លោក អ៊ី ចំរើន មេនគរបាលអន្តោប្រវេសន៍ប្រចាំច្រលទ្វារអន្តរជាតិអូរយ៉ាដាវ ដែលល្បីល្បាញខាងបើកដៃឲ្យឈ្មួញដឹកជញ្ជូនឈើចេញទៅស្រុកយួននោះ កំពុងប្រ ឈមនឹងការរិះគន់ពីរឿងគាបយកលុយពីពលរដ្ឋដែលដឹកកសិផលចេញទៅស្រុកយួនតាម ច្រកទ្វារអន្តរជាតិអូរយ៉ាដាវ ស្រេចតែអំពើចិត្ត។ ទង្វើរបស់លោក អ៊ី ចំរើន ក្នុងការគាបយក លុយពីពលរដ្ឋដឹកជញ្ជូនកសិផលទៅស្រុកយួន គឺជាការបំពានទៅលើបទបញ្ជារបស់ប្រមុខ រាជរដ្ឋាភិបាលយ៉ាងគឃ្លើនហើយជាអំពើពុករលួយ ។ ដូច្នេះក្រសួងនិង ស្ថាប័នពាក់ព័ន្ធមិនគួរទុកឲ្យលោក អ៊ី ចំរើន ប្រើអំណាចធ្វើអ្វីៗតាមអំពើចិត្តទៀតទេ ជាពិ សេសពាក់ព័ន្ធបទល្មើសព្រៃឈើ។
បច្ចុប្បន្នឈ្មួញជាច្រើននាក់នៅតែអាចបន្តសកម្មភាពដឹកជញ្ជូនឈើឆ្លងកាត់ខេត្តស្ទឹងត្រែង ចូលខេត្តរតនគិរី ហើយចេញទៅស្រុកយួនតាមច្រកទ្វារអន្តរជាតិអូរយ៉ាដាវ យ៉ាងពេញបន្ទុកព្រោះមានការឃុបឃិតបើកដៃពីលោក អ៊ី ចំរើន ដែលជាមេនគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ។ ហេតុនេះហើយទើបមានការអំពាវនាវឲ្យលោក នេត សាវឿន អគ្គស្នងការនគរបាលជាតិ ចាត់វិធានការទៅលើលោក អ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវ ជាបន្ទាន់ដើម្បីកុំឲ្យមន្ត្រីនគរបាលរូបនេះឃុបឃិតបើកដៃឲ្យឈ្មួញដឹកជញ្ជូនឈើចេញទៅស្រុកយួនតាមអំពើចិត្តទៀត។ ប្រភពខ្លះបានឲ្យដឹងថាលោក អ៊ី ចំរើន ដែលអាងមានខ្នងបង្អែកយ៉ាងរឹងមាំ នៅក្នុងអគ្គនាយកដ្ឋានអន្តោប្រវេសន៍ក្រសួងមហាផ្ទៃ បានឃុបឃិតបើដៃឲ្យឈ្មួញដឹកជញ្ជូនឈើទៅស្រុកយួនក្នុងមួយថ្ងៃៗពី៤០០ទៅ៥០០ម៉ែត្រគូប ហើយអាចប្រមូលលុយបានយ៉ាងច្រើនសន្ធឹកសន្ធាប់ ក្នុងនោះក៏មានការបែងចែកទៅមេៗខាងលើមួយផ្នែកធំផងដែរទើបថ្នាក់លើរក្សាភាពស្ងប់ស្ងាត់។
ប្រភពពីមន្ត្រីរាជការសកម្មជនព្រៃឈើនិងប្រជាសហគមន៍ការពារព្រៃឈើក្នុងខេត្តរតនគិរី បានរាយការណ៍ថារហូតមកដល់ពេលនេះបទល្មើសកាប់ឈើនិងដឹកជញ្ជូនឈើខុសច្បាប់ចេញ ទៅស្រុកយួននៅតែកើតឡើងយ៉ាងពេញបន្ទុកដោយពុំមានមន្ត្រីអាជ្ញាធរ មន្ត្រីជំនាញនិងសមត្ថកិច្ចពាក់ព័ន្ធណាចាត់វិធានការបង្ក្រាបឬទប់ស្កាត់ឡើយ។ ចំណែកលោក ថង សាវុន អភិបាលខេត្តរតនគិរី និងលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី គិតតែពីរឿងប្រមូលលុយដាក់ហោប៉ៅ ហើយមិនខ្វល់ពីរឿងព្រៃឈើដែលកំពុងតែប្រឈមនឹងការបំ ផ្លាញយ៉ាងមហន្តរាយនោះទេ។ មានការរិះគន់ខ្លាំងៗថា លោក អ៊ី ចំរើន មេនគរបាលអន្តោប្រវេសន៍ប្រចាំច្រកទ្វារអន្តរជាតិអូរយ៉ាដាវ កំពុងប្រើអំណាចឃុបឃិតឲ្យឈ្មួញមិនតិចជាង២០នាក់ដឹកជញ្ជូនឈើឆ្លងកាត់ច្រកអូរយ៉ាដាវ ចេញទៅស្រុកយួនដើម្បីជាថ្នូរនឹងផលប្រយោជន៍ព្រោះលោក អ៊ី ចំរើន មានសិទ្ធិសម្រេចធំជាងគេក្នុងចំណោមសមត្ថកិច្ចជាច្រើនស្ថាប័នទៀត នៅច្រកទ្វារអន្តរជាតិអូរយ៉ាដាវ។ អ្វីដែលអាក្រក់បំផុតនោះគឺលោក អ៊ី ចំរើន ប្រើអំណាចជំរិត យកលុយពីពលរដ្ឋដែលដឹកកសិផលដូចជាដំឡូងមី ពោត សណ្តែក ចេញទៅស្រុកយួន ដោយពុំមានយោគយល់ឡើយ ៕
