ប្រជាសហគមន៍ ការពារព្រៃឈើក្នុងឃុំទំរីង ស្រុកសណ្ដាន់ បានឲ្យដឹងថា ឈ្មួញឈ្មោះ សេង កុកឃាង ហៅតា៩៥ ក្នុងនាម ជាតំណាងឲ្យក្រុម ហ៊ុនស៊ីអស៊ីខេ កំពុងធ្វើ សកម្មភាពកាប់ឈើក្រៅ បរិវេណដីសម្បទានរួច ដឹកជញ្ជូន មកចែកចាយតាម ដេប៉ូក្នុងខេត្តកំពង់ធំ ខេត្តកំពង់ចាម និងបណ្ដាខេត្ តមួយចំនួនទៀត។ ជាក់ស្ដែងថ្មីៗនេះឈ្មួញឈ្មោះ សេង កុកឃាង បានដឹកជញ្ជូនឈើតាមរថយន្តធំៗធ្វើឲ្យខូចផ្លូវលំក្នុងឃុំទំរីង និងឃុំមានរិទ្ធ ស្រុកសណ្ដាន់ ជាបន្តបន្ទាប់ក៏ប៉ុន្តែពុំមានមន្ត្រីអាជ្ញាធរ និងសមត្ថកិច្ចពាក់ព័ន្ធណាហ៊ានប៉ះពាល់មេឈ្មួញរូបនេះឡើយ។ ហេតុនេះហើយទើបប្រជាសហគមន៍ការពារព្រៃឈើក្នុងឃុំទំរីង និងឃុំមានរិទ្ធ ស្រុកសណ្ដាន់ អំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថាន ចាត់វិធានការទប់ស្កាត់បទល្មើសបំផ្លាញព្រៃឈើទ្រង់ទ្រាយធំរបស់ឈ្មួញឈ្មោះ សេង កុកឃាង ហៅតា៩៥ជាបន្ទាន់។
មន្ត្រីអាជ្ញាធរមូលដ្ឋាន និងសមត្ថកិច្ចតូចតាចក្នុងស្រុកសណ្ដាន់ ខេត្តកំពង់ធំ បានឲ្យដឹងថា មួយរយៈពេលចុងក្រោយនេះឈ្មួញឈ្មោះ សេង កុកឃាង ហៅតា៩៥ ជ្រកក្រោមយីហោក្រុមហ៊ុនស៊ីអស៊ីខេ(CRCK) របស់យួន កាប់ឈើនិងដឹកជញ្ជូនឈើតាមរថយន្តធំៗដោយគ្មានញញើតអ្វីទាំងអស់។ មន្ត្រីអាជ្ញាធរមូលដ្ឋានក្នុងស្រុកសណ្ដាន់ បានឲ្យដឹងថាឈ្មួញឈ្មោះ សេង កុកឃាង បានធ្វើសកម្មភាពកាប់ឈើនិងដឹកជញ្ជូនឈើចេញពីឃុំទំរីង ស្រុកសណ្ដាន់ ស្រេចតែអំពើចិត្តព្រោះមានការឃុបឃិតជាប្រព័ន្ធជាមួយមន្ត្រីបរិស្ថាន មន្ត្រីរដ្ឋបាលព្រៃឈើ និងសមត្ថកិច្ចមួយចំនួន ។
សកម្មជនព្រៃឈើ និងមន្ត្រីអង្គការក្រៅរដ្ឋាភិបាលនៅក្នុងស្រុកសណ្ដាន់ ខេត្តកំពង់ធំ បានឲ្យដឹងថា បទល្មើសកាប់ឈើក្រៅបរិវេណដីសម្បទានក្រុមហ៊ុនស៊ីអស៊ីខេ របស់យួននៅតែកើតឡើងយ៉ាងពេញបន្ទុក ហើយឈ្មួញឈ្មោះ សេង កុកឃាង ប្រើយីហោក្រុមហ៊ុនយួនដើម្បីកាប់ឈើ។ ឈើដែលឈ្មួញឈ្មោះ សេង កុកឃាង កាប់ក្រៅបរិវេណដីសម្បទានក្រុមហ៊ុនយួន និងដឹកជញ្ជូនតាមរថយន្តធំៗយ៉ាងគគ្រឹកគគ្រេងចេញពីព្រៃឡង់នោះ មានដូចជាធ្នង់ នាងនួន បេង កកោះ ពពេល គ្រញូង និងសុក្រំជាដើម។ ដោយសារតែឈ្មួញឈ្មោះ សេង កុកឃាង អាចធ្វើអ្វីៗស្រេចតែអំពើចិត្តបែបនេះហើយ ទើបឈើក្នុងតំបន់ព្រៃគុហ៍(ព្រៃឡង់) កំពុងប្រឈមនឹងកាប់បំផ្លាញយ៉ាងមហន្តរាយ ព្រោះមន្ត្រីជំនាញនិងសមត្ថកិច្ចពាក់ព័ន្ធ មិនចាត់វិធានការបង្ក្រាប៕
