ខេត្តកណ្តាល ៖សាឡង់បូមខ្សាច់ខ្នាតយក្សដែលធ្វើអាជីវកម្មបូមខ្សាច់នៅចំណុច ចំណុចឃុំដីឥដ្ឋ ស្រុកកៀនស្វាយ ខេត្តកណ្តាល នាំយកខ្សាច់ខ្មែរទៅលក់នៅស្រុកយួននោះធ្លាប់មានរឿងចម្រូងចម្រាស់ជាមួយមន្ត្រីក្រសួងរ៉ែនិងថាមពល ព្រោះតែមិនគោរពតាមបទដ្ឋានបច្ចេកទេសនិងនាំខ្សាច់ចេញទៅបរទេស ដោយមិនបានបង់សួយសារគ្រប់ចំនួន ។ បន្ទាប់មកគេឃើញផ្អាកសកម្មភាពមួយរយះពេលខ្លី ។
សាឡង់បូមខ្សាច់មិនចេះរីងស្ងួតដែលគេដឹងថា ជារបស់ជនជាតិវៀតណាម និងកំពុងបូមយ៉ាងគគ្រឹគគគ្រេងនៅទន្លេមេគង្គចំណុចឃុំដីឥដ្ឋ ស្រុកកៀនស្វាយ ខេត្តកណ្តាល កំពុងបង្កសម្លេងរំខានដល់ប្រជាពលរដ្ឋ ដែលរស់នៅជិតៗនោះ ហើយបើទោះបីជាប្រជាពលរដ្ឋត្អូញត្អែឬរាយការណ៍ទៅអាជ្ញាធរក៏គ្មានចំណាត់ការដែរ ។
ប៉ុន្តែក្រោយមកប្រហែលជានិយាយត្រូវរ៉ូវគ្នា មន្ត្រីក្រសួងរ៉ែក៏លែងលេចមុខទៅរករឿង ហើយសាឡង់បូមខ្សាច់ខ្នាតយក្សនោះក៏ធ្វើសកម្មភាពឡើងវិញ ហើយសម្បើមលើសដើម ដូចអ្វីដែលគេនិយាយថា លែងទើសក្បាលមន្ត្រីណាទៀតហើយ? ។ ចំណែកពលរដ្ឋដែលជាជនរងគ្រោះក៏បន្តទ្រាំនឹងសម្លេងកក្រើកមេឃស្ទើរបែកក្រដាសត្រចៀកបន្តទៀត ព្រោះតែសម្លេងគ្រឿងចក្របូមខ្សាច់ទាំងយប់ទាំងថ្ងៃមិនគិតដល់ពេលវេលាសម្រាករបស់ពលរដ្ឋនោះឡើយ ។
ប្រជាពលរដ្ឋដោយមិនអាចស្វែងរកអ្នកជួយបាន បានត្រឹមតែដាក់បណ្តាសាក្រុមអាជីវកម្មរួមទាំង មន្ត្រីពាក់ព័ន្ធតែប៉ុណ្ណោះ ។
អាជីវកម្មបូមខ្សាច់ដោយប្រើសាឡង់ខ្នាតយក្សខាងលើនេះ គឺជាអាជីវកម្មរបស់កំពង់ផែស្វយ័តភ្នំពេញ របស់លោក ហ៊ី ប៉ាវី អគ្គនាយកកំពង់ផែ ហើយក្រុមធ្វើផ្ទាស់សុទ្ធសឹងជាជនជាតិវៀតណាមដែលរស់នៅខុសច្បាប់ ។ ប៉ុន្តែការបូមខ្សាច់នោះ ស្ថិតក្រោមលេសនៃការស្តារផ្លូវទឹកទន្លេមេគង្គ ។ អញ្ចឹងហើយបានជាលោក ហ៊ី ប៉ាវី អត់ចាំបាច់ទ្រអ្នកណាទាំងអស់ ទោះជាលើសបទដ្ឋានបច្ចេកទេសឬរំខានជីវភាពរស់នៅរបស់ពលរដ្ឋរស់នៅក្បែរៗ នោះក៏ដោយ ៕
