ប្រភពពីមន្ត្រីអាជ្ញាធរឃុំចុងផ្លាស់ បានឲ្យដឹងថា ចាប់តាំងពីមានវត្តមានក្រុមហ៊ុន រ៉ុងឆេង ចុះមកស្រាវជ្រាវរុករករ៉ែក្នុងអំឡុងឆ្នាំ២០០៥រហូតដល់បច្ចុប្បន្ន គឺក្រុមហ៊ុននេះតែងតែបំពានលើការរស់នៅរបស់ប្រជាពលរដ្ឋខ្មែរយ៉ាងកំរោល។ មន្ត្រីអាជ្ញាធរឃុំចុងផ្លាស់ បានឲ្យដឹងទៀតថាក្រុមហ៊ុន រ៉ុងឆេង បំពានលើទីតាំងរ៉ែមាសជាលក្ខណៈគ្រួសាររបស់ពលរដ្ឋក្នុងឃុំចុងផ្លាស់ជាបន្តបន្ទាប់ ហេតុនេះហើយទើបប្រជាពលរដ្ឋតវ៉ាដើម្បីឲ្យក្រសួងពាក់ព័ន្ធចាត់វិធានការទប់ស្កាត់ទង្វើមិនប្រក្រតីរបស់ក្រុមហ៊ុន រ៉ុងឆេង ជាបន្ទាន់។ ទន្ទឹមនឹងនេះមន្ត្រីអាជ្ញាធរ និងប្រជាពលរដ្ឋឃុំចុងផ្លាស់ អំពាវនាវឲ្យលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ក៏ដូចជារាជរដ្ឋាភិបាលកម្ពុជា បញ្ឈប់អាជីវកម្មរបស់ក្រុមហ៊ុន រ៉ុងឆេង ជាស្ថាពរដើម្បីកុំឲ្យក្រុមហ៊ុននេះប្រើអំណាចបំពានលើសិទ្ធិរស់នៅរបស់ប្រជាពលរដ្ឋក្នុងឃុំចុងផ្លាស់ ស្រុកកែវសីមា ខេត្តមណ្ឌលគិរី យ៉ាងកំរោលតទៅទៀត។
មន្ត្រីអង្គការក្រៅរដ្ឋាភិបាលនិងមជ្ឈដ្ឋាននានាបានកត់សម្គាល់ថា នៅពេលក្រុមហ៊ុនចិនទទួលបានអាជ្ញាប័ណ្ណស្រាវជ្រាវរុករ៉ែឬទទួលបានដីសម្បទានសេដ្ឋកិច្ចក្នុងតំបន់ណាមួយនោះ តែងតែបង្កផលប៉ះពាល់ដល់ការរស់នៅរបស់ពលរដ្ឋខ្មែរ។ ជាងនេះទៅទៀតក្រុមហ៊ុនចិនមួយចំនួនបានបំផ្លាញព្រៃឈើនិងធនធានរ៉ែរបស់ខ្មែរយ៉ាងមហន្តរាយ ដោយសារតែមានការឃុបឃិតជាមួយមន្ត្រីពុករលួយដែលគិតតែពីរឿងផលប្រយោជន៍ ហើយរដ្ឋាភិបាលលោក ហ៊ុន សែន មិនចាត់វិធាការទប់ស្កាត់នោះទេ។ ជាក់ស្ដែងថ្មីៗនេះក្រុមហ៊ុនចិនដែលទទួលបានសិទ្ធិរុករករ៉ែមាសនៅឃុំចុងផ្លាស់ ស្រុកកែវសីមា ខេត្តមណ្ឌលគិរី កំពុងបំពានលើរណ្ដៅរ៉ែមាសជាលក្ខណៈគ្រួសាររបស់ពលរដ្ឋខ្មែរ៤កន្លែងធ្វើឲ្យប្រជាពលរដ្ឋក្នុងឃុំចុងផ្លាស់ ប្រមូលផ្ដុំគ្នាតវ៉ាឲ្យអាជ្ញាធរជួយដោះស្រាយជាបន្ទាន់។
ប្រភពពីប្រជាពលរដ្ឋនៅឃុំចុងផ្លាស់ ដែលធ្វើអាជីវកម្មរ៉ែមាសជាលក្ខណៈគ្រួសារបានឲ្យដឹងថា កាលពីពេលថ្មីៗនេះពួកគាត់ប្រមូលផ្ដុំគ្នានៅមុខសាលាឃុំដើម្បីសុំអន្តរាគមន៍ពីក្រសួងរ៉ែ និងថាមពល ក៏ដូចជាពីប្រមុខរាជរដ្ឋាភិបាលដើម្បីឲ្យទប់ស្កាត់ករណីក្រុមហ៊ុនសិក្សាស្រាវជ្រាវរ៉ែឈ្មោះ រ៉ុងឆេង របស់ចិនដែលធ្វើឲ្យប៉ះពាល់ដល់រណ្ដៅរ៉ែមាសរបស់ពួកគាត់ចំនួន៤កន្លែង។ ប្រជាពលរដ្ឋដែលប្រមូលផ្ដុំគ្នាតវ៉ានៅមុខសាលាឃុំចុងផ្លាស់ បានបញ្ជាក់ថា ពួកគាត់ធ្វើអាជីវកម្មរ៉ែមាសច្រើនឆ្នាំមកហើយដើម្បីរកប្រាក់ចំណូលចិញ្ចឹមជីវិត ព្រោះតំបន់នេះពិបាកក្នុងការដាំដំណាំផ្សេងៗ។ ក៏ប៉ុន្តែបច្ចុប្បន្នអាជីវកម្មរ៉ែមាសរបស់ពួកគាត់កំពុងប្រឈមនឹងការលំបាកដោយសារក្រុមហ៊ុនចិនឈ្មោះ រ៉ុងឆេង ចេះតែបំពានលើទីតាំងអាជីវកម្មរ៉ែមាសរបស់ពួកគាត់ជាបន្តបន្ទាប់ ហេតុនេះហើយទើបពួកគាត់តវ៉ាទាមទារឲ្យថ្នាក់ដឹកនាំក្រសួងរ៉ែ និងថាមពល ជួយដោះស្រាយ៕
