ប្រភពពីមន្ត្រីអង្គការក្រៅរដ្ឋាភិបាលបានរិះគន់ថា លោក ធឹម វិចិត្រ មន្ត្រីបរិស្ថានការពារតំបន់ដែនជម្រកសត្វព្រៃលំផាត់ គឺជាអ្នកជាប់ពាក់ព័ន្ធនឹងការបើកដៃឲ្យឈ្មួញចូលកាប់ឈើនិងដឹកជញ្ជូនឈើចេញពីព្រៃដើម្បីជាថ្នូរនឹងផលប្រយោជន៍។ ប្រសិនបើឈ្មួញណាចង់គេចវេះមិនបង់លុយតាមការកំណត់ទេនោះ ត្រូវប្រឈមនឹងការបង្ក្រាបយកស្នាដៃហើយថតផ្សាយជាសាធារណៈមិនខាន។ ការដែលលោក ធឹម វិចិត្រ ហ៊ានធ្វើអ្វីៗតាមអំពើចិត្តរហូតដល់ឈើប្រណីតនិងឈើប្រភេទលេខ១ស្ទើររលាយសាបសូន្យពីតំបន់ដែនជម្រកសត្វព្រៃលំផាត់ ក៏មានការឃុបឃិតពីលោក ជូ សុភ័ក្ត្រ ប្រធានមន្ទីរបរិស្ថានខេត្តរតនគិរី ដែលជាចៅហ្វាយនាយផងដែរទើបអ្វីៗអាចប្រព្រឹត្តទៅដោយរលូន។
ប្រជាសហគមន៍ការពារព្រៃឈើ និងប្រជាពលរដ្ឋរស់នៅក្នុងស្រុកលំផាត់ ខេត្តរតនគិរី បានឲ្យដឹងថាមួយរយៈពេលចុងក្រោយនេះបទល្មើសកាប់ឈើនិងដឹកជញ្ជូនឈើចេញពីព្រៃការពារ កំពុងកើតឡើងយ៉ាងពេញបន្ទុកដោយមានការឃុបឃិតពីមន្ត្រីបរិស្ថាន និងមន្ត្រីរដ្ឋបាលព្រៃឈើ ដែលគិតគូរតែរឿងផលប្រយោជន៍ផ្ទាល់ខ្លួន។ ចំណែកលោក ថង សាវុន អភិបាលខេត្តរតនគិរី និងលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី ក៏ដូចជាលោក ជូ សុភ័ក្ត្រ ប្រធានមន្ទីរបរិស្ថានខេត្តរតនគិរី មិនចាត់វិធានការបង្ក្រាបបទល្មើសដែលនៅតែបន្តកើតឡើងយ៉ាងអនាធិបតេយ្យនោះទេ។ បញ្ហានេះរដ្ឋមន្ត្រីក្រសួងបរិស្ថាន លោក សាយ សំអាល់ និងលោក វេង សាខុន រដ្ឋមន្ត្រីក្រសួងកសិកម្ម គួរចាត់វិធានការទប់ស្កាត់ជាបន្ទាន់ ដើម្បីឲ្យស្របទៅតាមបទបញ្ជារបស់លោកនាយករដ្ឋមន្ត្រី ហ៊ុន សែន។
ប្រជាពលរដ្ឋរស់នៅតាមបណ្ដោយផ្លូវជាតិលេខ៧៦ ពីព្រំប្រទល់ស្រុកកោះញែក ឆ្លងកាត់ស្រុកលំផាត់ ចូលក្រុងបានលុង បានឲ្យដឹងថាក្នុងមួយថ្ងៃៗមានរថយន្តដឹកឈើចេញពីតំបន់ដែនជម្រកសត្វព្រៃលំផាត់ ឆ្លងកាត់មូលដ្ឋានរបស់ពួកគាត់ចូលទៅក្រុងបានលុងជាច្រើនគ្រឿង ហើយមិនដែលឃើញមន្ត្រីបរិស្ថាន និងមន្ត្រីរដ្ឋបាលព្រៃឈើ ចាត់វិធានការទប់ស្កាត់ឡើយ។ បញ្ហានេះហើយដែលប្រជាពលរដ្ឋអំពាវនាវឲ្យលោក ថង សាវុន អភិបាលខេត្តរតនគិរី ពិនិត្យមើលបញ្ហាបំផ្លាញព្រៃឈើដែលកំពុងកើតឡើងយ៉ាងពេញបន្ទុកនោះផង ព្រោះកន្លងមកលោកនាយករដ្ឋមន្ត្រី ហ៊ុន សែន បានជំរុញឲ្យអាជ្ញាធរនិងសមត្ថកិច្ចតាមខេត្តនានាទប់ស្កាត់បទល្មើសកាប់ឈើ និងដឹកជញ្ជូនឈើខុសច្បាប់ប្រកបដោយប្រសិទ្ធភាព។ ទន្ទឹមនឹងនេះលោក សាយ សំអាល់ រដ្ឋមន្ត្រីក្រសួងបរិស្ថាន គួរពិនិត្យមើលបទល្មើសបំផ្លាញព្រៃឈើក្នុងស្រុកលំផាត់ ខេត្តរតនគិរី ជាបន្ទាន់ព្រោះព្រៃដែនជម្រកសត្វលំផាត់ និងព្រៃការពារផ្សេងៗទៀតកំពុងប្រឈមនឹងសេចក្ដីវិនាសជាក់ជាមិនខានឡើយបើសិនគ្មានវិធានការទប់ស្កាត់ទាន់ពេលវេលានោះទេ៕
