ខេត្តមណ្ឌលគិរី៖ ប្រភពពីសកម្មជនព្រៃឈើក្នុងខេត្តមណ្ឌលគិរី បានបានរាយការណ៏មកថាមេឈ្មួញ សឹង សំអុល (ឧកញ៉ា សឹង សំអុល) កំពុងបង្កើនសកម្មភាពកាប់ឈើ និងដឹកជញ្ជូនឈើចេញពីតំបន់ដែនជម្រកសត្វព្រៃ ភ្នំព្រេច ស្រុកកោះញែក ឡើង កក្រើកចៅហ្វាយខេត្តខេត្ត មណ្ឌលគិរីលោក ស្វាយ សំអ៊ាង ។លោកអភិបាលខេត្តមណ្ឌលគិរី ក៏ដូចជាប្រធានមន្ទីរបរិស្ថាន និង ប្រធានមន្ទីរកសិកម្មខេត្តមណ្ឌលគិរី មិនយកចិត្តទុកដាក់បង្ក្រាប សកម្មភាពកាប់ឈើនិងដឹក ជញ្ជូនឈើរបស់មេឈ្មួញ សឹង សំអុល ដែលយកអាជ្ញាប័ណ្ណ ក្រុមហ៊ុនម៉ាស្ទ័រខេសាន់ មកបិទបាំងនោះទេថែមទាំងបណ្តោយឲ្យ មេឈ្មួញ សឹង សំអុល ប្រព្រឹត្តបទល្មើសព្រៃឈើតាមអំពើចិត្តខណៈបានផលប្រយោជន៏ទើបសំងំឈឹង!។
ប្រភពពីប្រជាពលរដ្ឋនៅក្នុងស្រុកកោះញែក ខេត្តមណ្ឌលគិរី បានឲ្យដឹងថា ព្រៃឈើនៅក្នុងតំបន់ដែនជម្រកសត្វព្រៃភ្នំព្រេចកំពុងប្រឈមនឹងសេចក្ដីវិនាស ព្រោះមន្ត្រីបរិស្ថាន និងមន្ត្រីរដ្ឋបាលព្រៃឈើប្រចាំតំបន់នេះ កំពុងកាក់កបក្នុងការប្រមូលលុយពីបទល្មើសព្រៃឈើ។ ប្រភពបានឲ្យដឹងទៀតថា នៅតំបន់ដែនជម្រកសត្វព្រៃភ្នំព្រេចបច្ចុប្បន្នមានទីតាំងស្តុកឈើរបស់មេឈ្មួញ សឹង សំអុល មិនតិចជាង២០កន្លែងនោះទេហើយមេការរបស់មេឈ្មួញ សឹង សំអុល គឺជាអ្នកជំរុញឲ្យពលរដ្ឋចូលព្រៃកាប់ឈើ អារច្រៀកឈើ ដឹកជញ្ជូនយកមកលក់នៅតាមទីតាំងស្តុកឈើរបស់មេឈ្មួញ សឹង សំអុល។ ពេលប្រជាពលរដ្ឋកាប់ឈើបាន គឺមេឈ្មួញ សឹង សំអុល ប្រើប្រាស់រថយន្តធំៗជាពិសេសរថយន្តបង្កុងដឹកជញ្ជូនឈើទាំងនោះចូលទៅក្នុងបរិវេណក្រុមហ៊ុនម៉ាស្ទ័រខេសាន់ ឲ្យក្លាយទៅជាឈើស្របច្បាប់ដើម្បីដឹកជញ្ជូនចេញទៅស្រុកវៀតណាមកាន់តែខ្លាំងជាងមុនថែមទៀត។ប្រភពពីសមត្ថកិច្ចតូចតាចនៅក្នុងខេត្តមណ្ឌលគិរីបានឲ្យដឹងថាភាគច្រើននៃឈើដែលកាប់នៅក្នុងតំបន់ដែនជម្រកសត្វព្រៃភ្នំព្រេច គឺមេឈ្មួញ សឹង សំអុល ដឹកជញ្ជូនចេញទៅស្រុកវៀតណាមតាមច្រកត្រពាំងស្រែ-វ៉ាលឺ ស្រុកស្នួល ខេត្តក្រចេះ។ ការដែលមេឈ្មួញ សឹង សំអុល បន្តសកម្មភាពដឹកជញ្ជូនឈើចេញទៅស្រុកវៀតណាមយ៉ាងរលូនបានហើយគ្មានសមត្ថកិច្ចណាហ៊ានបង្ក្រាបគឺដោយសារឈ្មួញម្នាក់នេះមានខ្នងបង្អែករឹងមាំដែលជាមន្ត្រីជាន់ខ្ពស់ ស្និទ្ធមេដឹកនាំកំពូល។ ដូច្នេះហើយទោះបីមេឈ្មួញ សឹង សំអុល មានឈ្មោះក្នុងបញ្ជីខ្មៅរបស់សម្តេចនាយករដ្ឋមន្ត្រី ហ៊ុន សែន យ៉ាងណាក៏ដោយក៏ឈ្មួញម្នាក់នេះនៅតែអាចបង្កវិនាសកម្មព្រៃឈើក្នុងស្រុកកោះញែក ខេត្តមណ្ឌលគិរី ដដែល។រាល់ប្រតិកម្មអង្គភាពយើងរង់ចាំស្រាយរាល់ម៉ោងធើ្វការ៕
