ប្រជាពលរដ្ឋនៅក្នុងស្រុកកូនមុំ បានអំពាវនាវឲ្យលោក ថង សាវុន ជាអភិបាលខេត្តរតនគិរី និងលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី ព្រមទាំងប្រធានមន្ទីរបរិស្ថានខេត្តរតនគិរី ពិនិត្យមើលភាពមិនប្រក្រតីលោក គឹម រស្មី មេបញ្ជាការកងរាជអាវុធហត្ថខេត្តរតនគិរី ។ បើមិនដូច្នេះទេព្រៃការពាររបស់រដ្ឋទំហំប្រមាណ១០០០ហិកតានឹងក្លាយជាកម្មសិទ្ធិរបស់លោក គឹម រស្មី នាពេលឆាប់ៗខាងមុខនេះព្រោះមន្ត្រីអាជ្ញាធរមូលដ្ឋានមិនហ៊ានប៉ះពាល់លោក គឹម រស្មី ឡើយ។ ទន្ទឹមនឹងនេះក្រសួងពាក់ព័ន្ធក៏គួរពិនិត្យឡើងវិញផងដែរ ហើយចាត់វិធានការទប់ស្កាត់ជាបន្ទាន់ដើម្បីកុំឲ្យលោក គឹម រស្មី មេបញ្ជាការកងរាជអាវុធហត្ថខេត្តរតនគិរី ប្រើអំណាចធំធេងទន្ទ្រានកាន់កាប់ដីព្រៃរបស់រដ្ឋយកធ្វើជាកម្មសិទ្ធិតាមអំពើចិត្តទៀត។
កន្លងមកលោក គឹម រស្មី មេបញ្ជាការកងរាជអាវុធហត្ថខេត្តរតនគិរី ធ្លាប់ត្រូវបានសកម្មជនព្រៃឈើនិងប្រជាសហគមន៍នៅក្នុងស្រុកកូនមុំ ខេត្តរតនគិរី រិះគន់ពីរឿងជាប់ពាក់ព័ន្ធករណីឃុបឃិតឲ្យឈ្មួញដឹកជញ្ជូនឈើចេញទៅស្រុកយួន។ ឥឡូវនេះលោក គឹម រស្មី កំពុងប្រឈមនឹងការរិះគន់យ៉ាងខ្លាំងទាក់ទងទៅនឹងករណីឈូសឆាយទន្ទ្រានដីព្រៃក្នុងស្រុកកូនមុំ ជាច្រើនហិកតាយកធ្វើជាកម្មសិទ្ធិផ្ទាល់ខ្លួនដោយគ្មានញញើតអ្វីទាំងអស់។ ជុំវិញបញ្ហានេះថ្នាក់ដឹកនាំកងរាជអាវុធហត្ថលើផ្ទៃប្រទេសមិនគួរបណ្ដែតបណ្តោដោយតទៅទៀតទេ ព្រោះទង្វើរបស់លោក គឹម រស្មី កំពុងធ្វើឲ្យប៉ះពាល់ដល់កេរ្តិ៍ឈ្មោះស្ថាប័នកងរាជអាវុធហត្ថលើផ្ទៃប្រទេសទាំងមូល។
ប្រភពពីប្រជាពលរដ្ឋនៅស្រុកកូនមុំ បានឲ្យដឹងថាដីព្រៃជាច្រើនរយហិកតានៅចំណុចដីឡូត៍៩៥ជាកន្លែងអភិរក្សរបស់រដ្ឋក្នុងស្រុកកូនមុំ ត្រូវអ្នកមានអំណាចប្រើគ្រឿងចក្រឈូសឆាយយកធ្វើជាកម្មសិទ្ធិផ្ទាល់ខ្លួន ។ ប្រជាពលរដ្ឋបានលើកឡើងទៀតថា ដីព្រៃដែលកំពុងត្រូវគេប្រើគ្រឿងចក្រឈូសឆាយទន្ទ្រានយកធ្វើជាកម្មសិទ្ធិនោះ គឺជារបស់លោក គឹម រស្មី មេបញ្ជាការកងរាជអាវុធហត្ថខេត្តរតនគិរី។ មន្ត្រីអាជ្ញាធរមូលដ្ឋានក្នុងស្រុកកូនមុំ បានបង្ហើបឲ្យដឹងថាមេបញ្ជាការរងកងរាជអាវុធហត្ថស្រុកកូនមុំម្នាក់ ឈ្មោះ រស់ វណ្ណា គឺជាអ្នករត់ការបង់លុយជូនសមត្ថកិច្ចពាក់ព័ន្ធទើបលោក គឹម រស្មី មេបញ្ជាការងកងរាជអាវុធហត្ថខេត្តរតនគិរី អាចប្រើអំណាចឈូសឆាយទន្ទ្រានកាន់កាប់ដីព្រៃរបស់រដ្ឋលើគម្រោងប្រមាណជាង១០០០ហិកតា៕
