សមត្ថកិច្ចពាក់ព័ន្ធនៅច្រកទ្វារអន្តរជាតិព្រំ ខេត្តប៉ៃលិន បានឲ្យដឹងថាសព្វថ្ងៃនេះលោក ទី ប៊ុនឡង់ ជាមេគយប្រចាំច្រកទ្វារអន្តរជាតិព្រំ ដែលមានការបើកដៃពីលោក សំ សុវណ្ណារិទ្ធ ប្រធានសាខាគយខេត្តប៉ៃលិន កំពុងឃុបឃិតឲ្យឈ្មួញច្រើននាក់នាំចូលទំនិញគេចពន្ធនិងទំនិញបង់ពន្ធមិនគ្រប់តាមអំពើចិត្ត។ មានសេចក្តីរាយការណ៍ថាឈ្មួញធំៗជាច្រើននាក់អាចនាំចូលទំនិញគេចពន្ធនិងទំនិញបង់ពន្ធមិនគ្រប់តាមច្រកទ្វារអន្តរជាតិព្រំ ដោយដឹកជញ្ជូនតាមរថយន្តយីឌុបធំៗក្នុងមួខែៗរាប់រយគ្រឿង ហើយឈ្មួញត្រូវតែបង់លុយឲ្យមន្ត្រីគយតាមការកំណត់ទើបចៀសផុតពីការបង្ក្រាប។ ទាក់ទងនឹងបញ្ហាខាងលើនេះលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុមិនគួរបណ្តែតបណ្តោយឲ្យមន្ត្រីគយនៅខេត្តប៉ៃលិនធ្វើអ្វីៗតាមអំពើចិត្តតទៅទៀតឡើយ ព្រោះកំពុងធ្វើឲ្យបាត់បង់ចំណូលពន្ធកាន់តែច្រើន។
តាមសេចក្តីរាយការណ៍ពីមន្ត្រីគយតូចតាចក្នុងខេត្តប៉ៃលិន បានឲ្យដឹងថា ប៉ុន្មាន ខែកន្លងទៅនេះមេគយធំៗក្នុងខេត្តប៉ៃលិន កំពុងឃុបឃិតគ្នាប្រព្រឹត្តអំពើពុករលួយយ៉ាង ពេញបន្ទុកតែម្តង។ ប្រភពបានបញ្ជាក់ថា មួយរយៈកន្លងទៅនេះលោក ទី ប៊ុនឡង់ មេគយច្រកទ្វារអន្តរជាតិព្រំ ដែលមានខ្នងបង្អែកធំជាងលោក គុណ ញឹម ជាអគ្គនាយកនៃអគ្គនាយកដ្ឋានគយនិងនិងរដ្ឋាករ ទៅទៀតនោះកំពុងប្រើអំណាចប្រព្រឹត្តអំពើពុករលួយប្រមូលលុយ តាមច្រើនរូបភាព។ ហេតុនេះហើយទើបក្រុមឈ្មួញនិងអាជីវករមួយចំនួនដែលរកស៊ីនាំទំនិញពីប្រទេសសៀមចូលតាមច្រកទ្វារអន្តរជាតិព្រំ ខេត្តប៉ៃលិន បានអំពាវនាវឲ្យលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករ ចាត់វិធានការទប់ស្កាត់អំពើពុករលួយរបស់លោកទី ប៊ុនឡង់ ប្រធានការិយាល័យគយច្រកទ្វារអន្តរជាតិព្រំ និងលោក សំ សុវណ្ណារិទ្ធ ប្រធានសាខាគយ ខេត្តប៉ៃលិនខ្លះផង។ តាមការអះអាងពីក្រុមឈ្មួញនិងអាជីវករមួយចំនួនបានបញ្ជាក់ថាពួកគេកំពុងពិចារណាឈប់នាំចូលទំនិញតាមច្រកទ្វារអន្តរជាតិព្រំ តទៅទៀតព្រោះអីលោក ទី ប៊ុនឡង់ មេគយច្រកទ្វារអន្តរជាតិព្រំដែលមានការឃុបឃិតបើកដៃពីលោក សំ សុវណ្ណារិទ្ធ ប្រធានសាខាគយខេត្តប៉ៃលិន កំពុងគាបជំរិតយកលុយលើតុក្រោមតុពីពួកគេកាន់តែច្រើនឡើងៗ។ ជាងនេះទៅទៀតសូម្បីតែប្រជាពលរដ្ឋដែលរកស៊ីដឹកបន្លែបង្ការនិងផ្លែឈើបន្តិចបន្តួចចូលតាមច្រកទ្វារអន្តរជាតិព្រំ ក៏ត្រូវមន្ត្រីគយប្រចាំច្រកនេះជំរិតយកលុយយ៉ាងកំរោលដោយគ្មាន ការយោគយល់ឡើយ។
ថ្មីៗនេះប្រជាពលរដ្ឋដែលប្រកបមុខរបររកស៊ីដឹកបន្លែបង្ការ ផ្លែឈើនិងទំនិញផ្សេងៗពីប្រទេសសៀមរាប់សិបនាក់បានប្រមូលផ្តុំគ្នាតវ៉ា នៅមុខច្រកទ្វារអន្តរជាតិព្រំប្រឆាំងទៅនឹងសមត្ថកិច្ចគយដែលគាបសង្កត់ជំរិតយកលុយពីពួកគាត់ដោយគ្មានការយោគយល់។ ប្រជាពលរដ្ឋដែលប្រមូលផ្តុំគ្នាតវ៉ាបានឲ្យដឹងថាពួកគាត់ដឹកទំនិញក្នុងមួយជើងនៅសល់កម្រៃមិនដល់២០០០០រៀលផងទេ ហើយបែរជាត្រូវមន្ត្រីគយក្រោមការគ្រប់គ្រងរបស់លោក ទី ប៊ុន ឡង់ ជំរិតយកលុយពីពួកគាត់ក្នុងមួយម៉ូតូពី១០០០០រៀល ទៅ២០០០០រៀល ដូច្នេះពួកគាត់ មានលុយឯណាសល់ទុកទិញអង្ករច្រកឆ្នាំង។ ពលរដ្ឋបានលើកឡើងថា មេគយច្រកទ្វារអន្តរជាតិព្រំ ខេត្តប៉ៃលិន មុនៗមិនដែលគាបសង្កត់ពួកគាត់ដល់ថ្នាក់ហ្នឹងទេប៉ុន្តែឥឡូវនេះលោក ទី ប៊ុនឡង់ កំពុងពុករលួយហួសហេតុតែម្តង។
ប្រភពខ្លះរិះគន់ថាដោយអាងមានខ្នងបង្អែករឹងមាំទើបលោក ទី ប៊ុនឡង់ ប្រធានការិយាល័យគយនិងរដ្ឋាករច្រកទ្វារអន្តរជាតិព្រំ ខេត្តប៉ៃលិន ប្រើអំណាចគាបសង្កត់យកលុយឈ្មួញនិងអាជីវករតូចតាចកាន់តែច្រើនដោយគ្មានការយោគយល់ឡើយ។ ផ្ទុយទៅវិញបែរជាលោក ទី ប៊ុនឡង់ បានឃុបឃិតបើដៃឲ្យឈ្មួញធំៗនាំទំនិញគេចពន្ធ ទំនិញបង់ពន្ធមិនគ្រប់និងទំនិញខុសច្បាប់ចូលតាមច្រកទ្វារ អន្តរជាតិព្រំ យ៉ាងគគ្រឹកគគ្រេងដើម្បីជាថ្នូរនឹងផលប្រយោជន៍ដោយគ្មានញញើតអ្វីទាំងអស់។ ហេតុនេះហើយទើបអាជីវករតូចតាចនិងពលរដ្ឋដែលប្រកបរបរនាំទំនិញពីទឹកដីសៀមចូល តាមច្រកទ្វារអន្តរជាតិព្រំ រិះគន់ខ្លាំងៗថាលោក ទី ប៊ុនឡង់ កំពុងតែប្រព្រឹត្តអំពើពុករលួយយ៉ាងគឃ្លើនព្រោះមានការឃុបឃិតបើកដៃពីលោក សំ សុវណ្ណារិទ្ធ មេគយខេត្តប៉ៃលិន។
