យោងតាមសេចក្តីរាយការណ៍ពីភូមិសាស្ត្រ “ដែនជំរកសត្វព្រៃបឹងពែរ” ស្ថិតក្នុងឃុំខ្វាវ ស្រុកជីក្រែង ដែលគ្រប់គ្រងដោយក្រសួងបរិស្ថាននោះបានឲ្យដឹងថា សព្វថ្ងៃតំបន់នេះកំពុងទទួលរងនូវការកាប់បំផ្លាញព្រៃឈើយ៉ាងរង្គាលពីសំណាក់ក្រុមឈ្មួញទុច្ចិត តែចំណែកមន្ត្រីបរិស្ថានដែលមានស្នាក់ការប្រចាំនៅតំបន់នោះមិនមានឆន្ទះបង្ក្រាប ឬទប់ស្កាត់នោះឡើយ ហើយថែមទាំងដេកអង្រឹងរាប់ក្បាលឡានក្បាលគោយន្តកន្ត្រៃយកលុយចែកគ្នាចាយយ៉ាងសប្បាយទៅវិញ។
ប្រភពបានឲ្យដឹងថា មន្ត្រីបរិស្ថាននៅតំបន់ ដែនជំរកសត្វព្រៃបឹងពែរ ជាអ្នកបើកដៃឲ្យក្រុមឈ្មួញធ្វើសកម្មភាពអារកាប់បំផ្លាញព្រៃឈើ និងដឹកជញ្ជូនឈើ ទាំងយប់ទាំងថ្ងៃ ជាថ្នូរទៅ និងផលប្រយោជន៍ផ្ទាល់ខ្លួន។ប្រភពដដែលបានបន្ថែមថា ព្រៃឈើនៅក្នុង ដែនជំរកសត្វព្រៃបឹងពែរ មានឈើបេង នាងនួន ធ្នង់ គគី និងឈើទាលបានរងវិនាសកម្ម មហន្តរាយយ៉ាងធ្ងន់ធ្ងរដោយក្រុមឈ្មួញ ប្រើប្រាស់ម៉ាស៊ីនរណាង៉ោង ជាច្រើនគ្រឿង អារផ្ដួលរំលំ រួមធ្វើការដឹកជញ្ជូនតាមគោយន្តកន្ត្រៃរាប់សិបគ្រឿង យកទៅដាក់តាមរោងសិប្បកម្ម នានានៅតំបន់ខាងលើនេះ ដើម្បីកែឆ្នៃ ជាគ្រឿងសង្ហាររឹមផ្សេងៗ។
មានការអះអាងបន្ថែមថា មន្ត្រីបរិស្ថាននៅស្នាក់ការ ដែនជំរកសត្វព្រៃបឹងពែរ ដែលមន្ទីរដាក់អោយឈរជើងដើម្បីការពារព្រៃឈើតាមច្បាប់របស់រដ្ឋនោះ តាមពិតទៅមិនបានចូលរួមទប់ស្កាត់នូវបទល្មើសដែលកើតពេញបន្ទុកក្នុងដែនគ្រប់គ្រងរបស់ខ្លួននោះឡើយ ដោយមន្ត្រីបរិស្ថានទាំងនោះចងអង្រឹងដេកចាំប្រមូលលុយពីក្រុមឈ្មួញតែប៉ុណ្ណោះ។
ពាក់ព័ន្ធទៅនឹងការចោទប្រកាន់ខាងលើនេះ លោក គង់ សុគន្ធា ប្រធានស្នាក់ការដែនជំរកសត្វ ព្រៃបឹងពែរ មិនអាចសុំការបំភ្លឺបានទេនៅរសៀលថ្ងៃទី១៣ ខែតុលា ឆ្នាំ២០១៦នេះ ដោយទូរស័ព្ទទៅលោកជាច្រើនដងតែគ្មានអ្នកទទួល។
លោក ពៅជុំ អនុប្រធានការិយាល័យរដ្ឋបាលការពារ និងអភិរក្សធម្មជាតិ និងជានាយកតំបន់ដែនជំរកសត្វព្រៃបឹងពែរ បានប្រាប់តាមទូរស័ព្ទនៅរសៀលថ្ងៃទី១៣ដដែលនេះថា លោកពិតជាមានកូនចៅឈ្មោះ គង់សុគន្ធា មែន ហើយលោកបានប្រាប់ទៀតថា ថ្មីៗនេះលោកក៏ធ្លាប់បានចុះទៅមើលដែរ តែមិនឃើញមានបទល្មើសអីទេ បន្ទាប់ពីមានសារព័ត៌មានខ្លះៗបានចុះផ្សាយ។
សកម្មភាពដឹកឈើនៅតំបន់ខាងលើនេះមិនមែនទើបតែកើតឡើងថ្មីៗនេះទេ វាកើតឡើងរាំរៃជាយូខែឆ្នាំណាស់ទៅហើយ ដូច្នេះខាងមន្ទីរបរិស្ថានខេត្តសៀមរាប និងខាងក្រសួងបរិស្ថានគួរតែរឹតបន្តឹងផង ជៀសវានខូចកិត្តិយសដល់ថ្នាក់ដឹកនាំធំៗ៕ ដោយ៖ ផ្លុងរ៉េត
