លោក ហ៊ុន សែន បានប្តេជ្ញាជាថ្មីម្តងទៀតថា នឹងមិនអត់ឱនឬយោគយល់ចំពោះមន្ត្រីពុករលួយណាម្នាក់ឡើយ ដូច្នេះភាពអសកម្មនិងអំពើពុករលួយរាប់សិបឆ្នាំមកហើយរបស់លោក នួន គឹមហេង គួរតែត្រូវស៊ើបអង្កេតឲ្យបានស៊ីជម្រៅឡើងវិញ ជាការរួមចំណែកអនុវត្តការប្តេជ្ញាចិត្តរបស់លោក ហ៊ុន ន ឲ្យទទួលបានជោគជ័យ។ លោក នួន គឹមហេង បានកាន់តំណែងជាអនុប្រធានមន្ទីរសាធារណការ ខេត្តកំពង់ចាម ឡើងដុះស្លែទៅហើយ គឺគាត់មានការគ្រប់គ្រងប្រាក់ចំណូលសេដ្ឋកិច្ចយកមកផ្គត់ផ្គង់បែងចែកថ្នាក់ដឹកនាំមន្ទីរ តាមគ្រប់មធ្យោបាយ ហើយគេដឹងថាចំណូលដ៏ធំបំផុតរបស់លោក នួន គឹមហេង មាន២ផ្នែកធំៗគឺការគ្រប់គ្រងជញ្ជីងថ្លឹងរថយន្តនៅចំណុចថ្នល់កែង ស្រុកបាធាយ និងនៅចំណុចថ្នល់ទទឹងក្នុងស្រុកត្បូងឃ្មុំ ហើយម្តងម្កាល លោក នួន គឹមហេង ក៏បានយកជញ្ជីងតូចធ្វើការចល័តតាមកោសរូសទារលុយពីក្រុមឈ្មួញរកស៊ីដឹកទំនិញតាមផ្លូវនានា ហើយប្រភពចំណូលសំខាន់មួយទៀតនោះគឺការធ្វើស្លាកលេខយានយន្ត និងការបញ្ចេញប័ណ្ណបើកបរតាមរបៀបពុករលួយផងដែរ។ក្រុមអ្នករកស៊ីដឹកជញ្ជូនទំនិញធ្លាប់បាននាំគ្នាប្រមូលផ្តុំនៅមុខសាលាខេត្តកំពង់ចាម ដើម្បីបកអាក្រាតរឿងអាស្រូវពុករលួយរបស់លោក នួន គឹមហេង ក្នុងការប្រើប្រាស់ទីតាំងជញ្ជីងថ្លឹងរថយន្តទាំងចល័ត និងអចល័តជាប្រយោជន៍ផ្ទាល់ខ្លួន ហើយកាលពីពេលថ្មីៗនេះស្ត្រីអាជីវករម្នាក់ បានធ្វើលិខិតប្តឹងផ្តល់ក្រុមជញ្ជីងចល័តរបស់លោក នួន គឹមហេង ផ្អើលដល់អភិបាលខេត្ត លន់ លឹមថៃ ផងដែរ។ ក្រុមអ្នករកស៊ីដឹកជញ្ជូនទំនិញបានអះអាងថា លោក នួន គឹមហេង បានបង្កើតក្រុមថ្លឹងរថយន្តចល័ត ដែលប្រើប្រាស់ជញ្ជីងកាស្យូ ធុនតូច ដើម្បីដើរល្បាតរកលុយតាមដងផ្លូវទាំងតូចទាំងធំនៅទូទាំងខេត្តកំពង់ចាម ហើយក្រុមជញ្ជីងចល័តនេះកាប់ឆៅតែម្តង ដូចដែលក្រុមអាជីវកររកស៊ីដឹកជញ្ជូនកសិផលមកពីខេត្តឧត្តរមានជ័យ និងខេត្តព្រះវិហារ បានរៀបរាប់ថា រថយន្តយីឌុប ដែលអាចផ្ទុកទម្ងន់ច្រើនបំផុតត្រឹម៣៥តោន មិនអាចលើសពីនេះបានទេ ហើយពួកគាត់ដឹកជញ្ជូនតាមដងផ្លូវបានឡើងជញ្ជីងថ្លឹងរថយន្តក្នុងខេត្តសៀមរាប និងខេត្តកំពង់ធំ គឺមិនមានលើសទម្ងន់ទេ ប៉ុន្តែពួកគាត់នៅតែបង់លុយតាមមនោសញ្ចេតនាសម្រាប់ ថ្លៃបាយទឹកឲ្យក្រុមជញ្ជីងថ្លឹងរថយន្តទាំងនោះ១ម៉ឺន ឬ២ម៉ឺនរៀល។ ប៉ុន្តែនៅពេលរថយន្តដឹកកសិផលរបស់ពួកគាត់ឆ្លងចូលខេត្តកំពង់ចាម ជួបជញ្ជីងចល័តរបស់លោក នួន គឹមហេង គេចាប់ថ្លឹងឃើញទម្ងន់ឡើងដល់៤៥តោននាំឲ្យមានការភ្ញាក់ផ្អើលគ្រប់ៗគ្នាមិនដឹងជាជញ្ជីងចល័តនោះទិញយកមកពីណាទេ ព្រោះវាស៊ីទម្ងន់ដល់ទៅជាង១០តោនឯណោះ ហើយក្រុមជញ្ជីងចល័តរបស់លោក នួន គឹមហេង បានបង្ខំឲ្យអាជីវករបង់លុយក៏កើតមានការឈ្លោះប្រកែកគ្នានិងរឹបអូសយករថយន្តនោះមករក្សាទុកដើម្បីគំរាមឲ្យបង់ប្រាក់ពិន័យ។លោក នួន គឹមហេង មានឱកាសប្រមូលលុយពីទីតាំងជញ្ជីងថ្លឹងរថយន្តទាំង២កន្លែងនេះ តាមរបៀបពុករលួយបានលុយរាប់សិបលានរៀលក្នុងមួយថ្ងៃៗ ព្រោះតាមដងផ្លូវជាតិលេខ៦ និងលេខ៧ មានរថយន្តដឹកជញ្ជូនទំនិញគ្រប់ប្រភេទក្នុងមួយថ្ងៃៗរាប់ពាន់គ្រឿង ហើយលោក នួន គឹមហេង ក៏បែកគំនិងបង្កើតស្ថានីយ៍ថ្លឹងរថយន្តចល័តមួយទៀត ដើម្បីប្រមូលលុយដុំ ហើយជញ្ជីងចល័តមួយនេះត្រូវបានក្រុមអ្នកដឹកជញ្ជូនទំនិញអះអាងថាថ្លឹងពេលណាក៏ឃើញលើសទម្ងន់ដល់ទៅជាង១០តោនឯណោះ ហើយបើពិន័យឲ្យបង់លុយក្នុង១តោន ១លានរៀល ក៏មិនដឹងជាយកលុយទៅណាអស់ដែរ ប៉ុន្តែគេទទួលស្គាល់ថា លោក នួន គឹមហេង មានទេពកោសល្យក្នុងការប្រមូលលុយតាមរបៀបពុករលួយទើបគាត់មានបុព្វសិទ្ធិយ៉ាងពិសេស ហើយអង្គភាពប្រឆាំងអំពើពុករលួយមិនទាន់ចាត់វិធានការស៊ើបអង្កេតដើម្បីជាការព្រមានឱ្យបញ្ឈប់អំពើពុករលួយនោះទេ៕
