ប្រជាពលរដ្ឋបានសួរទៅកាន់មន្ត្រីជំនាញជលផលអំពីភាពអនាធិបតេយ្យនៃការចិញ្ចឹមត្រីឆ្តោនៅទូទាំងខេត្តកណ្តាល ជាពិសេសការចិញ្ចឹមត្រីឆ្តោរបស់ឈ្មួញធំៗឈ្មោះ ហុង នៅវាលទួក្រសាំងជាង២០ម៉ឺនក្បាល និងការចិញ្ចឹមត្រីឆ្តោរបស់មេឈ្មួញ ផាំង គីម នៅឃុំសិត្បូ ចំនួន១០ម៉ឺនក្បាល ដែលជាប្រភពនៃការបង្កើតឲ្យមានបទល្មើសនេសាទ ដូចជាការដាក់ស្បៃមុង សៃយ៉ឺន ចាប់យកត្រីតូចៗយកទៅធ្វើជានុយសម្រាប់ការចិញ្ចឹមត្រីឆ្តោខុសច្បាប់ក្នុងមួយថ្ងៃៗរាប់សិបតោន មិនដែលមានការបង្ក្រាបទេ ព្រោះជំនាញជលផលបានអះអាងថា ត្រូវរង់ចាំគោលការណ៍របស់សាលាខេត្ត។ មកដល់ម៉ោងនេះអ្វីៗនៅតែដដែល ពោលគឺក្រុមឈ្មួញធំៗ ដូចជាលោក ផាំង គីម ជាដើមនៅតែមានសិទ្ធិអំណាចក្នុងការចិញ្ចឹមត្រីឆ្តោខុសច្បាប់ជាង១០ម៉ឺនក្បាល នៅក្នុងភូមិកំពង់ព្រីង ឃុំសិត្បូ ស្រុកស្អាង ស្ថិតនៅក្បែរវត្តកំពូលព្រឹក្ស ឆៀងខាងលិចចម្ងាយប្រមាណ៥០០ម៉ែត្រ ហើយបើរំពឹងលើគោលការណ៍របស់ខេត្ត សម្រាប់ការបង្ក្រាបស្រះចិញ្ចឹមត្រីឆ្តោនោះ មិនដឹងជាថ្ងៃណាទេ។
ប្រជាពលរដ្ឋបានបញ្ជាក់ថាស្រះចិញ្ចឹមត្រីឆ្តោធំៗចំនួន២កន្លែងរបស់ ផាំង គីម ដែលមានតួនាទីជាអង្គរក្សនៅក្នុងភូមិកំពង់ព្រីងនោះមានប្រមាណ១០ម៉ឺនក្បាល គ្រាន់តែស៊ីកូនត្រីតូចៗជានុយ ក្នុងមួយថ្ងៃជាង ១តោនកន្លះឯណោះ ហើយច្បាស់ណាស់ដែលថា ជំនាញជលផលរបស់លោក ឃ្លាំង វណ្ណធុល ក្តោបក្តាប់សកម្មភាពល្មើសច្បាប់នេះបានច្បាស់ដូចថ្ងៃ ប៉ុន្តែពួកគេមិនដែលហ៊ានប៉ះពាល់ទេ ដោយសារតែមានទំនាក់ទំនងផ្នែកផលប្រយោជន៍នោះឯង។ តាមពិតទៅ លោក ផាំង គីម បានប្រើស្បែកជាអង្គរក្ស ដើម្បីពង្រឹងពង្រីកឥទ្ធិពលអំណាចក្នុងការរកស៊ីចិញ្ចឹមត្រីឆ្តោខុសច្បាប់ផង និងការប្រមូលទិញត្រីឆ្តោ នៅទូទាំងខេត្តកណ្តាល និងយកទៅចែកចាយនៅយឿច្បារអំពៅផង ហើយករណីខ្លះទៀតលោក ផាំង គីម បាននាំចូលត្រីឆ្តោ និងត្រីរ៉ស់មកពីស្រុកយួនដែលមានប្រើប្រាស់សារធាតុគីមី ផងដែរ ហើយរាល់ការដឹកជញ្ជូនត្រីខុសច្បាប់ទាំងនោះសុទ្ធតែមានការសែនព្រេនជំនាញជលផល ទើបអ្វីៗអាចមានដំណើរការដោយរលូនល្អ។
ប៉ុន្តែសម្រាប់ការចិញ្ចឹមត្រីឆ្តោជាង១០ម៉ឺនក្បាលរបស់លោក ផាំង គីម បែរជាគ្មាននរណាហ៊ានកោសរូស ព្រោះគេមានទំនាក់ទំនងផលប្រយោជន៍ក្នុងការបង់លុយឲ្យមន្ត្រីជំនាញ និងសមត្ថកិច្ចពាក់ព័ន្ធប្រចាំឆ្នាំ ឬប្រចាំខែ ទើបគ្មាននរណាហ៊ានប៉ះពាល់ហើយការរក្សាទុកបទល្មើស ចិញ្ចឹមត្រីឆ្តោររបស់លោក ផាំង គីម មិនខុសពីការបិទភ្នែកឲ្យកើតមានបទល្មើសនៃការដាក់ស្បៃមុង សៃយ៉ឺន បង្កឲ្យមានភាពហិនហោចធនធានមច្ឆជាតិនោះទេ។
គេចង់ឃើញលោក ផៃ ប៊ុនឈឿន អភិបាលខេត្តកណ្តាលនិងលោក អ៊ុក រ៉ាប៊ុន ដែលជារដ្ឋមន្ត្រីក្រសួងកសិកម្ម មេត្តាពិនិត្យមើលភាពអសកម្ម នៃការចិញ្ចឹមត្រីឆ្តោខុសច្បាប់ របស់មេឈ្មួញ ផាំង គីម ឡើងវិញផង ព្រោះប្រ ជាពលរដ្ឋមួយចំនួនបានបញ្ជាក់ថាប្រសិនបើមេឈ្មួញធំៗដែលរកស៊ីចិញ្ចឹមត្រីឆ្តោខុសច្បាប់រាប់សែនក្បាលក្នុងមួយរដូវៗ ត្រូវជំនាញជលផលចុះបង្ក្រាបនោះពួកគាត់ ក៏ឈប់ចិញ្ចឹមត្រីឆ្តោទៀតដែរ ប៉ុន្តែប្រសិនបើឈ្មួញធំៗអាចចិញ្ចឹមត្រីឆ្តោខុសច្បាប់បាន រឿងអ្វីពួកគាត់មិនអាចធ្វើបាន ព្រោះមានលុយសូកប៉ាន់មន្ត្រីជលផលពុករលួយដូចតែគ្នាទេ។
