សៀមរាប៖ តាមពព័ត៌មាន ពីក្រុមអ្នកសារព័ត៌មាន ប្រចាំការតាម បណ្ដាខេត្តនានា បានឲ្យដឹងថា ចាប់ពីក្រោយការបោះឆ្នោត ជ្រើសតាំងតំណាងរាស្ត្រ នីតិកាលទី៥ រហូតមកដល់ពេលនេះ គេបានសង្កេតឃើញថា ពួកឈ្មួញៗរកស៊ី បំផ្លាញព្រៃឈើ ដើម្បីផលប្រយោជន៍ផ្ទាល់ខ្លួន បាននិងកំពុងនាំគ្នា ធ្វើសកម្មភាពរបស់ពួកគេ កាន់តែខ្លាំងឡើងៗហើយ ដោយឃុបឃិតគ្នា ជាមួយសមត្ថកិច្ចពាក់ព័ន្ធផ្សេងៗ មិនគោរពកោតខ្លាច បទបញ្ជារបស់សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា អាណត្តិទី៥ ឆ្នាំ២០១៣ -២០១៨ នេះទេ ។
ជាក់ស្ដែង បន្ទាប់ពីកើតមានបទបញ្ជា របស់សម្ដេចតេជោ ហ៊ុន សែន ក្នុងការបង្ក្រាបទប់ស្កាត់ បទល្មើសព្រៃឈើ កាលណាមក ក្រុមហ៊ុន ហ៊ួត ម៉េងរីតា មិនត្រឹមតែមិនគោរព កោតខ្លាចនោះទេ… ផ្ទុយទៅវិញ ពួកគេកាន់តែធ្វើ សកម្មភាពខ្លាំងឡើងៗ ជាងពេលមុនៗទៅទៀត ក្នុងការសម្រុកដឹកឈើចេញ ស្ទើររាល់យប់ថ្ងៃ យកទៅលក់នៅ ប្រទេសវៀតណាម តាំងពីមុនពេលបោះឆ្នោត រហូតមកដល់ក្រោយពេលបោះឆ្នោត ដោយមិនមានសមត្ថកិច្ច ថ្នាក់ក្រោម ថ្នាក់កណ្ដាល ឬថ្នាក់លើណា ហ៊ានប៉ះពាល់ឡើយ ធ្វើឲ្យបទបញ្ជារបស់សម្ដេចតេជោ នាយករដ្ឋមន្ត្រី ហ៊ុន សែន ចាញ់បត់បញ្ចុក (យកលុយបិទមាត់) របស់ពួកឈ្មួញៗឈើ ទាំងនេះទៅវិញ ។យោងតាមព័ត៌មានជាច្រើន បានឲ្យដឹងថា មូលហេតុដែលក្រុមហ៊ុន ហ៊ួត ម៉េងរីតា អាចរកស៊ីដឹកជញ្ជូនឈើ បានតាមអំពើចិត្ត ទោះបីជាដឹកលើសទម្ងន់ ធ្វើឲ្យខូចខាតផ្លូវជាតិ ជាច្រើនកន្លែងយ៉ាងណាក៍ដោយនោះ ព្រោះតែក្រុមហ៊ុន ដ៍ខ្លាំងក្លាមួយនេះ មានឧត្តមសេនីយ៍ផ្កាយពីរម្នាក់ (សុំលាក់ឈ្មោះពិតទុកសិន) តែឈ្មោះក្រៅហៅ ជ័យ ជាទីប្រឹក្សាផ្ទាល់ និងជាមេបញ្ជាការរងអង្គរក្ស របស់ថ្នាក់ដឹកនាំកំពូលម្នាក់ ស្និទ្ធនឹងលោកមេបញ្ជាការផ្កាយ៣ម្នាក់ (សុំលាក់ឈ្មោះទុកសិនដែរ) ជាអ្នកកាងធ្វើខ្នងបង្អែក ក្នុងការប្រមូលទិញឈើ និងដឹកជញ្ជូនឈើ ស្ទើររាល់យប់ថ្ងៃ ចេញពីខេត្តឧត្ដរមានជ័យ តាមផ្លូវលេខ៦៧ ឆ្លងកាត់ខេត្តសៀមរាប យកទៅលក់តាមបណ្តាខេត្តនានា ព្រមទាំងនាំចេញទៅប្រទេសវៀតណាម ។ ពួកគេហ៊ានឃុបឃិតគ្នា ធ្វើជំនួញឈើយ៉ាងរលូន ដោយសារពួកគេសំអាងថា ឈើទាំងនោះសុទ្ធតែ ជាឈើស្របច្បាប់ ដែលពួកគេប្រមូល និងដឹកជញ្ជូនចេញពី ដីសម្បទានវិនិយោគ ទំហំប្រមាណជិត ១ម៉ឺនហិកតា នៅភូមិអូរតាម៉េង ឃុំអន្លង់វែង ស្រុកអន្លង់វែង ខេត្ដឧត្ដរមានជ័យ ដែលរាជរដ្ឋាភិបាលកម្ពុជា បានប្រគល់ឲ្យពួកគេ ។
គួររម្លឹកថា ថ្មីៗកន្លងមកនេះ បន្ទាប់ពីមានប្រព័ន្ធ ផ្សព្វផ្សាយជាច្រើន បានបង្ហោះផ្សាយព័ត៌មានក្ដីៗ ព្រោងព្រាតល្បីពេញពិភពលោក ពាក់ព័ន្ធនឹងឧក្រិដ្ឋកម្មព្រៃឈើ ដែលប្រព្រិត្តឡើងដោយ ក្រុមហ៊ុនលោកឧកញ៉ា គិត ម៉េង សហការជាមួយក្រុមហ៊ុនលោកឧកញ៉ា លឹម ប៊ុនណា រួចមក រាជរដ្ឋាភិបាលកម្ពុជា បានសម្រេចផ្អាក មិនឲ្យក្រុមហ៊ុនទាំងនោះ ធ្វើសកម្មភាពរបស់ខ្លួនតទៅទៀតទេ ។
ថ្មីៗកន្លងមកនេះ ក្រុមមន្ត្រីៗត្រួតពិនិត្យ ចល័តពិសេស នៃមន្ទីរសាធារណៈការ ខេត្តសៀមរាប បានចាប់រថយន្ត ប្រភេទយីឌុបខ្នាតយក្សចំនួន ២គ្រឿង របស់ក្រុមហ៊ុន ហួត មេងរីតា ដែលបានធ្វើសកម្មភាពល្មើសច្បាប់ ដឹកឈើលើសទម្ងន់ ក្នុង១រថយន្តៗ រហូតដល់ទៅជិត ២០តោនឯណោះ ។
ទាក់ទងនឹងការ ដឹកជញ្ជូនឈើ របស់ក្រុមហ៊ុន ហួត មេងរីតា នេះដែរ បើតាមព័ត៏មាន ពីមន្ត្រីរដ្ឋបាលព្រៃឈើ ស្រុកអន្លង់វែង បានទម្លាយឲ្យដឹងថា ក្រុមហ៊ុនមួយនេះ ទទួលបានសិទ្ធិ សម្បទានលើផ្ទៃដី ៣០០០ហិកតា ពីរាជរដ្ឋាភិបាលកម្ពុជា ដែលពួកគេបានបោះទីតាំង នៅក្នុងស្រុកអន្លង់វែង ខេត្តឧត្តរមានជ័យ នៅចំណុចព្រៃស្អាក ។
អ្នកខេត្តសៀមរាប និងឧត្តរមានជ័យ បានបញ្ជាក់ថា ការពិតទៅ ក្រុមហ៊ុន ហួត មេងរីតា មិនត្រឹមតែមិនបានគោរព និងអនុវត្តទៅតាម កិច្ចសន្យារបស់ខ្លួនជាមួយ រាជរដ្ឋាភិបាលប៉ុណ្ណោះទេ គឺថែមទាំងបាន កាប់បំផ្លាញព្រៃឈើ និងដឹកជញ្ជូនឈើ លើសទម្ងន់ជាច្រើនតោន បំផ្លិចបំផ្លាញផ្លូវជាតិ ផ្លូវលំ និងស្ពានទៀតផង…. ៕
