សេចក្ដីរាយការណ៍ពីប្រជាពលរដ្ឋរស់នៅក្បែរច្រកទ្វារអន្តរជាតិចាំ យាមបានឲ្យដឹងថា កាលពីព្រឹកថ្ងៃទី១៤ ខែកញ្ញា ឆ្នាំ២០១៦ មានក្រុមឈ្មួញដឹកសាច់មាន់ ស្លាបមាន់ ជង្គង់មាន់ កោះមាន់ ថ្លើមមាន់ តាមរទេះពីទឹកដីសៀមចូលទឹកដីខ្មែរយ៉ាងរលូន ពុំមានមន្ត្រីកាំកុងត្រូលនិងសមត្ថកិច្ចពាក់ព័ន្ធចាត់វិធានការ ទប់ស្កាត់នោះទេ។ មានការរិះគន់ចំៗថា មន្ត្រីកាំកុងត្រូល និងសមត្ថកិច្ចពាក់ព័ន្ធដទៃទៀត ចាត់ទុកបទល្មើសនាំចូលទំនិញខូចគុណភាពហួសកាលកំណត់ប្រើប្រាស់ និងគ្រឿងឧបភោគបរិភោគមានលាយសារធាតុគីមី គឺជាប្រភពចំណូលដ៏សំខាន់របស់ពួកគេ ទើបពួកគេមិនចាត់វិធានការទប់ស្កាត់ទាល់តែសោះ។ ការដែលឈ្មួញនាំចូលគ្រឿងឧបភោគបរិភោគខូចគុណភាពមកចែកចាយក្នុងទីផ្សារ ប្រទេសកម្ពុជា គឺជាការបំផ្លាញសុខភាពពលរដ្ឋខ្មែរ ដូច្នេះក្រសួងនិងស្ថាប័នពាក់ព័ន្ធ មិនគួរបណ្ដែតបណ្ដោយតទៅទៀតឡើយ។
ប្រជាពលរដ្ឋនៅខេត្តកោះកុង បានឲ្យដឹងថា បច្ចុប្បន្នទំនិញខូចគុណភាពជាច្រើនប្រភេទ ជាពិសេសគ្រឿងឧបភោគបរិភោគហួសកាលកំណត់ប្រើប្រាស់ ឬមានលាយសារធាតុគីមីដូចជា សាច់មាន់ ឆ្អឹងមាន់ ជង្គង់មាន់ និងប្រហិតជាដើម ត្រូវឈ្មួញបន្តនាំចូលរាប់សិបតោនក្នុងមួយថ្ងៃៗ។ ប្រភពបានឲ្យដឹងទៀតថា ការដែលឈ្មួញអាចនាំចូលទំនិញដូចខាងលើនេះតាមអំពើចិត្ត គឺមានការឃុបឃិតពីសំណាក់មន្ត្រីកាំកុងត្រូល ឈ្មោះ ជា នី និងសមត្ថកិច្ចពាក់ព័ន្ធដទៃទៀតផងដែរ ទើបអ្វីអាចប្រព្រឹត្តទៅដោយរលូន។ ដូច្នេះលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូលក្រសួងពាណិជ្ជកម្ម គួរពិនិត្យមើលអំពើពុករលួយ និងភាពអសកម្មរបស់មន្ត្រីកាំកុងត្រូលប្រចាំច្រកចាំយាម ជាបន្ទាន់កុំឲ្យធ្វើអ្វីៗតាមអំពើចិត្តទៀត។
សមត្ថកិច្ចពាក់ព័ន្ធនិងមន្ត្រីរាជការក្នុងខេត្តកោះកុង ក៏បានឲ្យដឹងដែរថាគ្រឿងឧបភោគបរិភោគខូចគុណភាពនិងមានលាយសារ ធាតុគីមីត្រូវបានឈ្មួញនាំចូលនិងចែកចាយពេញទីផ្សារក្នុងខេត្តកោះកុង និងដឹកជញ្ជូនទៅដល់រាជធានីភ្នំពេញផងដែរ ដោយពុំមានមន្ត្រីជំនាញនិងសមត្ថកិច្ចចាត់វិធានការបង្ក្រាបឡើយ។ ឈ្មួញមួយចំនួនដែលរកស៊ីនាំចូលប្រភេទទំនិញដូចខាងលើបានអះអាងថា ពួកគេបង់លុយឲ្យមន្ត្រីកាំកុងត្រូល និងសមត្ថកិច្ចជាច្រើនស្ថាប័នទៀត ទើបអាចនាំចូលទំនិញជាគ្រឿងឧបភោគបរិភោគតាមច្រកអន្តរជាតិចាំយាម មកចែកចាយក្នុងទីផ្សារខេត្តកោះកុង និងទីផ្សារបណ្ដាខេត្តនានា។
