ប្រភពព័ត៌មានពីអគ្គនាយកដ្ឋានគយបានឲ្យដឹងថា ក្នុងចំណោមមន្ត្រីគយទាំង១៦នាក់ ដែលលោក កើត សុធារ៉ា ចងក្រងជាក្រុមចល័តសម្រាប់ប្រើប្រាស់ផ្ទាល់ខ្លួនមានឈ្មោះ ផែន ភឿន ជាអ្នកគ្រប់គ្រងក្រុម និងជាមេចាប់ជំរិតក្រុមអ្នករកស៊ីដឹកជញ្ជូនទំនិញទាំងស្របច្បាប់និងខុសច្បាប់ ហើយក៏មានឈ្មោះ ហេងសារី និងឈ្មោះ ច្រឹង សំអាត ដែលសុទ្ធសឹងជាជើងកាប់ដាវហើយលោក ផែន ភឿន ដែលឡើងតំណែងនិងមានអំណាចតាមជើងខោលោក កើត សុធារ៉ា បានតាំងខ្លួនជាមេគយចល័តធំគ្រប់គ្រងគ្រប់ផ្លូវជាតិទាំងអស់បន្ទាប់ពីលោក កើត សុធារ៉ា មកអំណាចទាំងមូលត្រូវធ្លាក់មកលើគាត់។ មន្ត្រីគយជាច្រើនបានពេបជ្រាយចំពោះចរិតក្រអឺតក្រទមរបស់លោក ផែន ភឿន ដែលការតាំងខ្លួនជាគយចល័តរបស់ក្រសួង ធ្វើអ្វីៗតាមតែទំនើងចិត្តបំពានទៅលើរចនាសម្ព័ន្ធនិងតួនាទីរបស់គយចល័តដែលសេសសល់តាំងពីជំនាន់លោក កែវ សុខឃាង គេមិនទាន់រំលាយចោលនៅឡើយទេ ដូច្នេះវាបង្កើតឲ្យមានភាពប្រទាំងប្រទើសយ៉ាងខ្លាំងលើការងាររបស់ជំនាញគយចល័ត។បច្ចុប្បន្ននេះ លោក កើត សុធារ៉ា ជាមេគយចល័តទើបឡើងថ្មី បានចាត់ចែងប្រមូលបក្ខពួករបស់ខ្លួនមកពីខេត្តព្រះសីហនុ បានរៀបចំជាក្រុមពិសេសមួយ ដែលមានសមាសភាពចំនួន១៦នាក់ ក្រោមការគ្រប់គ្រងចាត់ចែងរបស់លោក ផែន ភឿន អតីតជាមន្ត្រីគយនៅខេត្តព្រះសីហនុ និងជាមនុស្សជំនិតរបស់លោក កើត សុធារ៉ា ដើរបង្កព្យុះភ្លៀងតាមតែអំពើចិត្ត រំខានការរកស៊ីដឹកជញ្ជូនទំនិញរបស់ក្រុមអាជីវករ ហើយលោក ផែន ភឿន បានតាំងខ្លួនជាគយចល័តរបស់ក្រសួងសេដ្ឋកិច្ចនិងហិរញ្ញវត្ថុ ដែលរូបភាពនេះ គេមើលឃើញថា ការងារប្រមូលថវិកាជាតិរបស់ជំនាញគយ ក្រោមការដឹកនាំរបស់លោក ប៉ែន ស៊ីម៉ន ហាក់ដូចជាមិនស៊ីសង្វាក់គ្នាជាមួយការងារលោក កើត សុធារ៉ា ជាមេគយចល័តដែលមានខ្នងបង្អែក ក្នុងក្រសួងហិរញ្ញវត្ថុនោះទេ ធ្វើឲ្យក្រុមអ្នករកស៊ីដឹកជញ្ជូនទំនិញជាច្រើនខកចិត្តយ៉ាងខ្លាំង។
