សេចក្ដីរាយការណ៍ពីប្រជាពលរដ្ឋនៅភូមិឡំ ឃុំប៉ក់ញ៉ៃ ស្រុកអូរយ៉ាដាវ បានឲ្យដឹងថា បើទោះបីមានភ្លៀងធ្លាក់ខ្លាំងយ៉ាងណាក៏ដោយ ក៏ឈ្មួញនៅតែដឹកជញ្ជូនឈើឆ្លងកាត់មូលដ្ឋានពួកគាត់យកទៅលក់ឲ្យឈ្មួញ យួនតាមច្រករបៀងដូចមុនដដែល ធ្វើឲ្យខូចផ្លូវលំរបស់សហគមន៍ពិបាកធ្វើដំណើរ។ សេចក្ដីរាយការណ៍បានឲ្យដឹងទៀតថា កាលពីរំលងអធ្រាត្រឈានចូលថ្ងៃទី១៨ ខែសីហា ឆ្នាំ២០១៦ មានរថយន្តទេសចរណ៍តូចៗជាច្រើនគ្រឿង និងរថយន្តធុនធំត្រូវឈ្មួញប្រើប្រាស់ដើម្បីដឹកជញ្ជូនឈើទៅលក់នៅ ស្រុកយួនតាមច្រករបៀងប៉ុស្ដិ៍នគរបាលការពារព្រំដែនភូមិឡំ។ សហគមន៍ការពារព្រៃឈើនៅភូមិឡំ ឃុំប៉ក់ញ៉ៃ មិនអាចទប់ស្កាត់បានទេ ហើយបានត្រឹមតែរាយការណ៍ទៅមន្ត្រីអាជ្ញាធរ មន្ត្រីជំនាញ និងសមត្ថកិច្ចពាក់ព័ន្ធ ប៉ុន្តែសេចក្ដីរាយការណ៍របស់ពួកគាត់ពុំមានប្រយោជន៍ ។
ទោះបីនៅក្នុងរដូវវស្សាមានភ្លៀងធ្លាក់ជោកជាំមានបញ្ហាលំបាក ក្នុងការដឹកជញ្ជូនឈើពីស្រុកវ៉ើនសៃ ស្រុកលំផាត់ និងស្រុកកូនមុំ ឆ្លងកាត់ស្រុកអូរយ៉ាដាវ យកទៅលក់នៅស្រុកយួនតាមច្រករបៀងយ៉ាងណាក៏ដោយ ក៏ក្រុមឈ្មួញនៅតែបន្តសកម្មភាពយ៉ាងពេញបន្ទុកគ្មានញញើតអ្វីទាំងអស់ ។ ចំណែកលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី និងមន្ត្រីរដ្ឋបាលព្រៃឈើក្នុងស្រុកអូរយ៉ាដាវ គិតតែពីរឿងប្រមូលលុយចែកគ្នាធ្វើមានធ្វើបានយ៉ាងសម្បាយ ហើយបណ្ដោយឲ្យបទល្មើសកាប់ឈើនិងដឹកជញ្ជូនឈើខុសច្បាប់បន្តកើតឡើង យ៉ាងគគ្រឹកគគ្រេង។ បញ្ហានេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ដែលប្ដេជ្ញាលុបបំបាត់បទល្មើសព្រៃឈើប្រកបដោយប្រសិទ្ធភាពនោះ គួរទប់ស្កាត់កុំឲ្យឈ្មួញដឹកជញ្ជូនឈើទៅលក់នៅស្រុកយួនតទៅទៀត។
តំណាងសហគមន៍ភូមិឡំ ឃុំប៉ក់ញ៉ៃ បានឲ្យដឹងថា ជាច្រើនឆ្នាំមកហើយដែលឈ្មួញដឹកជញ្ជូនឈើឆ្លងកាត់មូលដ្ឋានរបស់ ពួកគាត់ទៅលក់ឲ្យឈ្មួញយួនតាមច្រករបៀងជាប់តំបន់ព្រំដែនស្រុកដាក់ កឺ ខេត្តយ៉ាឡាយ ប្រទេសយួន ហើយសមត្ថកិច្ចការពារព្រំដែននិងមន្ត្រីជំនាញឃុបឃិតគ្នាទទួលផល ប្រយោជន៍ពីឈ្មួញយ៉ាងសុខស្រួល។ ជាក់ស្ដែងថ្មីៗកន្លងទៅនេះឈ្មួញមួយចំនួនកំពុងបង្កើនសកម្មភាព ដឹកជញ្ជូនឈើទៅលក់ឲ្យឈ្មួញយួនតាមច្រករបៀងជាច្រើនកន្លែងក្នុងស្រុក អូរយ៉ាដាវ ដោយមិនឃើញលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី និងមន្ត្រីក្រោមឱវាទ ចាត់វិធានការបង្ក្រាបឡើយ។ មានន័យថាវិធានការរបស់លោកនាយករដ្ឋមន្ត្រី ហ៊ុន សែន ក្នុងការទប់ស្កាត់បទល្មើសរត់ពន្ធឈើប្រណីតទៅស្រុកយួន គឺជារឿងឥតន័យព្រោះឈ្មួញនៅតែអាចឃុបឃិតជាមួយសមត្ថកិច្ចពុករលួយ ហើយដឹកជញ្ជូនឈើទៅលក់នៅស្រុកយួន៕
