ប្រភពពីប្រជាពលរដ្ឋរស់នៅឃុំត្រពាំងស្រែ ស្រុកស្នួល ខេត្តក្រចេះ បានឲ្យដឹងថា រយៈពេលប្រមាណ១សប្ដាហ៍កន្លងទៅនេះក្នុងមួយថ្ងៃៗឈ្មួញដឹកជញ្ជូនខ្សាច់ពីក្រុងក្រចេះ ចេញទៅស្រុកយួនតាមរថយន្តធំៗពី៣០ទៅ៤០គ្រឿងបន្តកន្ទុយគ្នា។ តាមសេចក្ដីរាយការណ៍ខ្លះបានឲ្យដឹងថា ឈ្មួញដឹកជញ្ជូនខ្សាច់ទៅស្រុកយួនត្រូវបង់លុយឲ្យមន្ត្រីជំនាញនិងសមត្ថកិច្ចពាក់ព័ន្ធតាមការកំណត់ទើបអាចចៀសផុតពីការទប់ស្កាត់។ ដូច្នេះលោក ស៊ុយ សែម រដ្ឋមន្ត្រីក្រសួងរ៉ែ និងថាមពល មិនគួរបណ្ដែតបណ្ដោយតទៅទៀតទេ ហើយត្រូវចាត់វិធានការទប់ស្កាត់ជាបន្ទាន់កុំឲ្យលោក សុខ គិរីរ័ត្ន ប្រធានមន្ទីររ៉ែ និងថាមពលខេត្តក្រចេះ ឃុបឃិតបើកដៃឲ្យឈ្មួញធ្វើអ្វីៗតាមអំពើចិត្តទៀត។
ប្រភពពីប្រជាពលរដ្ឋនៅខេត្តក្រចេះ បានឲ្យដឹងថា មួយរយៈកន្លងទៅនេះមានឈ្មួញធ្វើសកម្មភាពដឹកជញ្ជូនខ្សាច់ចេញទៅស្រុកយួនតាមច្រកព្រំដែនត្រពាំងស្រែ ស្រុកស្នួល ខេត្តក្រចេះ ក្នុងមួយថ្ងៃៗពី៣០ទៅ៤០រថយន្តធំៗ។ ហេតុនេះហើយទើបប្រជាពលរដ្ឋអំពាវនាវឲ្យលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ពិនិត្យមើលទង្វើមិនប្រក្រតីរបស់លោក សុខ គិរីរ័ត្ន ប្រធានមន្ទីររ៉ែ និងថាមពលខេត្តក្រចេះ ជាបន្ទាន់ដើម្បីកុំឲ្យធ្វើអ្វីៗតាមអំពើចិត្តទៀត។ បើមិនដូច្នេះទេលោក សុខ គិរីរ័ត្ន ប្រធានមន្ទីររ៉ែ និងថាមពលខេត្តក្រចេះ បណ្ដោយឲ្យឈ្មួញដឹកជញ្ជូនខ្សាច់ទៅស្រុកយួនកាន់តែច្រើនថែមទៀតដើម្បីជាថ្នូរនឹងផលប្រយោជន៍។
ប្រភពពីមន្ត្រីរាជការក្នុងខេត្តក្រចេះ បានឲ្យដឹងថា បើគ្មានការបើកដៃពីលោក សុខ គិរីរ័ត្ន ប្រធានមន្ទីររ៉ែ និងថាមពលខេត្តក្រចេះទេនោះ គឺឈ្មួញមិនហ៊ានធ្វើសកម្មភាពដឹកខ្សាច់ចេញទៅស្រុកយួនតាមច្រកត្រពាំងស្រែ-វ៉ាលឺ ស្រុកស្នួល ខេត្តក្រចេះ យ៉ាងពេញបន្ទុកដូចសព្វថ្ងៃនេះឡើយ។ ប្រភពបានឲ្យដឹងទៀតថា ការដែលឈ្មួញប្រើប្រាស់រថយន្តធំៗដឹកខ្សាច់ចេញពីក្រុងក្រចេះ សំដៅទៅច្រកព្រំដែនត្រពាំងស្រែ ដើម្បីយកទៅលក់ឲ្យឈ្មួញនោះគឺមានការឃុបឃិតជាប្រព័ន្ធ ហើយលោក សុខ គិរីរ័ត្ន ប្រធានមន្ទីររ៉ែ និងថាមពលខេត្តក្រចេះ ជាអ្នកទទួលខុសត្រូវធំជាងគេ។ ទន្ទឹមនឹងនេះសមត្ថកិច្ចជាច្រើនស្ថាប័ននៅច្រកត្រពាំងស្រែ ក៏ជាអ្នកទទួលផលប្រយោជន៍ពីការបើកបារ៉ាស់ឲ្យឈ្មួញដឹកជញ្ជូនខ្សាច់ឆ្លងដែនចេញទៅស្រុកយួន៕
