់ផ្ទះនៅលើដី រស់នៅតាមព្រំដែន។ ការចោទប្រកាន់នេះ ធ្វើឡើងបន្ទាប់ពី ប្រជាពលរដ្ឋចំនួន ៣គ្រួសារ បានរើផ្ទះចាស់ សង់ថ្មី តែត្រូវបានមន្ត្រី នគរបាលការពារព្រំដែន ហាមឃាត់មិនឲ្យសាងសង់។ ប្រជាពលរដ្ឋ នៅក្រុងប៉ោយប៉ែត សម្ដែងការមិនពេញចិត្ត នឹងទង្វើរបស់មេបញ្ជាការ នគរបាលការពារ ព្រំដែនវរលេខ ៩១១ ចំណុះឲ្យស្នងការដ្ឋាន នគរបាលខេត្ត បន្ទាយមានជ័យថា ហាមឃាត់មិនឲ្យ ពួកគាត់សង់ផ្ទះ ដោយមិនគិតពីទុក្ខលំបាក របស់ពលរដ្ឋក្រីក្រឡើយ។
តំណាងពលរដ្ឋម្នាក់ លោក មាស ច័ន្ទតារា ឲ្យដឹងនៅថ្ងៃទី៦ មិថុនាថា មេបញ្ជាការនគរបាល វរការពារព្រំដែនលេខ ៩១១ ប្រចាំការនៅព្រំដែន ក្រុងប៉ោយប៉ែត បានហាមឃាត់ ប្រជាពលរដ្ឋចំនួន ៣គ្រួសារ ក្នុងចំណោម ៥៤គ្រួសារ រស់នៅភូមិសាមគ្គីមានជ័យ សង្កាត់ប៉ោយប៉ែត មិនឲ្យសាងសង់ផ្ទះ ស្នាក់នៅលើដីកម្មសិទ្ធិ របស់ខ្លួនឡើយ។ លោកអះអាងថា ពួកគាត់បានរុះរើផ្ទះចាស់ ចេញអស់ទៅហើយ ដើម្បីសង់ផ្ទះថ្មី នៅលើដីទីតាំងដើម ដោយពុំបានទៅរំលោភ លើដីរបស់រដ្ឋនោះទេ។ លោកបន្ថែមថា ពួកគាត់កំពុងព្រួយបារម្ភ ខ្លាចគ្មានជម្រក ស្នាក់នៅក្នុងរដូវវស្សា ខាងមុខនេះ ៖ «គេថា មិនឲ្យពួកខ្ញុំ សាងសង់តែម្ដង បើទោះយើងទៅសុំច្បាប់ដល់ណា ក៏គេមិនឲ្យដែរ។ ហើយពួកខ្ញុំ ក៏បានទៅសុំច្បាប់ មន្ត្រីសាលាសង្កាត់ និងសាលាក្រុងប៉ោយប៉ែត គេឲ្យសាងសង់បាន ប៉ុន្តែប៉ូលិស នៅតែរារាំងទៀត»។
ឆ្លើយតបនឹងបញ្ហានេះ មេបញ្ជាការនគរបាល ការពារព្រំដែនវរលេខ ៩១១ លោក សូ ចាន់ណារី មានប្រសាសន៍ទទួលស្គាល់ថា លោកពិតជាបានបញ្ជា ឲ្យមន្ត្រីក្រោមឱវាទ ហាមឃាត់ពលរដ្ឋសង់ផ្ទះ ប្រាកដមែន។ លោកអះអាងថា មូលហេតុដែលហាមឃាត់នេះ ដោយសារប្រជាពលរដ្ឋ សង់ផ្ទះរំលោភលើដី ចំណីផ្លូវសាធារណៈ និងកៀកព្រំដែន តំបន់ហាមឃាត់ សាងសង់សំណង់រឹងមាំ ដែលប៉ះពាល់ដល់ការ ធ្វើដំណើររបស់អ្នកស្រុក នៅពេលខាងមុខ៖ «ហើយ ជាទូទៅព្រំដែនយើង មិនទាន់កំណត់ថា យ៉ាងម៉េចយ៉ាងណាទេ។ យើងបានជជែករឿងនេះ នៅក្នុងកិច្ចព្រមព្រៀងឆ្នាំ ២០០០ ភាគីខ្មែរ និងថៃ មិនអនុញ្ញាតឲ្យសង់ សំណង់រឹងមាំនៅតាមព្រំដែន មិនទាន់មានការ កំណត់ច្បាស់ទេ។ អ៊ីចឹងបាទ ! »។
ប្រជាពលរដ្ឋអះអាងថា ពួកគាត់មិនបានសង់ផ្ទះ រំលោភដីផ្លូវសាធារណៈ ដូចការលើកឡើង របស់សមត្ថកិច្ចឡើយ។ មន្ត្រីសម្របសម្រួល អង្គការលីកាដូ (LICADHO) ខេត្តបន្ទាយមានជ័យ លោក ភួន ឈិន មានប្រសាសន៍ថា ប្រជាពលរដ្ឋរស់នៅ តាមខ្សែបន្ទាត់ព្រំដែន ជារឿងល្អ ពីព្រោះអាចជួយធ្វើជារនាំង ការពារទឹកដីបាន យ៉ាងមានប្រសិទ្ធភាព។ លោកបញ្ជាក់ថា អាជ្ញាធរមូលដ្ឋាន និងសមត្ថកិច្ចពាក់ព័ន្ធ គួរសិក្សាឲ្យបានច្បាស់លាស់ មុននឹងហាមឃាត់
ពលរដ្ឋមិនឲ្យសង់ផ្ទះ ដើម្បីកុំឲ្យពួកគាត់ ជួបការលំបាក ដោយសារគ្មាន ទីជម្រកស្នាក់នៅ៖ « បើសិនជាប៉ូលិស និយាយការសាងសង់ ផ្ទះរបស់ពួកគាត់ វាប៉ះពាល់ខ្សែបន្ទាត់ព្រំដែន។ ចុះហេតុអីគាត់ មិនធៀបជាមួយ ក្រុមកាស៊ីណូផង? ហេតុអីកាស៊ីណូ សង់អគារបាន? ចំណែកប្រជាពលរដ្ឋក្រីក្រ សង់ផ្ទះមិនបាន?»។
ប្រជាពលរដ្ឋទាំង ៥៤គ្រួសារ រស់នៅជាប់អូរ ព្រំដែនកម្ពុជា-ថៃ និងមានចម្ងាយប្រមាណ ៤៥០ម៉ែត្រ ពីកាស៊ីណូ និងកៀករបង ក្រុមហ៊ុនហ្គោលឌិនក្រោន (Golden Grown) របស់លោកឧកញ៉ា កុក អាន នៅក្រុងប៉ោយប៉ែត ខេត្តបន្ទាយមានជ័យ ៕
