ខេត្តកំពង់ធំ ៖ ថ្មីៗនេះ ក្រោយពីលោក អ៊ុត សំអន ត្រូវបានព្រះមហាក្សត្រដកចេញពីតំណែងហើយ គេតែងឃើញមាន ប្រជាពលរដ្្ឋចំនួន៤ឃុំ រួមមាន ឃុំជ្រាប់ ឃុំកកោះ ឃុំតាំងក្រសាំង ឃុំព្នៅ ក្នុងស្រុកសន្ទុក ខេត្តកំពង់ធំ ផ្ទុះការតវ៉ាខឹងសប្បានឹងលោកអ៊ុក សំអន ជាចៅហ្វាយខេត្តអស់តំណែង ពួកគាត់បានឲ្យដឹងថា លោកអ៊ុក សំអន បានឃុបឃិតជាមួយអ្នកមានលុយ អ្នកមានអំណាច យកគ្រឿងចក្រទៅទន្ទ្រានកាន់កាប់ដីព្រៃលិចទឹកក្នុងតំបន់ហាមឃាត់ដោយគ្មានញញើតអ្វីទាំងអស់ ។
ពួកគាត់បាននិយាយពេញៗមាត់ថា ពួកគាត់នៅតែគោរពស្រលាញ់គាំទ្រ និងត្រូវការសម្ដេចតេជោ ហ៊ុន សែន ជាមេដឹកនាំជារៀងរហូត ។ ប៉ុន្តែ កន្លងមក ទង្វើអាក្រក់របស់លោក អ៊ុក សំអន ចៅហ្វាយខេត្ត លោក យស បញ្ញារិទ្ធ ចៅហ្វាយស្រុកសន្ទុក លោក អ៊ឹម ឆន រងចៅហ្វាយស្រុកសន្ទុក លោក សន វឿន ស្មៀនឃុំកកោះ និងមន្ត្រីខិលខូចពុករលួយតាមមន្ទីរក្នុងខេត្តមួយចំនួនទៀត បានធ្វើអោយប្រជាពលរដ្ឋមានការថ្នាំងថ្នាក់រហូតឈានទៅដល់ការ ខឹងគោ វាយរទេះ ទៀតផង ។
ជាក់ស្តែង ជម្លោះដីធ្លីស្រែប្រាំងវាលក្រោមដែលស្ថិតនៅចំណុចខាងជើងស្ទឹងតូច កែងអន្លង់ព្រីង បឹងចាមបាច បឹងព្រួស បឹងទឹកពុល នឹង បឹងប្រវឹកក្នុងទឹកដីឃុំភ្នៅ ស្រុកសន្ទុក ខេត្តកំពង់ធំ ក្រុមឈ្មួញដែលមានមេក្លោងឈ្មោះ សន វឿន ជាមន្ត្រីស្មៀនឃុំកកោះ និង ឈ្មោះជា រ៉ាវី ជាមេបញ្ជាការរងប៉េអឹមខេត្តសៀមរាបនៅតែបន្តប្រើល្បិចកលរៀបចំឯកសារ តាមរបៀបពុករលួយយកទៅប្រឆាំងនិង ស.ជ.ណ លេខ១០.៤៤ចុៈថ្ងៃទី២២ ខែកក្កដា ឆ្នាំ២០១៤ របស់ទីស្តីការគណៈរដ្ឋមន្ត្រីក្នុងចេតនាមើលងាយប្រមុខថ្នាក់នាំរាជរដ្ឋាភិបាល ។ រហូតមកដល់ពេលនេះមិនទាន់នឹងដោះស្រាយផងឥឡូវនេះ មាន ក្រុមហ៊ុន បាវហ្វេង អ៊ិនធើណេសិនណល អេហ្រី្គខលធីរ័លឌីវេឡុបមិន បានយកគ្រឿងចក្រជាច្រើនគឿងទៅជួសជុលផ្លូវ និងលើកទំនប់ព័ទ្ធយកដីរបស់រដ្ឋ ដែលកសិករកំពុងអាស្រ័យផលជាង១៥៦៦ហិកតាឱ្យទៅក្រុមហ៊ុនឯកជន ដែលស្ថិតនៅក្នុងតំបន់ហាមឃាត់ភូមិសាស្រ្ត ឃុំជ្រាប់ ឃុំព្នៅ ឃុំតាំងក្រសាំង និងឃុំកកោះ ស្រុកសន្ទុកដោយបំពានលើអនុក្រិត្យ និង ស.ជ.ណ របស់រាជរដ្ឋាភិបាលទៀត ។
សូមបញ្ជាក់ថា ការយកចិត្តទុកដាក់ របស់សម្តេចតេជោ ហ៊ុន សែន ក្នុងករណីជម្លោះដីធ្លីនេះកំពុងធ្វើឲ្យមហាជនចាប់អារម្មណ៍យ៉ាងខ្លាំងទៅលើចំណាត់ការរបស់មន្ត្រីអាជ្ញាធរ មួយចំនួន ដែលសម្តេចតេជោ ហ៊ុន សែន ហៅថាមន្ត្រី(គ្រាប់ល្ពៅ)។ ដោយហេតុថា គ្រប់រឿងជម្លោះដីធ្លី អ្នកមានលុយ អ្នកមានអំណាច តែងតែឈ្នះប្រជាពលរដ្ឋទន់ខ្សោយ ហើយចំណាត់ការរបស់មន្ត្រី (គ្រាប់ល្ពៅ) ត្រូវប្រឈមនឹងការរិះគន់ថាមានភាពមិនប្រក្រតី ។
ជាការពិតអ្នកភូមិដែលជាប្រជាពលរដ្ឋទន់ខ្សោយតែងតែរងគ្រោះដោយសារអ្នកមានលុយ អ្នកមានអំណាច បំពានលើដីធ្លីពួកគាត់ ប៉ុន្តែនៅទីបំផុត ពួកគាត់ ត្រូវប្រឈមមុខនឹងការគំរាមកំហែងជាប់គុកច្រវ៉ាក់ ដោយសារតែការតវ៉ា ការពារដីធ្លីរបស់ខ្លួនយ៉ាងអយុត្តិធម៌ ។
លទ្ធផលឆ្នោតឆ្នាំ ២០១៣ គឺជាសារមួយបញ្ជាក់យ៉ាងច្បាស់ទៅកាន់ពួកមន្ត្រីខិលខូច និង មន្ត្រីពុករលួយ មន្ត្រីតុលាការកាត់ក្ដីតាមទឹកលុយអោយចេះភ្ញាក់រលឹកកែខ្លួនជម្រុះទង្វើអាក្រក់កន្លងមកចោលហើយខិតខំសាងអំពើល្អដើម្បីឆក់យកបេះដូងរាស្ត្រមកវិញ ។ ប៉ុន្តែក្រុមពួកមន្ត្រីអស់សាច់មួយចំនួនតូចខាងលើនៅតែមិនកែខ្លួនហើយបន្តប្រព្រឹត្តរឿងអាក្រក់កាន់តែច្រើនទៅៗ ។ ពួកមន្ត្រីខិលខូចទាំងនោះ ពូកែណាស់ខាងលូនក្រាបលុតជង្គង់នៅចំពោះមុខថ្នាក់ដឹកនាំ តែនៅពីក្រោយខ្នងថ្នាក់ដឹកនាំវិញជាន់ករមន្ត្រីតូចតាចនិងរាស្ត្រទន់ខ្សោយគ្មានត្រាប្រណី ។
ពួកគាត់និយាយខ្សឹបខ្សៀវគ្នាថា គួរអោយអាណិតដល់ឯកឧត្តម សុខ លូ ទើបតែនឹងឡើងកាន់តំណែងថ្មីមិនទាន់បាន ១ខែផង ដើរតែដោះស្រាយរឿងក្តីរបស់មន្ត្រីខិលខូចដែលបានបន្សល់ទុកអោយឯកឧត្តមទទួលរងថ្មបាក់ ។
ពលរដ្ឋរំពឹងទុកថា ពីពេលនេះតទៅឯកឧត្តម សុខ លូ ច្បាស់ជាចាប់ផ្ដើមដុះក្អែលមន្ត្រីខិលខូច ហើយជាពិសេសដល់ពេលត្រូវកាត់សាច់ស្អុយក្រវាត់ចោលហើយ បើសិនជាអាចកាត់សាច់ស្អុយចេញ និងផ្តល់យុត្តិធម៌ ដោះស្រាយបញ្ហាអយុត្តិធម៌ក្នុងខេត្តកំពង់ធំបាន នៅឆ្នាំ ២០១៧ និង ២០១៨ មិនបាច់ឃោសនាក៏ឈ្នះឆ្នោតដែរ ៕
