សមត្ថកិច្ចពាក់ព័ន្ធនៅច្រកជាំស្រងាំ ស្រុកអន្លង់វែង ខេត្តឧត្ដរមានជ័យ បានឲ្យដឹងថា បច្ចុប្បន្ននៅច្រកនេះឈ្មួញនាំចូលទំនិញគេចពន្ធនិងទំនិញបង់ពន្ធមិនគ្រប់យ៉ាងពេញបន្ទុក ព្រោះមេគយប្រចាំច្រកនេះគិតតែពីប្រមូលលុយតាមរបៀបពុករលួយ។ ឈ្មួញនិងអាជីវករតូចតាចដែលនាំទំនិញចូលតាមច្រកជាំស្រងាំ បានឲ្យដឹងថា សមត្ថកិច្ចគយប្រចាំច្រកនេះ បានគាបជំរិតយកលុយពីពួកគាត់កាន់តែច្រើនឡើងៗ ហើយគេបែរជាឃុបឃិតឲ្យឈ្មួញធំៗនាំចូលទំនិញគេចពន្ធ និងទំនិញបង់ពន្ធមិនគ្រប់ស្រេចតែអំពើចិត្ត។
សមត្ថកិច្ចពាក់ព័ន្ធនៅច្រកជប់គគីរ ស្រុកបន្ទាយអម្ពិល ខេត្តឧត្ដរមានជ័យ បានឲ្យដឹងថា មួយរយៈកន្លងទៅនេះឈ្មួញមួយចំនួនបាននាំចូលទំនិញគេចពន្ធ និងទំនិញបង់ពន្ធមិនគ្រប់កាន់តែច្រើន ដែលជាហេតុធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ បញ្ហានេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ គួរចាត់វិធានការត្រួតពិនិត្យឡើងវិញខ្លះផង ព្រោះលោក គុណ ញឹម ដែលជាអគ្គនាយកនៃអគ្គនាយកដ្ឋានគយ និងរដ្ឋាករ មិនចាត់វិធានការទប់ស្កាត់ទង្វើមិនប្រក្រតីរបស់សមត្ថកិច្ចគយក្នុងខេត្តឧត្ដរមានជ័យនោះទេ។ លើសនេះទៅទៀតការដែលមន្ត្រីគយប្រចាំច្រកជប់គគីរ ហ៊ានធ្វើអ្វីៗតាមអំពើចិត្តគឺមានការឃុបឃិតបើកដៃពីលោក យូ ហេង ប្រធានសាខាគយខេត្តឧត្ដរមានជ័យផងដែរ ទើបអ្វីៗអាចប្រព្រឹត្តទៅដោយរលូន។
ប្រភពបានឲ្យដឹងទៀតថា ការដែលមេគយច្រកជាំស្រងាំ ប្រព្រឹត្តអំពើពុករលួយដោយគ្មានញញើតអ្វីទាំងអស់ គឺមានការឃុបឃិតបើកដៃពីលោក យូ ហេង ប្រធានសាខាគយខេត្តឧត្ដរមានជ័យ លោក យូ ហេង ដែលកំពុងតែសម្ងំទទួលផលប្រយោជន៍យ៉ាងស្ងៀមស្ងាត់។
ដោយឡែកលោក គួន សុភាព មេគយប្រចាំច្រកអូរស្មាច់ ត្រូវបានប្រជាពលរដ្ឋនិងអាជីវករតូចតាចរិះគន់ថា ប្រើអំណាចជំរិតយកលុយពីពួកគាត់ដែលនាំចូលទំនិញបន្តិចបន្តួចពីទឹកដីសៀមដោយគ្មានការយោគយល់ឡើយ។ ទន្ទឹមនឹងនេះបែរជាលោក គួន សុភាព ឃុបឃិតជាមួយលោក ខូង ទីន មេនគរបាលអន្តោប្រវេសន៍ច្រកទ្វារអន្តរជាតិអូរស្មាច់ និងសមត្ថកិច្ចពាក់ព័ន្ធដទៃទៀតបើកដៃឲ្យឈ្មួញនាំចូលទំនិញគេចពន្ធនិងទំនិញបង់ពន្ធមិនគ្រប់កាន់តែច្រើនឡើងៗ។ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ដូចជាលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មិនគួរមើលរំលងអំពើពុករលួយរបស់មេគយប្រចាំច្រកជប់គគីរ ច្រកអូរស្មាច់ និងច្រកជាំស្រងាំ ក្នុងខេត្តឧត្ដរមានជ័យនោះទេ៕
