មជ្ឈដ្ឋាននានាបានលើកឡើងថា ប្រសិនបើសមត្ថកិច្ចកាំកុងត្រូលប្រចាំច្រករបៀង ឬច្រកព្រំដែនត្រួតពិនិត្យគុណភាពគ្រឿងឧបភោគបរិភោគ ចំណីអាហារ និងបន្លែបង្ការមុនពេលអនុញ្ញាតឲ្យឈ្មួញនាំចូលពីប្រទេសសៀមឬប្រទេសយួននោះ គឺមន្ត្រីកាំកុងត្រូលតាមបណ្ដាខេត្តនានាមិនចាំបាច់ចុះត្រួតពិនិត្យគុណភាពទំនិញនៅតាមទីផ្សារនោះទេ។ ជាងនេះទៅទៀតក្រសួងពាក់ព័ន្ធគួរចាត់វិធានការទប់ស្កាត់កុំឲ្យឈ្មួញនាំចូលបន្លែបង្ការពីប្រទេសជិតខាងច្រើនហួសហេតុពេក ព្រោះអាចធ្វើឲ្យប៉ះពាល់ដល់តម្លៃបន្លែបង្ការដែលប្រជាកសិករខ្មែរដាំនៅក្នុងស្រុក។ ជាពិសេសលោក ម៉ក់ ពេជ្ជរិទ្ធ អគ្គនាយកនៃអគ្គនាយកដ្ឋានកាំកុងត្រូល ក្រសួងពាណិជ្ជកម្ម គួរពិនិត្យមើលភាពអសកម្មរបស់មន្ត្រីកាំកុងត្រូលប្រចាំច្រកព្រំដែន និងច្រករបៀងនៅទូទាំងប្រទេសផងដែរ ព្រោះអីមកពីពួកគេប្រព្រឹត្តអំពើពុករលួយទើបឈ្មួញអាចនាំចូលគ្រឿងឧបភោគបរិភោគ ចំណីអាហារខូចគុណភាព ឬហួសកាលកំណត់ប្រើប្រាស់ក៏ដូចជាបន្លែបង្ការដែលមានផ្ទុកសារធាតុគីមីមកលក់ចែកចាយពេញទីផ្សារស្រុកខ្មែរ។
មួយរយៈកន្លងទៅនេះបន្លែបង្ការដែលឈ្មួញនាំចូលតាមច្រកព្រំដែនក្នុងខេត្តរតនគិរី ខេត្តកំពត និងខេត្តតាកែវជាដើម ត្រូវបានមន្ត្រីកាំកុងត្រូលរកឃើញថាមានផ្ទុកសារធាតុគីមីដែលនាំឲ្យប៉ះពាល់ដល់សុខភាពពលរដ្ឋទិញបន្លែបង្ការទាំងនោះយកទៅទទួលទាន។ ជាងនេះទៅទៀតសូម្បីតែគ្រឿងសមុទ្រដូចជា បង្គា មឹក និងក្ដាមជាដើម ក៏មន្ត្រីកាំកុងត្រូលពិនិត្យឃើញមានដាក់សារធាតុគីមីដើម្បីរក្សាគុណភាពទុកឲ្យបានយូរផងដែរ ក៏ប៉ុន្តែរហូតមកដល់ពេលនេះមិនទាន់ឃើញក្រសួងនិងស្ថាប័នពាក់ព័ន្ធចាត់វិធានការទប់ស្កាត់នៅឡើយទេ។ មន្ត្រីកាំកុងត្រូលប្រចាំច្រកព្រំដែននិងច្រករបៀងជាប់ជាមួយប្រទេសយួន និងប្រទេសសៀម ត្រូវគេរិះគន់ថាមិនអនុវត្តន៍តាមតួនាទីរបស់ខ្លួនក្នុងការត្រួតពិនិត្យគុណភាព គ្រឿងឧបភោគបរិភោគ និងបន្លែបង្ការមុនពេលអនុញ្ញាតឲ្យឈ្មួញនាំចូល។
កាលពីថ្ងៃទី១៩ ខែកក្កដា ឆ្នាំ២០១៧ មន្ត្រីកាំកុងត្រូលខេត្តកំពង់ស្ពឺ បានចុះត្រួតពិនិត្យគុណភាពទំនិញជាគ្រឿងឧបភោគបរិភោគនិងបន្លែបង្ការជាច្រើនមុខ ដែលក្រុមអាជីវករដាក់លក់នៅលើទីផ្សារដោយបានពិសោធន៍ទៅលើទំនិញប្រហែល៤០មុខ។ នៅក្នុងការត្រួតពិនិត្យនោះមន្ត្រីកាំកុងត្រូលខេត្តកំពង់ស្ពឺ បានរកឃើញបន្លែបង្ការ៥មុខមានជាតិថ្នាំពុលដែលអាចបង្កផលប៉ះពាល់ដល់សុខភាពពលរដ្ឋខ្មែរជាអ្នកទិញបន្លែបង្ការទាំងនោះទៅធ្វើម្ហូប។ បន្លែបង្ការទាំង៥មុខដែលមានជាតិថ្នាំពុលបំផ្លាញសុខភាពអ្នកទទួលទានដែលមន្ត្រីកាំកុងត្រូលបានរកឃើញ គឺសាឡាត់ ស្លឹកគិនឆាយ ផ្កាគិនឆាយ ដើមខាត់ណា និងខ្ទឹមស។ ប្រការនេះបានធ្វើឲ្យប្រជាពលរដ្ឋទូទៅមានសេចក្ដីព្រួយបារម្ភយ៉ាងខ្លាំងចំពោះផលប៉ះពាល់ដល់សុខភាព ហើយជំរុញឲ្យសមត្ថកិច្ចតាមច្រកព្រំដែន និងច្រករបៀងត្រួតពិនិត្យឲ្យបានត្រឹមត្រូវមុនពេលអនុញ្ញាតឲ្យឈ្មួញនាំចូលបន្លែបង្ការ និងគ្រឿងឧបភោគបរិភោគមកលក់ចែកចាយក្នុងទីផ្សារស្រុកខ្មែរ៕
