ខេត្តសៀមរាប៖តាមប្រភពចេញពីមន្ត្រីរាជការនៅក្នុងអង្គភាពរតនាគារខេត្តសៀមរាបបានអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើការស៊ើបអង្កេតទៅលើរឿងអាស្រូវពុករលួយរបស់លោក ចាន់ ភត្រា ប្រធានរតនាគារខេត្តសៀមរាប ជាបន្ទាន់។
ដោយហេតុថារយៈពេលច្រើនឆ្នាំកន្លងទៅនេះលោក ចាន់ ភត្រា និងបក្ខពួកមួយក្ដាប់តូចបានឃុបឃិតគ្នាប្រព្រឹត្តអំពើពុករលួយកាត់ភាគរយពីគម្រោងចំណាយរបស់មន្ទីរអង្គភាពនានាជុំវិញសាលាខេត្តសៀមរាប ស្រេចតែអំពើចិត្ត។
បើតាមប្រភពខ្លះបានឲ្យដឹងថាការដែលលោក ចាន់ ភត្រា ហ៊ានធ្វើអ្វីៗស្រេចតែអំពើចិត្តគឺដោយសារអាងមានលោក វង្ស ប៊ុនឥន្ទ្រាវុធ អគ្គនាយករតនាគារជាតិ ជាខ្នងបង្អែកយ៉ាងរឹងមាំដែលចាំការពារកំហុសរបស់លោក ចាន់ ភត្រា គ្រប់ពេលវេលា។
តាមការបង្ហើបពីមន្ត្រីក្នុងអង្គភាពរតនាគារខេត្តសៀមរាប បានឲ្យដឹងទៀតថាលោក ចាន់ ភត្រា ព្រមទាំងបក្ខពួកកំពុងប្រព្រឹត្តអំពើពុករលួយក្រោមរូបភាពកាត់លុយទឹកតែពីគម្រោងចំណាយផ្សេងៗរបស់មន្ទីរ អង្គភាព រដ្ឋបាលស្រុក-ក្រុង និងឃុំ-សង្កាត់ សរុបទៅក្នុងមួយឆ្នាំៗរាប់រយលានរៀលដោយគ្មានញញើតអ្វីទាំងអស់។
លុយទឹកតែទាំងនោះត្រូវបានលោក ចាន់ ភត្រា និងបក្ខពួកប្រមូលតាមរបៀបជួយសម្រួលឯកសារដកសាច់ប្រាក់ពីមន្ទីរ អង្គភាព ស្ថាប័នរដ្ឋ និងក្រុមហ៊ុនមួយចំនួនដែលត្រូវដកលុយចេញពីរតនាគារយកទៅចំណាយលើគម្រោងផ្សេងៗ។
ប្រសិនបើសាមីមន្ទីរ អង្គភាព រដ្ឋបាល ឃុំ-សង្កាត់ ស្រុក-ក្រុង ឬក្រុមហ៊ុននានាមិនចំណាយលុយទឹកតែតាមការកំណត់ទេនោះ ត្រូវប្រឈមនឹងភាពយឺតយ៉ាវជាមិនខាន ហេតុនេះហើយទើបគេសុខចិត្តកាត់ភាគរយឲ្យលោក ចាន់ ភត្រា និងបក្ខពួកដែលប្រើតួនាទីប្រមូលលុយតាមរបៀបពុករលួយ។
តាមការបើកកកាយពីមន្ត្រីនៅក្នុងអង្គភាពរតនាគារខេត្តសៀមរាប បានឲ្យដឹងថាលោក ចាន់ ភត្រា ប្រើតួនាទីប្រមូលលុយធ្វើមានធ្វើបានជាយូរមកហើយដោយសារអាងមានខ្នងបង្អែកយ៉ាងរឹងមាំនៅខាងលើចាំជួយដោះស្រាយគ្រប់ពេលវេលា។
ប្រភពបានឲ្យដឹងទៀតថា រាល់គម្រោងចំណាយគ្រប់ជំពូកសម្រាប់មន្ទីរ អង្គភាព និងស្ថាប័ននានាក្នុងខេត្តសៀមរាប ដែលត្រូវដកលុយពីរតនាគារ សុទ្ធតែចំណាយលុយទឹកតែ៥ភាគរយទើបអាចដកយកលុយទាំងនោះទៅប្រើប្រាស់តាមគម្រោងជាក់ស្ដែង។ សូម្បីតែថវិកាសម្រាប់អភិវឌ្ឍន៍ឃុំ-សង្កាត់ ដែលត្រូវដកពីរតនាគារខេត្តសៀមរាប ក៏ត្រូវលោក ចាន់ ភត្រា និងបក្ខពួកប្រើវិធីកេងប្រវ័ញ្ចយ៉ាងគឃ្លើនផងដែរ។
ភាពមិនប្រក្រតីនៃអំពើពុករលួយរបស់លោក ចាន់ ភត្រា និងបក្ខពួកដូចខាងលើនេះហើយ ទើបមានការអំពាវនាវឲ្យលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បើកការស៊ើបអង្កេតជាបន្ទាន់ ដើម្បីទប់ស្កាត់កុំឲ្យក្រុមមន្ត្រីពុករលួយធ្វើអ្វីៗស្រេចតែអំពើចិត្តតទៅទៀត។
មន្ត្រីពុករលួយជាច្រើននាក់ដែលឃុបឃិតជាមួយលោក ចាន់ ភត្រា មានដូចជា លោក ឈុយ ឡែម ប្រធានរដ្ឋបាល, លោក ប្រាក់ ស៊ីវត្ថា ប្រធានគណនេយ្យថ្នាក់ជាតិ និងលោក សេង កុក អនុប្រធានរតនាគារខេត្តសៀមរាប។
លោក ចាន់ ភត្រា បានឃុបឃិតបើកដៃឲ្យមន្ត្រីប៉ុន្មាននាក់នេះប្រព្រឹត្តអំពើពុករលួយប្រមូលលុយចែកគ្នាធ្វើមានធ្វើបានយ៉ាងគឃ្លើន ដូច្នេះអគ្គទេសាភិបាលធនាគារជាតិនៃកម្ពុជា មិនគួរមើលរំលងអំពើពុករលួយរបស់លោក ចាន់ ភត្រា ប្រធានរតនាគារខេត្តសៀមរាប និងបក្ខពួកនោះទេ៕
