តាមប្រភព ពីមន្ត្រីរាជការមន្ទីរសាធារណការ ខេត្តឧត្ដរមានជ័យ បានឲ្យដឹង ថាលោក សាំង ប៊ុនថេន បានឃុបឃិត ជាមួយអនុប្រធាន មន្ទីរឈ្មោះ ចំរើន សេរីរិទ្ធ ដើម្បីបំប៉ោង គម្រោងចំណាយផ្សេងៗ ដើម្បីកេងប្រវ័ញ្ចថវិការដ្ឋយក ទៅចែកគ្នា ធ្វើមានធ្វើបាន ដោយគ្មានញញើតអ្វីទាំងអស់ ។ ការដែលលោក សាំង ប៊ុនថេន និងលោក ចំរើន សេរីរិទ្ធ អាច ធ្វើអ្វីៗតាមអំពើចិត្ត គឺដោយ សារមានលោក ចំរើន កុសល ជាប្អូនប្រុសលោក ចំរើន សេរីរិទ្ធ ហើយជាប្រធានការិយាល័យផែនការ និងគណនេយ្យក្នុងមន្ទីរ គឺជាអ្នករៀបចំឯកសារបំប៉ោងគម្រោងចំណាយដោយគ្មានញញើតអ្វីឡើយ។ ក្នុង១ឆ្នាំៗលោក សាំង ប៊ុនថេន និងលោក ចំរើន សេរីរិទ្ធ ព្រមទាំងលោក ចំរើន កុសល អាចឃុបឃិតគ្នាកេងប្រវ័ញ្ចថវិការដ្ឋរាប់រយលានរៀលយកទៅចែកគ្នាធ្វើមានធ្វើបានយ៉ាងសុខស្រួល។ បញ្ហានេះលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មិនត្រូវបណ្ដែតបណ្ដោយតទៅទៀតទេ ហើយគួរចាត់វិធានការទប់ស្កាត់អំពើពុករលួយនៅក្នុងមន្ទីរសាធារណការខេត្តឧត្ដរមានជ័យ ។
រឿងអាស្រូវពុករលួយរបស់លោក សាំង ប៊ុនថេន ប្រធានមន្ទីរសាធារណការ និងដឹកជញ្ជូនខេត្តឧត្ដរមានជ័យ គឺជារឿងមិនអាចលាក់បាំងបានទេព្រោះមន្ត្រីតូចតាចក្នុងមន្ទីរសាធារណការខេត្តឧត្ដរមានជ័យ លាតត្រដាងជាបន្តបន្ទាប់។ ទន្ទឹមនឹងនេះមានការអំពាវនាវឲ្យលោក ស ថាវី អភិបាលខេត្តឧត្ដរមានជ័យ និងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ចាត់វិធានការទៅលើលោក សាំង ប៊ុនថេន ប្រធានមន្ទីរសាធារណការខេត្តឧត្ដរមានជ័យ និងបក្ខពួកជាបន្ទាន់។
ប្រភពពីមន្ត្រីរាជការក្នុងមន្ទីរសាធារណការ និងដឹកជញ្ជូនខេត្តឧត្ដរមានជ័យ បានឲ្យដឹងថាចាប់តាំងពីលោក សាំង ប៊ុនថេន ផ្ទេរពីខេត្តបាត់ដំបង មកកាន់តំណែងជាប្រធានមន្ទីរសាធារណការខេត្តឧត្ដរមានជ័យ គឺគាត់បានប្រើអំណាចប្រព្រឹត្តអំពើពុករលួយអស់រយៈពេលច្រើនឆ្នាំមកហើយ។ មន្ត្រីរាជការមន្ទីរសាធារណការខេត្តឧត្ដរមានជ័យ បានអំពាវនាវឲ្យលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ចាត់វិធានការទប់ស្កាត់ទង្វើមិនប្រក្រតីនិងអំពើពុករលួយរបស់លោក សាំង ប៊ុនថេន ព្រមទាំងបក្ខពួកជាបន្ទាន់។ ជាមួយគ្នានេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ គួរបើកការស៊ើបអង្កេតទៅលើរឿងអាស្រូវពុករលួយរបស់លោក សាំង ប៊ុនថេន ប្រធានមន្ទីរសាធារណការខេត្តឧត្ដរមានជ័យ ជាបន្ទាន់ដើម្បីកុំឲ្យមន្ត្រីរូបនេះប្រើអំណាចនិងតួនាទីប្រព្រឹត្តអំពើពុករលួយស្រេចតែអំពើចិត្តទៀត។
មន្ត្រីដែលស្និទ្ធនឹងលោក សាំង ប៊ុនថេន បានឲ្យដឹងថាថវិកាដែលលោក សាំង ប៊ុនថេន ព្រមទាំងបក្ខពួកឃុបឃិតគ្នាកេងប្រវ័ញ្ចគឺភាគច្រើនជាប្រាក់បុរេប្រទាននៅក្នុងជំពូក៦០និង៦១ ក៏ដូចជាប្រាក់ទូទាត់ត្រង់មួយផ្នែកធំជាពិសេសលើផ្នែកថែទាំងនិងជួសជុលជាដើម។ លោក សាំង ប៊ុនថេន និងលោក ចំរើន សេរីរិទ្ធ ក្នុងនាមជាប្រធាននិងអនុប្រធានមន្ទីរសាធារណការខេត្តឧត្ដរមានជ័យ បានបង្កើតឲ្យមានបញ្ហាបក្ខពួកនិយមយ៉ាងខ្លាំងនៅក្នុងមន្ទីរ។ មន្ត្រី ក្នុងមន្ទីរសាធារណការខេត្តឧត្ដរមានជ័យ បានឲ្យដឹងថាមិនហ៊ានលាតត្រដាងអំពើពុករលួយរបស់លោក សាំង ប៊ុនថេន និងបក្ខពួកនោះទេ ក៏ប៉ុន្តែទោះជាយ៉ាងណារឿងអាស្រូវពុករលួយរបស់លោក សាំង ប៊ុនថេន និងបក្ខពួកមួយក្ដាប់តូចជារឿងមិនអាចបិទបាំងបានឡើយ ៕
