ភ្នំពេញ៖ លោកនាយ ឡុង ស្រេង កាន់តែត្រូវប៉ាន់ជាងមុននេះ ដោយសារហេតុថា កាលពីមុនគាត់ មានបុណ្យសក្ដិត្រឹម ថ្នាក់ជាវរសេនីយ៍ និងជាអតីត នាយការិយាល័យ រដ្ឋបាលសរុប នៃនាយកដ្ឋាន នគរបាលប្រឆាំង បទល្មើសសេដ្ឋកិច្ច ក្រសួងមហាផ្ទៃ គាត់ មានឈ្មោះល្បីខ្ទរខ្ទា នៅក្នុងចំណោមពួកឈ្មួញៗធ្វើឲ្យគាត់មានទ្រព្យសម្បត្តិ ស្ដុកស្ដម្ភមហាសាល ប៉ុណ្ណឹងទៅហើយ… ចុះទម្រាំពេលនេះ គាត់ (ឡុង ស្រេង) ត្រូវបានថ្នាក់លើកំពូលៗ ជួយជ្រោមជ្រែង តែងតាំងមុខតំណែង ឲ្យគាត់បានឡើង បុណ្យសក្ដិធំជាងមុន ក្លាយជាឧត្តមសេនីយត្រី អនុប្រធាននាយកដ្ឋាន នគរបាលប្រឆាំង បទល្មើសសេដ្ឋកិច្ច ក្រសួងមហាផ្ទៃ តទៅទៀតនោះ មិនដឹងជាធ្វើឲ្យគាត់ កាន់តែមានឈ្មោះល្បី និងត្រូវប៉ាន់ខ្លាំងឡើងៗ ថែមទៀតយ៉ាងណាទេ?
កន្លងមកមានកាសែតខ្លះ ធ្លាប់បានចុះផ្សាយថា មានអ្នករកស៊ី បើកហាងស៊ីផឹកមួយចំនួន នៅតាមជួរមាត់ទន្លេ បាននាំគ្នានិយាយ រិះគន់យ៉ាងខ្លាំង ទៅលើមន្ត្រីៗ នគរបាលសេដ្ឋកិច្ច ក្រសួងមហាផ្ទៃ ២-៣ក្រុម ជាកូនចៅផ្ទាល់របស់លោក ឡុង ស្រេង ដែលតែងតែប្រើអំណាចរបស់ពួកខ្លួន ទៅបង្ខំឱ្យពួកឈ្មួញ និងម្ចាស់អាជីវកម្មខ្លះ នៅរាជធានីភ្នំពេញ ត្រូវបង់លុយជាប្រចាំខែ ទៅឲ្យពួកគេជាថ្នូរនឹងការ មិនធ្វើការត្រួតពិនិត្យ ទៅលើម្ហូបអាហារ លក់ដូររាល់យប់ថ្ងៃ នៅក្នុងហាងរកស៊ីរបស់ពួកគាត់ ។ ក្នុងនោះក៍មានអ្នក ធ្វើអាជីវកម្មផ្សេងៗទៀត ក៍បាននាំគ្នារិះគន់ នឹងរឿងស្រដៀងគ្នានេះដែរ… ប៉ុន្តែពួកមន្ត្រីៗ នគរបាលសេដ្ឋកិច្ច កូនចៅលោក ឡុង ស្រេង តែងអះអាងថា ពួកគេមានលិខិត បញ្ជាបេសកកម្ម ត្រឹមត្រូវពីថ្នាក់លើ និងមានសិទ្ធិអាច ធ្វើការងារត្រួតពិនិត្យ ទៅលើទំនិញគ្រប់ប្រភេទ ជាពិសេសទំនិញ ពាក់ព័ន្ធនឹងកម្មសិទ្ធិបញ្ញា ដែលស្ដុកទុកនៅតាមផ្ទះ ឬឃ្លាំង និងដាក់លក់នៅលើទីផ្សារ ឬនៅតាមភោជនីយ៍ដ្ឋាន ហាងលក់ដូរ ឬអាជីវកម្មនានា… ជាដើម ។ថ្មីៗនេះមានព័ត៌មានថា កើតមានករណីអាថ៌កំបាំង មិនប្រក្រតីមួយចំនួន ដែលគេបណ្ដោយឲ្យពួកឈ្មួញ ដឹកទំនិញគេចពន្ធ មានតម្លៃរាប់ម៉ឺន ឬសែនដុល្លារក្នុងមួយថ្ងៃៗ នៅតាមរថយន្តក្រុង ដឹកអ្នកដំណើរមួយចំនួន ពីប្រទេសវៀតណាម ឆ្លងកាត់តាមច្រកទ្ធារព្រំដែនបាវិត ចូលមករាជធានីភ្នំពេញ ដោយមិនមានការត្រួតពិនិត្យ ឲ្យបានល្អិតល្អន់ ឬការបង្ក្រាបទប់ស្កាត់ ឲ្យបានជាប្រចាំ ដូចភ្លៀងរលឹម ដូចអ្វីដែលសម្ដេច អគ្គមហាសេនា បតីតេជោ នាយករដ្ឋមន្ត្រី ហ៊ុន សែន ធ្លាប់បានប្រកាស ដាក់បទបញ្ជា កន្លងមកនោះឡើយ ពោលគឺមានការបង្ក្រាបពីលោក ឡុង ស្រេង ម្ដងដែរ… តែក្រោយមកបាត់ឈឹង ដូចជាត្រជាក់ល្ហឹមរហូតតែម្ដង ។ ត្រង់បញ្ហានេះហើយ ទើបមានមជ្ឈដ្ឋានខ្លះ បានដាក់ការសង្ស័យថា លោកឧត្តមសេនីយត្រី ឡុង ស្រេង ប្រហែលជាទទួលបាន លាភសក្ការៈក្រាស់ក្រែល ពីពួកឈ្មួញគេចពន្ធ ទាំងនោះហើយមើលទៅ បានជាកន្លងមក គាត់បានធ្វើដូចជាមិនដឹងរឿង… ក្រោយមកគាត់បានដឹកនាំ កម្លាំងទៅបង្ក្រាបករណីនោះ… ហើយមកដល់ពេលនេះ ស្ងាត់ឈឹងដូចមាន់គក សម្ងំនៅលើជង្រុកស្រូវចឹងដែរ ។ ឬមួយក៍ពួកឈ្មួញទាំងនោះ លែងហ៊ានដឹកទំនិញគេចពន្ធ តាមរថយន្តក្រុងទៀតហើយ ដោយសារពួកគេខ្លាច លោកឧត្តមសេនីយត្រីថ្មីថ្មោង ឡុង ស្រេង ដឹកនាំកម្លាំងទៅបង្ក្រាប ដូចមុនទៀតទេដឹង? បើចឹងមែនបានន័យថា លោកផ្កាយមួយ ឡុង ស្រេង ជាមេប៉ូលិសសេដ្ឋកិច្ចម្នាក់ មានស្នាដៃធ្វើការងារ បានល្អប្រសើរណាស់ ម្ចាស់ថ្លៃ…។
ពាក់ព័ន្ធនឹងមន្ត្រីៗ នគរបាលសេដ្ឋកិច្ច ក្រសួងមហាផ្ទៃនេះដែរ កន្លងមកមានការរិះគន់ ពីមហាជនថា ពួកគេតែងបានដាក់កុងត្រូល នៅតាមផ្លូវជាតិនានា ដើម្បីចាំគាបយកលុយ ពីអ្នករកស៊ីដឹកឈើ និងពួកឈ្មួញដឹកទំនិញ គេចពន្ធមួយចំនួន ឬអ្នកប្រកបមុខរបរ ដឹកជញ្ជូនផ្លែឈើ ឬតាមរថយន្ដតូចធំ ស្ទើរគ្រប់ប្រភេទ ដូចជារថយន្ដដឹកត្រី មាន់ទា កូនមាន់ ប្រហិត ជង្គង់ មាន់ សាច់មាន់… ។ល។ ដោយមិនមានការ បង្ក្រាបទប់ស្កាត់ ឲ្យមានប្រសិទ្ធភាពពិតប្រាកដ ទៅតាមបទបញ្ជាប្រមុខ រាជរដ្ឋាភិបាលកម្ពុជា និងសេចក្ដីណែនាំ របស់ថ្នាក់ដឹកនាំ ក្រសួងមហាផ្ទៃ ព្រមទាំងលិខិតបញ្ជា បេសកកម្មរបស់ អគ្គស្នងការនគរបាលជាតិនោះទេ ។ ពួកគេទាំងនោះ សុទ្ធតែមានរថយន្ដ សម្រាប់ប្រដេញ យ៉ាងខែងរែងបំផុត… តែដេញបានតែឡានណា ដែលម្ចាស់មិនត្រូវរ៉ូវ ជាមួយពួកគេប៉ុណ្ណោះ… ផ្ទុយទៅវិញ បើអ្នករកស៊ីដឹកជញ្ជូន ទំនិញល្មើសច្បាប់ ដែលធ្វើចរាចរឆ្លងកាត់ នៅមុខប៉ុស្ដិកុងត្រូលរបស់ពួកគេ បានទូរស័ព្ទសុំភ្លើងខៀវ ពីលោកប្រធានកុងត្រូល ជាមុនរួចហើយនោះ ប្រាកដជាបានគេចផុត ពីការប្រដេញតាម ក្រោមលេសបង្ក្រាប ទប់ស្កាត់បទល្មើសសេដ្ឋកិច្ច ជាមិនខានឡើយ ។
មន្ត្រីមួយបានសំណូមពរថា សូមឲ្យឯកឧត្តម ឧបនាយករដ្ឋមន្ត្រី ស ខេង រដ្ឋមន្ត្រី ក្រសួងមហាផ្ទៃ និងឯកឧត្តម នាយឧត្តមសេនីយ៍ នេត សាវឿន អគ្គស្នងការ នគរបាលជាតិ ព្រមទាំងលោកឧត្តមសេនីយ៍ ប្រធានថ្មីនៃនាយកដ្ឋាន នគរបាលប្រឆាំង បទល្មើសសេដ្ឋកិច្ច ក្រសួងមហាផ្ទៃ មេត្តាជួយកែទម្រង់ ឲ្យបានស៊ីជម្រៅ នៅក្នុងនាយកដ្ឋាននោះផង ពោលគឺកុំឲ្យកើតមានករណីដូចលោក ឡុង ស្រេង និងបក្ខពួក ៕
