ប្រជាពលរដ្ឋក្នុងខេត្តបាត់ដំបងបានរាយការណ៏ឲ្យដឹងថា ល្បែងស៊ីសង គ្រឿងញៀន និងបទល្មើសផ្សេងៗទៀតនៅតែបន្តកើតឡើងយ៉ាងខ្លាំងនៅខេត្តបាត់តំបង។ នៅតាមបណ្ដាសង្កាត់មួយចំនួន ល្បែងស៊ីសងដូចជា កន្ទុយលេខ ភ្នាល់បាល់ទាត់ បញ្ជល់មាន់ បៀអាប៉ោង ភ្នាល់ទឹកភ្លៀង កំពុងរាលដាលកាន់តែខ្លាំងឡើងៗ ខណៈលោក ប៉ាង ហៀង អធិការនគរបាលក្រុងបាត់ដំបង និងអភិបាលក្រុងបាត់ដំបងក៏ចៅហ្វាយខេត្តទទួលបានប្រយោជន៏យ៉ាងក្រាស់ក្រែល។
សេចក្ដីរាយការណ៍ពីប្រជាពលរដ្ឋ ក្រុងបាត់ដំបង បានឲ្យដឹងថានៅក្នុងមូលដ្ឋានរបស់ពួកគាត់មានគេបើកលេងល្បែងបៀ អាប៉ោង និងកន្ទុយលេខយ៉ាងពេញបន្ទុក ហើយមិនឃើញនគរបាលសង្កាត់ និងនគរបាលក្រុង ចាត់វិធានការបង្ក្រាបឲ្យស្របទៅតាមគោលនយោបាយភូមិ-ឃុំ មានសុវត្ថិភាពទាំង៩ចំណុចនោះទេ។ ចំណែកលោក ប៉ាង ហៀង អធិការនគរបាលក្រុងបាត់ដំបង ដែលប្ដេជ្ញាពង្រឹងសន្តិសុខសង្គមឲ្យបានប្រសើរជាងមុននោះ ការពិតមិនយកចិត្តទុកដាក់ពង្រឹងសន្តិសុខសង្គមតាមតួនាទីរបស់ខ្លួនឡើយ ។
ជុំវិញល្បែងស៊ីសងដែលកំពុងរាលដាលយ៉ាងពេញបន្ទុកនៅក្នុងក្រុង បាត់ដំបងនេះ ប្រជាពលរដ្ឋបានរិះគន់ខ្លាំងៗទៅលើអធិការនគរបាល និងអភិបាលក្រុងបាត់ដំបងលោកសថេតនិងលោកច័ន្ទសុផលចៅហ្វាយខេត្ត ដែលមិនយកចិត្តទុកដាក់ពង្រឹងសន្តិសុខសង្គម ហើយបណ្ដែតបណ្ដោយឲ្យបទល្មើសរាលដាលកាន់តែខ្លាំងឡើងៗពីមួយថ្ងៃ ទៅមួយថ្ងៃ។ ប្រជាពលរដ្ឋបានលើកឡើងថា ដោយសារល្បែងបៀអាប៉ោង បញ្ជល់មាន់ កន្ទុយលេខ ល្បែងភ្នាល់តាមប្រព័ន្ធអន់ឡាញ និងល្បែងភ្នាល់ទឹកភ្លៀង រាលដាលកាន់តែខ្លាំងឡើងៗទើបធ្វើឲ្យកើតមានអំពើចោរកម្មលួចប្លន់ អំពើហិង្សាក្នុងគ្រួសារ អំពើពាលាអាវាសែ និងបទល្មើសជាច្រើនទៀត។
សូមរំលឹកផងដែរថាសម្ដេចនាយករដ្ឋមន្ត្រីតេជោ ហ៊ុន សែន បានសរសើរ និងលើកពីគុណសម្បត្តិលោក ច័ន្ទ សុផល អភិបាលខេត្តបាត់ដំបងកាលពីព្រឹកថ្ងៃទី២១កក្កដាឆ្នាំ២០១៦ ដោយសម្ដេចចាត់ទុកថា ជាថ្នាក់ដឹកនាំខេត្តដ៏ល្អនិងអនុវត្តការងារដែលបម្រើ
ផលប្រយោជន៍ ប្រជាពលរដ្ឋយ៉ាងពិតប្រាកដ។ ថ្លែងចំពោះមុខមន្ត្រីបក្សនៅសាលាខេត្ត ប្រមុខរាជរដ្ឋាភិបាលកម្ពុជា បានបន្ថែមថា បើសិនជាមានអភិបាលខេត្ត មានអភិបាលស្រុក អភិបាលក្រុង អភិបាលខណ្ឌល្អនោះ ការដោះស្រាយបញ្ហាប្រជាពលរដ្ឋនឹងប្រព្រឹត្តទៅបានល្អ ដោយមិនចាំបាច់នាំការអំពុលទុក្ខ ដល់នាយករដ្ឋមន្ត្រី «ឈឺក្បាល»ឡើយ។ក្រោយពីការសសើត្រូវបានចេញផ្សាយតាមបណ្តាញឃោសនា ធ្វើឲ្យប្រជាពលរដ្ឋលើកខេត្តបាត់ដំបងសើចហើយលើកជាសំណួរថា៖តើ សម្តេចហ៊ុនសែនមានដឹងថានៅក្នុងអាណាចក្របើកល្បែងស៊ីសងខុសច្បាប់ផ្ទុយ ពីគោលនយោបាយភូមិឃុំមានសុវត្ថភាពដែរអត់?។ សារពត៌មានយើងរង់ចាំបកស្រាយរាល់ម៉ោងធើ្វការដើម្បីឲ្យពត៌មានកាន់តែសុក្រិត្យ៕
