ខេត្តកំពង់ឆ្នាំង៖ពលរដ្ឋ និងសហគមន៍នេសាទនៅខេត្តកំពង់ឆ្នាំង ឲ្យដឹងថា បទល្មើសដាក់របាំងស្បៃមុង ឬអួនក្រឡាល្អិតក្នុងរដូវទឹកឡើងឆ្នាំនេះ បានកក្រើកឡើងវិញហើយនៃបឹងទន្លេសាប។ នៅដើមរដូវបិទនេសាទ ដែលទឹកបឹងទន្លេសាបចាប់ផ្ដើមឡើងបន្តិចម្ដងៗនោះ បទល្មើសដាក់របាំងសាច់អួន ត្រូវតំណាងសហគមន៍នេសាទ និងពលរដ្ឋនៅស្រុកកំពង់លែង ជលគីរី និងបរិបូរណ៍ ប្រាប់ថា តំបន់ពួកគេកំពុងមានបទល្មើស។ ជាក់ស្ដែងរបាំងសាច់អួនចំនួន ៨ខ្សែមានប្រវែងមិនក្រោម ១ពាន់ម៉ែត្រ ចាប់ពីចំណុចបឹងរៀល រហូតដល់ភូមិកោះក្អែក នៃឃុំកំពង់អុស ត្រូវបានគេដាក់ជាង ២ខែហើយ។ប្រធានគណៈកម្មការសហគមន៍នេសាទម្នាក់នៅស្រុកជលគីរី ដែលថ្លែងក្នុងលក្ខខណ្ឌសុំមិនបញ្ចេញឈ្មោះឲ្យដឹងថា ក្រៅពីរបាំងសាច់អួនទាំង ៨ខ្សែនេះ នៅមានជនល្មើសលួចកាប់ឆ្ការព្រៃលិចទឹកនៅតំបន់ក្បែរនោះជាច្រើនប្រឡោះវែងៗ ដើម្បីត្រៀមដាក់របាំងពេលទឹកទន្លេឡើងដល់។ បញ្ហានេះលោកធ្លាប់រាយការណ៍ជូនអាជ្ញាធរឃុំ និងជំនាញជលផលជាច្រើនដង តែពុំមានការទប់ស្កាត់ «អ្នកប្រព្រឹត្តបទល្មើសមានយ៉ាងច្រើនណាស់មានដប់នាក់។ ប៉ុន្តែប្រជាពលរដ្ឋដែលរកនេសាទនៅក្នុងហ្នឹងមានច្រើនរាប់រយគ្រួសារ។ អ៊ីចឹងគាត់ក៏ខឹងសម្បាយ៉ាងខ្លាំងដែរ ព្រោះអ្វីដែលគាត់ធ្វើមកធ្វើមិនបាន មើលទៅខាងសមត្ថកិច្ចអត់មានឃាត់ឃាំង។ ម្យ៉ាងគាត់ចេះតែរាយការណ៍ឲ្យអាជ្ញាធរភូមិ ឃុំ ហើយភូមិ ឃុំក៏មិនគិត អ៊ីចឹងគាត់អស់ទឹកចិត្តហើយ»។ប្រជានេសាទជាលក្ខណៈគ្រួសារនៅក្រុងកំពង់ឆ្នាំង ស្រុកបរិបូរណ៍ ស្រុកកំពង់លែង និងស្រុកជលគិរី បានបញ្ជាក់ថាបទល្មើសនេសាទប្រើឧបករណ៍ខុសច្បាប់ក្នុងមូលដ្ឋានពួកគាត់នៅតែបន្តកើតឡើងយ៉ាងរាលដាល ហើយមិនទាន់ឃើញមន្ត្រីរដ្ឋបាលជលផលនិងសមត្ថកិច្ចពាក់ព័ន្ធចាត់វិធានការបង្ក្រាបឡើយ។ សេចក្ដីរាយការណ៍បានឲ្យដឹងថាលោក សោម ភារុណ មេរដ្ឋបាលជលផលខេត្តកំពង់ឆ្នាំង គឺជាអ្នកបើកដៃឲ្យមន្ត្រីក្រោមឱវាទប្រមូលលុយចែកគ្នាធ្វើមានធ្វើបានទាំងនៅក្នុងរដូវបើកនេសាទ និងរដូវបិទនេសាទ។ ប្រភពពីប្រជានេសាទនៅឃុំពាមឆ្កោក ស្រុកជលគិរី បានឲ្យដឹងថា នៅក្នុងមូលដ្ឋានពួកគាត់មានជនជាតិយួនម្នាក់ឈ្មោះ ង្វៀង យ៉ាំងបូ គឺជាអ្នករត់ការបង់លុយឲ្យមន្ត្រីរដ្ឋបាលជលផលនិងសមត្ថកិច្ចពាក់ព័ន្ធដទៃទៀត ដើម្បីឲ្យបក្ខពួករបស់ខ្លួនអាចប្រើឧបករណ៍នេសាទខុសច្បាប់ចាប់ត្រីតាមចិត្ត។ ប្រភពបានឲ្យដឹងទៀតថា មន្ត្រីរដ្ឋបាលជលផលនិងសមត្ថកិច្ចពាក់ព័ន្ធក្នុងស្រុកជលគិរី សុទ្ធតែទទួលលុយពីជនជាតិយួនឈ្មោះ ង្វៀង យ៉ាំងបូ ហេតុនេះហើយទើបជនជាតិយួនអាចប្រើឧបករណ៍ខុសច្បាប់ដូចជា សម្រាស់ របាំងធ្នួស របាំងស្បៃមុង របាំងសាច់អួនក្រឡាញឹក និងឧបករណ៍ឆក់បំផ្លាញធនធានមច្ឆជាតិតាមអំពើចិត្ត។ ក្នុងខណៈដែលបទល្មើសនេសាទកើតឡើងយ៉ាងអនាធិបតេយ្យក្នុងតំបន់បឹងទន្លេសាបនៃស្រុកជលគិរី កើតឡើងយ៉ាងគគ្រឹកគគ្រេងខណៈលោក សោម ភារុណ មេរដ្ឋបាលជលផលខេត្តកំពង់ឆ្នាំង រក្សាភាពស្ងៀមស្ងាត់ព្រោះខ្លួនជាមេខ្លោងនៅពីក្រោយបទល្មើសនេសាទ។មន្ត្រីអាជ្ញាធរនិងពលរដ្ឋក្នុងឃុំពាមឆ្កោក ស្រុកជលគិរី ខេត្តកំពង់ឆ្នាំង បានឲ្យដឹងថាតាមរយៈរត់ការបង់លុយឲ្យមន្ត្រីជំនាញនិងសមត្ថកិច្ចពាក់ព័ន្ធ គឺជនជាតិយួនឈ្មោះ ង្វៀង យ៉ាំងបូ អាចប្រមូលលុយបានយ៉ាងច្រើនសម្រាប់ធ្វើមានធ្វើបានផ្ទាល់ខ្លួនទៀតផង។ មិនតែប៉ុណ្ណោះនៅចំពោះមុខមន្ត្រីអាជ្ញាធរ និងសមត្ថកិច្ចពាក់ព័ន្ធ ជនជាតិយួនឈ្មោះ ង្វៀង យ៉ាំងបូ តែងតែអួតអាងថាខ្លួនជាប្អូនធម៌លោក សោម ភារុណ មេរដ្ឋបាលជលផលខេត្តកំពង់ឆ្នាំង ហើយសមត្ថកិច្ចពាក់ព័ន្ធតែងតែជួនសម្របសម្រួលដើម្បីផលប្រយោជន៍។ ប្រជានេសាទជាលក្ខណៈគ្រួសារបានឲ្យដឹងថា មួយរយៈពេលចុងក្រោយនេះបទល្មើសប្រើរបាំងស្បៃមុងចាប់កូនត្រីតូចៗយកទៅធ្វើជាចំណីត្រីរ៉ស់ ត្រីឆ្ដោ កំពុងកើតឡើងយ៉ាងខ្លាំង។ចំណែកប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង លោក ងិន ហ៊ុននិងលោកសោមភារុណមិនអាចទាក់ទងទេព្រោះគ្មានលេខទូរស័ព្ទ។សារពត៌មានយើងរង់ចាំបកស្រាយរាល់ម៉ោងធើ្វការ៕
ចលនាសង្គម
