ប្រភពពីមន្ត្រីគយ និងភ្នាក់ងារគយក្នុងខេត្តរតនគិរី បានឲ្យដឹងថា តាមរយៈការឃុបឃិត បើកដៃឲ្យឈ្មួញដឹកជញ្ជូន ឈើចេញ ទៅ ស្រុកយួនក្នុងមួយថ្ងៃៗពី ៣០០ទៅ៤០០ម៉ែត្រគូប គឺលោក អន អង្គារ៉ា អាចប្រមូលលុយបាន យ៉ាងច្រើនយ៉ាងសុខ ស្រួល ។ ជាងនេះទៅទៀតការឃុបឃិតបើកដៃឲ្យឈ្មួញនាំចូលទំនិញគេចពន្ធនិងទំនិញបង់ពន្ធមិនគ្រប់តាមច្រកទ្វារអន្តរជាតិអូរយ៉ាដាវ គឺជាប្រភពចំណូលដ៏សំខាន់របស់លោក អន អង្គារ៉ា ប្រធានការិយាល័យគយច្រកទ្វារអន្តរជាតិអូរយ៉ាដាវ។ ដូច្នេះអង្គភាពប្រឆាំងអំពើពុករលួយដែលមានលោក ឱម យ៉ិនទៀង ជាប្រធាន គួរចាត់វិធានការស៊ើបអង្កេតចំពោះករណីខាងលើនេះផងដែរ ព្រោះលោក អន អង្គារ៉ា មេគយច្រកទ្វារអន្តរជាតិអូរយ៉ាដាវ កំពុងប្រើប្រាស់តួនាទីប្រមូលលុយដាក់ហោប៉ៅតាមរបៀបពុករលួយ។
ប្រភពពីមន្ត្រីនៅច្រកទ្វារអន្តរជាតិអូរយ៉ាដាវ ស្រុកអូរយ៉ាដាវ ខេត្តរនគិរី បានឲ្យដឹងថាបច្ចុប្បន្នបទល្មើសដឹកជញ្ជូនឈើពីខេត្តរតនគិរី ចូលទៅស្រុកយួនតាមច្រកនេះ នៅតែបន្តកើតឡើងយ៉ាងពេញបន្ទុក ហើយឈ្មួញធំៗចំនួន៦នាក់កំពុងបង្កើនសកម្មភាពដឹកជញ្ជូនឈើខ្លាំងជាងមុនទៅទៀត។ ប្រភពបានឲ្យដឹងទៀតថា ការដែលឈ្មួញអាចដឹកជញ្ជូនឈើចេញទៅស្រុកយួនតាមអំពើចិត្ត គឺមានការឃុបឃិតបើកដៃពីសំណាក់លោក អន អង្គារ៉ា ប្រធានការិយាល័យគយច្រកទ្វារអន្តរជាតិអូរយ៉ាដាវ ដែលគិតតែពីរឿងប្រមូលលុយដាក់ហោប៉ៅធ្វើមានធ្វើបានផ្ទាល់ខ្លួន។ ជាមួយគ្នានេះក៏មានការឃុបឃិតបើកដៃពីសំណាក់លោក អ៊ី ចំរើន មេនគរបាលអន្តោប្រវេសន៍ច្រកទ្វារអន្តរជាតិអូរយ៉ាដាវផងដែរ ទើបអ្វីៗអាចប្រព្រឹត្តទៅដោយរលូន។
តាមការបង្ហើបពីសមត្ថកិច្ចតូចតាចនៅច្រកទ្វារអន្តរជាតិអូរយ៉ាដាវ បានឲ្យដឹងថាបច្ចុប្បន្ននៅច្រកនេះមានឈ្មួញនាំចូលទំនិញគេចពន្ធនិងទំនិញបង់ពន្ធមិនគ្រប់តាមអំពើចិត្តដោយសារមានការឃុបឃិតបើកដៃពីសំណាក់លោក អន អង្គារ៉ា ប្រធានការិយាល័យគយ ដែលល្បីល្បាញខាងពុករលួយ។ ការដែលឈ្មួញអាចនាំចូលទំនិញគេចពន្ធ និងទំនិញបង់ពន្ធមិនគ្រប់តាមច្រកទ្វារអន្តរជាតិអូរយ៉ាដាវ បានធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើនសន្ធឹកសន្ធាប់ក្នុងមួយខែៗ។ ដូច្នេះលោក អូន ព័ន្ធមុនីរ័ត្ន ដែលជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ក៏ដូចជាលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករ មិនគួរបណ្ដែតបណ្ដោយឲ្យលោក អន អង្គារ៉ា ធ្វើអ្វីៗស្រេចតែអំពើចិត្ត៕បឋម
