ប្រភពពីពលរដ្ឋនៅក្នុងមូលដ្ឋាន បានប្រាប់ឲ្យដឹងថា សង្វៀនបញ្ជល់មាន់មានដល់ ទៅ២កន្លែងនៅក្នុងភូមិទួលទ្រា ឃុំជប់ ស្រុកត្បូងឃ្មុំ គឺគេលេងម្តងនៅត្រង់នេះ ម្តងនៅត្រង់នោះ ផ្លាស់ប្តូរ មួយថ្ងៃម្នាក់ ហើយបើនិយាយ ពីកន្លែងលេងនៅ ក្នុងភូមិជិតដល់ ព្រំប្រទល់ជាប់នឹងស្រុក អូររាំងឪ នោះមានក្រុមអ្នក ញៀនល្បែងជាច្រើន ក្នុងនោះ អ្នកមកពីស្រុកអូររាំងឪ និងមកពីខេត្តព្រៃវែងនាំគ្នាស្កាត់មកលេងល្បែងផងដែរ។ ប្រភពដដែលបានបញ្ជក់ថា អ្នកលេងល្បែងខ្លះមានវេចលុយយកមកពីផ្ទះរាប់លានរៀលក៏មាន ដែលអ្នកខ្លះជាអាជីវករ និងអ្នកខ្លះក៏ជាអ្នកធ្វើស្រែចម្ការ ហើយក្រុមអ្នកលេងល្បែងទាំងនោះតែងមកជាក្រុមៗតាមម៉ូតូ និងរថយន្តផងដែរ។
ប្រជាពលរដ្ឋនិងមន្ត្រីរាជការនៅស្រុកត្បូងឃ្មុំ បានបញ្ជាក់នៅថ្ងៃសៅរ៍នេះថា សង្វៀនបញ្ជល់មាន់បង្កប់ដោយវង់អាប៉ោង ក្នុងចម្ការចំប៉ីមួយកន្លែងនៅភូមិទួលទ្រា ឃុំជប់ ស្រុកត្បូងឃ្មុំ ដែលបើកដំណើរការលេងជាច្រើនខែមកហើយនោះ មិនត្រូវបានសមត្ថកិច្ចមូលដ្ឋាន ឫអាជ្ញាធរមានវិធានការរបង្ក្រាបទាល់តែសោះ ។ ប្រភពដដែលបានបញ្ជាក់ថា មិនត្រឹមតែមិនបង្ក្រាបនោះទេ តែក៏មានវត្តមានកម្លាំងប្រដាប់អាវុធមួយចំនួនស្លៀកពាក់ស៊ីវិលចូលទៅលេងល្បែង និងយកលុយពីម្ចាស់វង់ល្បែងខាងលើនេះទៀតផង។
អ្នកលេងល្បែងម្នាក់បានបង្ហើបថា ទំនងជាម្ចាស់សង្វៀនសូកប៉ាន់ត្រូវរ៉ូវជាមួយសមត្ថកិច្ចមូលដ្ឋានហើយទេដឹង បានជាម្ចាស់សង្វៀនឈ្មោះ ទ្រី និងឈ្មោះ ធា អាចបើកលេងដោយរលូនយ៉ាងដូច្នេះ ។ ប្រភពដដែលបានបញ្ជាក់ថា ម្ចាស់សង្វៀនបញ្ជល់មាន់ដែលមានទាំងការលេងល្បែងអាប៉ោង និងបៀផងនោះមានឥទ្ធិពលខ្លាំងណាស់ ព្រោះត្រឹមនគរបាលប៉ុស្តិ៍ក៏មិនហ៊ានប៉ះពាល់ពួកគេឡើយ គឺបានត្រឹមជិះម៉ូតូទៅក្រវែល ហើយឈ្មោះ ទ្រី និងឈ្មោះ ធា ហុចលុយប៉ុន្មានម៉ឺនក៏កម្លាំងជំនាញទាំងនោះចេញទៅវិញបាត់ទៅ។
វង់ល្បែងស៊ីសងនៅក្នុងស្រុកត្បូងឃ្មុំនេះ ត្រូវបានប្រជាពលរដ្ឋក្នុងមូលដ្ឋានបញ្ជាក់ថា កំពុងពង្រីកសកម្មភាពរបស់ខ្លួន ខណៈចំនួនអ្នកចូលមកលេងអាប៉ោង និងបញ្ជល់មាន់ជាដើមនោះ ក៏កំពុងមានការកើនឡើងជាបន្តបន្ទាប់ ពិសេសអ្នកមកពីខេត្តព្រៃវែង។ បឋម
