លោក ថៃ-គឹមហេង ជំនួយការលោក ស-ថាវី អភិបាលខេត្តឧត្តរមានជ័យ ត្រូវបានអ្នកយកព័ត៌មានយើងនៅស្រុកអន្លង់វែង រាយការណ៍កាលពីយប់ថ្ងៃទី១៣ឈានចូលទី១៤ ខែមិនា ឆ្នាំ២០១៧នេះថា បានប្រើរថយន្តយីឌុប១គ្រឿង និងរថយន្តខ្នាតយក្សប្រភេទកាច់ក ២គ្រឿងទៀត ដឹកឈើពីខេត្តព្រះវិហារ ឆ្លងកាត់ស្រុកត្រពាំងប្រាសាទ ស្រុកអន្លង់វែង និងក្រុងសំរោង ឆ្ពោះទៅខេត្តបន្ទាយមានជ័យ ដោយមិនមានសមត្ថកិច្ចណាម្នាក់ចេញមុខត្រួតពិនិត្យច្បាប់លំលាប់ ឬទម្ងន់ផ្ទុកនោះទេ។
នៅព្រឹកម៉ោង១០និង១៤នាទី ថ្ងៃទី១៤ ខែមិនា ឆ្នាំ២០១៧នេះលោក ថៃ-គឹមហេង ជំនួយការលោក ស-ថាវី អភិបាលខេត្តឧត្តរមានជ័យបានប្រាប់កម្ពុជសុវណ្ណភូមិតាមទូរស័ព្ទដៃថា លោកបច្ចុប្បនេះឈប់រកស៊ីដឹកឈើហើយ ឈើដែលដឹកយប់មិញក្មេងៗទេដែលជាអ្នកធ្វើការ ហើយលោកមិនមានក្រុមហ៊ុនដីសម្បទាន ឬក្រុមហ៊ុនដឹកឈើអីនោះទេ បើមានក្រុមហ៊ុនដូចគេដូចឯង ច្បាស់ជាក្លាយជាឧកញ្ញា មហាសេដ្ឋី ឬអ្នកមានយូរហើយ។
ប្រភពពីសមត្ថកិច្ចតាមដងផ្លូវបានអោយដឹងថា រថយន្តដឹកឈើ៣គ្រឿងខាងលើនេះ អ្នករត់ការបង់លុយអោយសមត្ថកិច្ចពាក់ព័ន្ទតាមដងផ្លូវគឺឈ្មោះ ដូច ភេទប្រុសអាយុប្រហែលជា២០ឆ្នាំ ជាកូនប្រុសរបស់លោក ថៃ-គឹមហេង ជំនួយការរបស់លោក ស-ថាវី នេះតែម្តង។
នៅព្រឹកថ្ងៃទី១៤ដដែលនេះ កម្ពុជាសុវណ្ណភូមិ មិនអាចសុំការពន្យល់ពីលោកនាយខណ្ឌរដ្ឋបាលព្រៃឈើខេត្តព្រះវិហារដែលទើបឡើងកាន់តំណែងថ្មី ជំនួសលោក អ៊ិត-ភូម្រា នាយខណ្ឌរដ្ឋបាលព្រៃឈើខេត្តព្រះវិហារចាស់បាននោះ ព្រោះមិនមានលេខទូរស័ព្ទសំរាប់ធ្វើការទំនាក់ទំនង។
រីឯលោក ឃុន-ប៊ុនហេង នាយផ្នែករដ្ឋបាលព្រៃឈើអន្លង់វែង ក៏មិនអាចសុំការបកស្រាយបានដែរ ព្រោះទូរស័ព្ទរបស់ជាប់រវល់រហូត ខលមិនចូល។
លោក ស-ថាវី អភិបាលខេត្តឧត្តរមានជ័យបានប្រាប់តាមទូរស័ព្ទនៅម៉ោង១២និង៣២នាទី ថ្ងៃទី១៤នេះថា លោក មិនដែលមានជំនួយការឈ្មោះ ថៃ-គឹមហេង នោះទេ រួចបិតទូរស័ព្ទបាត់។
បើទោះជាលោក ស-ថាវី អភិបាលខេត្តឧត្តរមានជ័យបដិសេធថា លោកមិនមានជំនួយការឈ្មោះ ថៃ-គឹមហេង នេះក៏ដោយពលរដ្ឋ មន្រ្តីរាជការមួយចំនួនបានអះអាងថា លោកថៃគឹមហេង គឺជាជំនួយការរបស់លោកសថាវីពិតមែន ហើយថែមទាំងជាប្រធានអង្ករក្សរបស់លោក សថាវី ទៀតផង។
ពលរដ្ឋនៅខេត្តឧត្តរមានជ័យ មានការសង្ស័យថា លោក ថៃគឹមហេង អាចជាកូនអុកមួយរបស់លោកសថាវី ក្នុងការរកចំណូលខ្មៅជូនលោក សថាវី ទៀតផង?
ប្រពភពីមន្ត្រីរាជការម្នាក់នៅខេត្តឧត្តរមានជ័យបានលួចបង្ហើបថា តាំងពីលោក ស-ថាវី ឡើងធ្វើជាចៅហ្វាយខេត្តឧត្តរមានជ័យមក លោក ថៃ-គឹមហេង រកស៊ីមានបានដូរឡានចាស់ឡើងឡានឡិចស៊ីស៤៧០ ឯលោក ដូច កូនប្រុសរបស់លោកឡើងឡានហៃលេនដឺ មានលុយចាយគ្រឹគៗគ្រាក់ ដោយសារបានបារមីរបស់លោកអភិបាលខេត្តឧត្តរមានជ័យលោក ស-ថាវី។
សូមលោក នាយខណ្ឌរដ្ឋបាលព្រៃឈើខេត្តឧត្តរមានជ័យ ខេត្តព្រះវិហារ ខេត្តបន្ទាយមានជ័យ មន្ទីរសាធារណការណ៍ និងដឹកជញ្ជូនទាំង៣ខេត្តនេះមេត្តា ជួយត្រួតពិនិត្យរឹតបន្តឹង ក្រុមរថយន្តយក្សដឹកឈើយប់ៗទាំងនេះផង ព្រោះបើមិនដូច្នេះទេ ព្រៃឈើក៏រលាយ ផ្លូវថ្នល់ក៏រលាយអស់ តែមិនមានថវិការចូលរដ្ឋ ដែលជាហេតុបណ្តាលអោយសម្តេច ហ៊ុន-សែន ទៅខ្ចីលុយបរទេសមកជួសជុលផ្លូវថ្នល់ ឬដាំដើមឈើសាឡើងវិញជាក់ជាមិនខាន៕ ដោយ៖ ផ្លុង-រ៉េត
