ក្រុងប៉ោយប៉ែត៖ ប្រជាពលរដ្ឋជាអាជីវករ រកស៊ីនាំទំនិញចេញពីថៃ តាមរទេះបាននិយាយតគ្នាថា លោក ហ៊ុយ សុជាតិ ប្រធានគយ ច្រកទ្វារអន្តរជាតិប៉ោយប៉ែត បាននិងកំពុងបើកភ្លើងខៀវ ឲ្យលោក ឃឹម សូម៉ាលីប្រធានទទួលបន្ទុកពិនិត្យរទេះដឹកទំនិញចេញពីថៃ ប្រព្រឹត្តអំពើពុករលួយជាចំហរ ដើម្បីប្រមូលលុយចិញ្ចឹមមេ ព្រោះថាបើមិនមានការបើកភ្លើងខៀវពីលោក ហ៊ុយ សុជាតិទេ ក៏លោក ឃឹម សូម៉ាលី មិនហ៊ានប្រព្រិត្តបទល្មើសជាចំហរដូចនេះដែរ។តាមសេចក្តីរាយការណ៏ពីប្រជាពលរដ្ឋបានឲ្យដឹងថា លោក ឃឹម សូម៉ាលីបានប្រើបុគ្គលិកត្រួតពិនិត្យរាល់រទេះទំនិញដឹកចេញពីដីថៃ ជាបុគ្គលិកស៊ីវិលដែលគេនិយមហៅថាចៃគយ មិនមែនជាមន្ត្រីគយ ដោយស្លៀកពាក់ខោអាវឈុតអង្គរក្ស ឈរចាំត្រួតពិនិត្យរទេះ និងរាយការណ៏ទៅស្នាក់ការត្រួតពិនិត្យរទេះនៅផ្សារមង្គល(ផ្សាររ៉ាថ្មី) បណ្តាលឲ្យមហាជនងឿងឆ្ងល់ថា កិច្ចការនេះជាកិច្ចការរបស់រដ្ឋ ហេតុអ្វីបានជាលោក ឃឹម សូម៉ាលី ក្លាហានបំពានច្បាប់ ហ៊ានប្រើចៃគយក្រៅក្របខណ្ឌរដ្ឋ ឲ្យត្រួតពិនិត្យរទេះដឹកទំនិញទៅវិញ បញ្ហាមិនប្រក្រតីនេះ គេជឿជាក់ថា លោកហ៊ុយ សុជាតិ ប្រធានគយ ច្រកទ្វារអន្តរជាតិប៉ោយប៉ែត ច្បាស់ជាបានដឹងតែធ្វើមិនដឹង អាចថាលោក ឃឹម សូម៉ាលី ជាអ្នករកស្រូវអង្ករចិញ្ចឹមមេទៀតផង។
មួយវិញទៀត ប្រជាពលរដ្ឋជាអាជីវករបានឲ្យដឹងទឿតថា មន្ត្រីគយក្រោមឧវាទលោក ឃឹម សូម៉ាលី ពុំបានធ្វើការត្រួតពិនិត្យឆែកឆេរទំនិញនៅក្នុងរទេះឲ្យបានម៉ត់ចត់នោះឡើយ ព្រោះអ្នករកស៊ីជ្រែអីវ៉ាន់គេចពន្ធ គេបានសម្របសម្រួលជាមួយលោក ឃឹម សូម៉ាលី ជាមុនរួចអស់ហើយ ដោយតម្រូវឲ្យបង់ខែ រឺបង់ប្រចាំថ្ងៃដូចជាក្នុងរទេះមានជ្រែបង្កប់ទំនិញគ្រឿងប្រណិតត្រូវបង់ពន្ធខ្ពស់ តែដោយសារមានការសម្របសម្រួលគ្នា រវាងគយរ៉ា និងឈ្មួញខិលខូច ទើបពុំមានបង់ពន្ធទំនិញប្រណិតខាងលើបណ្តាលឲ្យរដ្ឋត្រូវបាត់បង់ថវិកាដែលបានមកពីចំណូលពន្ធជាច្រើន។តាមប្រភពព័តមានឲ្យដឹងទៀតថា ដោយមានការពុករលួយចេះសម្របសម្រួលគ្នាស៊ីសង្វាក់ ទើបមានការបង់លុយគិតតាមរទេះគ្មានការត្រួតពិនិត្យ ក្នុងមួយរទេះត្រូវបង់ពី១០ទៅ២០ម៉ឺនរៀលតាមរទេះមានទំនិញតិចរឺច្រើន និងគ្មានចេញវិកយ័បត្រទេ ដែលផ្ទុយពីបទបញ្ជារបស់ ក្រសួងសេដ្ឋកិច្ចនិងហិរញ្ញវត្ថុ និង អង្គភាពប្រឆាំងអំពើពុករលួយ។មួយវិញទៀត លោក ឃឹម សូម៉ាលី បានទទួលម់ៅផែនការប្រមូលលុយពីរទេះ បង់ឲ្យទីស្នាក់ការគយច្រកទ្វារប៉ោយប៉ែតរៀងរាល់ខែ ហេតុដូច្នេះហើយ ទើបលោកគយរូបនេះជិះសេះលែងដៃក្នុងការប្រមូលលុយពីរទេះ ធ្វើការសម្របសម្រួលនិងឃុបឃិតជាមួយឈ្មួញរកស៊ីជ្រែទំនិញគេចពន្ធ ដោយប្រមូលលុយគ្មានការត្រួតពិនិត្យនិងគ្មានវិក័យបត្រ ទើបធ្វើឲ្យរដ្ឋខាតបង់ចំណូលពន្ធយ៉ាងច្រើន។ អំពើពុករលួយរបស់គយត្រួតពិនិត្យរទេះនៅច្រកប៉ោយប៉ែត ដែលត្រូវបានលោក ឃឹម សូម៉ាលី ប្រព្រិត្តិយ៉ាងរលូន គឺជាដំបៅមហារីក គួរតែ ក្រសួងសេដ្ឋកិច្ចនិងហិរញ្ញវត្ថុ និង អង្គភាពប្រឆាំងអំពើពុករលួយចុះត្រួតពិនិត្យ ដើម្បីទប់ស្កាត់ការបាត់បង់ចំណូលពន្ធរបស់រដ្ឋ៕(មានតភាគ)
