ជនរងគ្រោះទាំង២នាក់ ប្តី-ប្រពន្ធដែលជួបហេតុការណ៍គ្រោះថ្នាក់ចរាចរណ៍លើកំណាត់ផ្លូវជាតិលេខ១ នៅភូមិជ័យឧត្តម ឃុំសំរោងធំ ស្រុកកៀនស្វាយ ខេត្តកណ្តាល កាលពីវេលាព្រឹក នាថ្ងៃទី២២ ខែវិច្ឆិកា ឆ្នាំ២០១៣ ដោយរថយន្តទំនើបម៉ាក Lexus 570 ពណ៌ខ្មៅរបស់ឯកឧត្តមបណ្ឌិតរដ្ឋ ជាម យៀប អ្នកតំណាងរាស្ត្រមណ្ឌលខេត្តព្រៃវែងបុកនោះ គឺស្ត្រីជាប្រពន្ធឈ្មោះ ភិន សោភា អាយុ២០ឆ្នាំ បានស្លាប់បាត់បង់ជីវិតហើយ បន្ទាប់ពីបញ្ជូនទៅព្យាបាលនៅមន្ទីរពេទ្យកាលម៉ែត ខណៈបុរសជាប្តីឈ្មោះ ភឿន ខា ហៅមឿន សុខា អាយុ៣១ឆ្នាំ ដែលរងរបួសធ្ងន់កំពុងសម្រាកព្យាបាលនៅមន្ទីរពេទ្យនៅឡើយ។
ប្រភពពីមន្ត្រីនគរបាលខេត្តកណ្តាលម្នាក់បាននិយាយឲ្យដឹងថា សំណុំរឿងគ្រោះថ្នាក់ចរាចរណ៍នេះទំនងជានឹងមិនទៅដល់ស្ថាប័នតុលាការទេគឺនឹងត្រូវបិទបញ្ចប់ត្រឹមសម្រុះសម្រួលគ្នារវាងក្រុមគ្រួសារជនរងគ្រោះ និងមេធាវីឯកឧត្តម ជាម យៀប។
ទាក់ទងនឹងហេតុការណ៍គ្រោះថ្នាក់ចរាចរណ៍នេះមជ្ឈដ្ឋាននានាបានសម្តែងនូវការរិះគន់ទៅលើអំពើរបស់ឯកឧត្តមបណ្ឌិតរដ្ឋ ជាម យៀប ក្នុងនាមជាអ្នកតំណាងរាស្ត្រ បែរខ្វះការទទួលខុសត្រូវ និងគ្មានសុជីវធម៌ទៅលើជនរងគ្រោះ ពីព្រោះរថយន្តឯកឧត្តម បានព្យាយាមបើករត់គេច និងដោះស្លាកលេខរថយន្ត «លេខ រដ្ឋ 02.2-0007» ទុកកុំឲ្យគេស្គាល់អត្តសញ្ញាណថែមទៀត ទោះបីឯកឧត្តមបានចេញមុខបកស្រាយថា «ដើម្បីសុវត្ថិភាពផ្ទាល់ខ្លួន» ក៏ដោយ។
ក្រុមអ្នកលេងបណ្តាញសង្គម Facebook បានធ្វើការរិះគន់ទៅលើឯកឧត្តមបណ្ឌិតរដ្ឋ ជាម យៀប ដោយហៅឯកឧត្តមថាជា «បណ្ឌិត រត់»។
អនុលោមតាមមាត្រា៨២ នៃច្បាប់ស្តីពីចរាចរណ៍ផ្លូវគោកបានតម្រូវឲ្យមានការផ្តន្ទាទោសដល់កម្រិតអតិបរមាក្នុងករណីជនប្រព្រឹត្តល្មើសបើកបរបង្កឲ្យស្លាប់ដល់អ្នកដទៃដោយអចេតនា ហើយរត់គេចពីកន្លែងកើតហេតុក្នុងគោលបំណងគេចវេះពីការទទួលខុសត្រូវ។
ក្នុងហេតុការណ៍គ្រោះថ្នាក់ចរាចរណ៍នេះគឺរថយន្តរបស់ឯកឧត្តមបណ្ឌិតរដ្ឋ ជាម យៀប ក្រោយពីបង្កគ្រោះថ្នាក់ចរាចរណ៍ហើយបានបើករត់គេចរាប់គីឡូម៉ែត្រ និងត្រូវបានបើកផ្លូវដោយកងកម្លាំងសមត្ថកិច្ចមកដល់រាជធានីភ្នំពេញ ថែមទៀត៕
