ភ្នំពេញៈពាក្យដែលហៅថា “ឧកញ៉ា” នៅក្នុងស្រុកខ្មែរសព្វថ្ងៃ គេតែងឲ្យនិយមន័យជាសាមញ្ញថាជាអ្នកមាន។ តែអ្នកមាននេះ គ្រាន់តែសំដៅទៅលើ អ្នកមានលុយកកាក់ ទ្រព្យសម្បត្តិស្ដុកស្ដម្ភ មហាសាលតែប៉ុណ្ណោះ ពោលគឺជាទូទៅគេមិនមែនសម្គាល់ថា ជាអ្នកមានចំណេះដឹង, អ្នកមានឧត្តមគតិខ្ពស់, អ្នមានន្ទៈខ្ពស់, អ្នកមានចិត្តអាណិតស្រឡាញ់ជាតិ ឬអ្នកមានបេះដូង ចេះគិត ចេះព្រួយបារម្ភ អំពីផលប្រយោជន៍ជាតិ… ជាដើមនោះទេ ។ព្រោះថា សម័យបច្ចុប្បន្ន ឲ្យតែមានលុយ អ្នកណាៗក៍អាចធ្វើ ឬទទួលបានគោរមងារជា “ឧកញ៉ា” បានយ៉ាងស្រួលដែរ ទោះបីជននោះមិនចេះអក្សរ ឬចូលចិត្តប្រកបមុខរបរ ដែលប៉ះពាល់ដល់ផលប្រយោជន៍ប្រទេសជាតិក៍ដោយ ។ ជាក់ស្ដែង ឧកញ៉ាទ្រី ភាពប្រធានក្រុមហ៊ុន អឹម ឌី អេស អាហ័រណ នីហរ័ណ ត្រូវបានមហាជននាំគ្នារិះគន់យ៉ាងខ្លាំង ជាច្រើនឆ្នាំមកហើយ ពាក់ព័ន្ធនឹងការប្រកបមុខរបររបស់គាត់ដូចជា ការរកស៊ីជំនួញឈើប្រណីតយ៉ាងល្បីឈ្មោះ នៅក្នុងខេត្តពោធិ៍សាត់ និងកោះកុងកន្លងមក ។លើសពីនេះ គាត់ (ឧកញ៉ាទ្រី ភាព) ថែមទាំងបានប្រមូលទិញឈើផ្តាច់មុខពីក្រុមហ៊ុនសម្បទានសេដ្ឋកិច្ចនៅក្នុងខេត្តរតនគិរីនិងនៅស្រុករវៀង, ស្រុកជ័យសែនក្នុងខេត្តព្រះវិហារ,ការកាប់បំផ្លាញព្រៃឈើ នៅក្នុងដីសម្បទានសេដ្ឋកិច្ចជម្រកសត្វព្រៃបឹងពែរក្នុងខេត្តព្រះវិហារ និង នៅដែនជម្រកសត្វព្រៃភ្នំសំកុសខេត្តពោធិ៍សាត់ ដើម្បីដឹកជញ្ជូនឈើ ស្ទើររលាយហិនហោចអស់ពីកម្ពុជា យកទៅលក់នៅស្រុកយួន បម្រើផលប្រយោជន៍ផ្ទាល់ខ្លួនទៀតផង ។
មិនត្រឹមតែប៉ុណ្ណឹង ឥឡូវនេះតាមព័ត៍មានថ្មីៗបានឲ្យដឹងថា ក្រសួងកសិកម្មរុក្ខាប្រមាញ់និងនេសាទ ក៍បានអនុញ្ញាតឲ្យក្រុមហ៊ុន អឹម ឌី អេស អាហ័រណ នីហរ័ណ របស់ឧកញ៉ាទ្រី ភាពទទួលបានសិទ្ធិពិសេសបំផុតមួយទៀតហើយ ក្នុងការប្រមូលនិងកែច្នៃវល្លិរមៀតនៅក្នុងអាងស្តុកទឹកវារីអគ្គិសនីស្ទឹងអាតៃស្ថិតនៅក្នុងជួរភ្នំក្រវាញភាគកណ្តាលស្រុកវាលវែងខេត្តពោធិ៍សាត់។ ដែលវល្លិរមៀតនេះ ក្រសួងមហាផ្ទៃបានធ្វើការហាមឃាត់ តាំងពីឆ្នាំ២០០៥ មកម្លេះដោយចាត់ទុកថា វាជាសារធាតុផ្សំអាចផលិតជាគ្រឿងញៀនបាន… ដែលមិនអនុញ្ញាតឲ្យមានការផលិតកែឆ្នៃ ឬធ្វើចរាចរនោះទេ។ប៉ុន្តែការហាមប្រាម របស់ក្រសួងមហាផ្ទៃកម្ពុជា មិនមានប្រសិទ្ធភាពឡើយ ចំពោះមហិច្ឆតាឥតព្រំដែនរបស់ឧកញ៉ាទ្រី ភាព ដែលចូលចិត្តប្រព្រិត្តមុខរបរ ដែលរដ្ឋហាមឃាត់បែបនេះ ។ពាក់ព័ន្ធនឹងការអនុញ្ញាតឲ្យក្រុមហ៊ុនរបស់ឧកញ៉ាទ្រី ភាពប្រមូលនិងកែច្នៃវល្លិរមៀតនេះដែរគេឃើញមានលិខិតស៊ីញ៉េនៅថ្ងៃទី០១ខែមីនា ឆ្នាំ២០១៣ដោយលោក ឡោ រស្មីអគ្គលេខាធិការក្រសួងកសិកម្ម រុក្ខាប្រមាញ់និងនេសាទបានដាក់ជូនទៅលោក ឆេង គឹមស៊ុន ប្រធានរដ្ឋបាលព្រៃឈើដោយយោងតាមចំណារចុះថ្ងៃទី០១ខែមីនាឆ្នាំ២០១៣ របស់រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ ។លិខិតនោះបានសរសេរ ជម្រាបជូនប្រធានរដ្ឋបាលព្រៃឈើ អំពីសំណើសុំគោលការណ៍អនុញ្ញាតប្រមូលនិងកែចៃ្នវល្លិរមៀតនៅក្នុងអាងស្តុកទឹកវារីអគ្គិសនីស្ទឹងអាតៃរបស់ក្រុមហ៊ុន អឹម ឌី អេសអាហ័រណនីហរ័ណ ដែលក្រសួងកសិកម្មរុក្ខាប្រមាញ់ និងនេសាទបានសម្រេចឯកភាព និងសុំមតិបន្ថែមពីរដ្ឋបាលព្រៃឈើ។មន្ត្រីមជ្ឈមណ្ឌលសិទ្ធិមនុស្សកម្ពុជាលោក ឈឹម សាវុធដែលបានធ្វើការស្រាវជ្រាវបទល្មើសព្រៃឈើនៅជួរភ្នំក្រវាញបាននិយាយថា លិខិតអនុញ្ញាតដែលចេញឲ្យឧកញ៉ាទ្រី ភាព ប្រមូលទិញនិងកែច្នៃរល្លិ៍រមៀតព្រមទាំងបង្កើតរោងកែច្នៃវល្លិរមៀតនោះគឺល្មើសទៅនឹងច្បាប់ទាំងស្រុងព្រោះបើតាមច្បាប់ព្រៃឈើឆ្នាំ២០០២គឺហាមឃាត់ដាច់ខាតមិនឲ្យមានការបង្កើតរោងចក្រផលិតម្សៅវល្លិរមៀតនោះទេ។នៅក្នុងជំពូកទី១៥មាត្រាទី៩៧នៃច្បាប់ព្រៃឈើស្ដីពីបទល្មើសព្រៃឈើនិងទោសប្បញ្ញត្តិ បានចែងថាត្រូវផ្តន្ទាទោសក្រោមបទល្មើសព្រៃឈើថ្នាក់ទី១ដែលត្រូវជាប់ពន្ធនាគារពីប្រាំឆ្នាំទៅដប់ឆ្នាំនិងត្រូវរឹបអូសវត្ថុតាងទាំងអស់មកជាសម្បត្តិរដ្ឋដកហូតកិច្ចព្រមព្រៀងអាជ្ញាប័ណ្ណ លិខិតអនុញ្ញាតនិងកម្ទេចចោលវត្ថុតាងក្លែងចំពោះជនណាដែលបានប្រព្រឹត្តបទល្មើសណាមួយដូចជាបង្កើតមូលដ្ឋានកែច្នៃវល្លិរមៀតឬមូលដ្ឋានសិប្បកម្មអនុផលព្រៃឈើផ្សេងទៀតដែលនាំមកនូវការបំផ្លាញព្រៃឈើនិងមជ្ឈដ្ឋានព្រៃឈើ។ ជនណាប្រព្រឹត្តបទល្មើសថ្នាក់ទី១មិនរាងចាលត្រូវផ្តន្ទាទោសទ្វេដងនៃបទល្មើសថ្នាក់ទី១នៃច្បាប់នេះ។ដោយឡែកកាលពីថ្ងៃទី៦ ខែតុលាឆ្នាំ២០០៥ ក្រសួងមហាផ្ទៃបានធ្វើលិខិតស្នើសុំឲ្យអគ្គលេខាធិការក្រសួងកសិកម្ម រុក្ខាប្រមាញ់និងនេសាទ ផ្តល់ដំបូន្មានទៅប្រធានរដ្ឋបាលព្រៃឈើបញ្ឈប់ជាបន្ទាន់ នូវការផលិតប្រេងម្រះព្រៅ និងវល្លិរមៀត ដោយសារតែវាជាធាតុផ្សំ អាចផលិតគ្រឿងញៀនពេលដែលលាយជាមួយអាស៊ីត ៕
