ប្រជាសហគមន៍ការពារព្រៃឈើ នៅតាមបណ្ដាឃុំនានាក្នុងស្រុកសណ្ដាន់ ខេត្តកំពង់ធំ បានឲ្យដឹងថាបច្ចុប្បន្ន នេះបទល្មើសកាប់ ឈើនិងដឹកជញ្ជូនឈើខុសច្បាប់ ចេញពីព្រៃឡង់ក្នុងឃុំមានរិទ្ធ ឃុំដងកាំបិត ឃុំទំរីង និងឃុំសុចិត្រ នៅតែបន្តកើត មានយ៉ាង ពេញបន្ទុកព្រោះមាន ការឃុបឃិតបើកដៃពី សំណាក់មន្ត្រីបរិស្ថាន និងសមត្ថកិច្ចពាក់ព័ន្ធជា ច្រើនស្ថាប័នទៀត ។ ក្នុងនោះ លោក តុប កក្កដា ប្រធានមន្ទីរបរិស្ថាន ខេត្តកំពង់ធំ ត្រូវប្រជាពលរដ្ឋរិះ គន់ថាមិនយកចិត្តទុកដាក់បង្ក្រា បបទល្មើសព្រៃឈើតាមតួនាទីរបស់ខ្លួននោះទេ ហើយបែរជាប្រើអំណាចនិងតួនាទីដើម្បីប្រព្រឹត្តអំពើពុករលួយម៉ាសប្បាយ ។ ប្រការនេះហើយដែលធ្វើឲ្យព្រៃឈើក្នុងស្រុកសណ្ដាន់ និងស្រុកសន្ទុក កំពុងរងការបំផ្លាញយ៉ាងមហន្តរាយ ព្រោះមន្ត្រីជំនាញជាអ្នកឃុបឃិតឲ្យមានបទល្មើសដើម្បីជាថ្នូរនឹងផលប្រយោជន៍ផ្ទាល់ខ្លួន។
ប្រភពពីប្រជាពលរដ្ឋនៅស្រុកសណ្ដាន់ និងស្រុកសន្ទុក ខេត្តកំពង់ធំ បានឲ្យដឹងថា រហូតមកដល់ពេលនេះព្រៃឡង់និងព្រៃអង់តែនដែលស្ថិតក្រោមកិច្ចការពាររបស់មន្ទីរបរិស្ថានខេត្តកំពង់ធំ នៅតែប្រឈមនឹងការបំផ្លាញយ៉ាងពេញបន្ទុក។ មន្ត្រីរដ្ឋបាលព្រៃឈើប្រចាំតំបន់ព្រៃឡង់និងតំបន់ព្រៃអង់តែនត្រូវបានប្រជាពលរដ្ឋរិះគន់ថា ជាអ្នកឃុបឃិតឲ្យមានបទល្មើសកាប់ឈើនិងដឹកជញ្ជូនឈើខុសច្បាប់ដើម្បីជាថ្នូរនឹងផលប្រយោជន៍។ ទន្ទឹមនឹងនេះមន្ត្រីរាជការនៅក្នុងមន្ទីរបរិស្ថានខេត្តកំពង់ធំ មួយចំនួនបានបង្ហើបឲ្យដឹងថា ការដែលមន្ត្រីបរិស្ថានប្រចាំតំបន់ព្រៃឡង់និងព្រៃអង់តែន ហ៊ានឃុបឃិតបើកដៃឲ្យឈ្មួញនិងជនល្មើសកាប់ឈើដឹកជញ្ជូនឈើខុសច្បាប់ គឺមានការបើកដៃពីសំណាក់លោក តុប កក្កដា ដែលជាប្រធានមន្ទីរបរិស្ថានខេត្តកំពង់ធំផងដែរ។ ប្រសិនបើគ្មានការបើកដៃពីលោក តុប កក្កដា ទេនោះគឺមន្ត្រីថ្នាក់ក្រោមមិនហ៊ានធ្វើអ្វីៗតាមអំពើចិត្តឡើយ ហេតុនេះថ្នាក់ដឹកនាំក្រសួងបរិស្ថាន គួរពិនិត្យឡើងវិញជាបន្ទាន់។
បើតាមប្រភពពីសកម្មជនព្រៃឈើនិងមន្ត្រីអង្គការក្រៅរដ្ឋាភិបាលក្នុងខេត្តកំពង់ធំ បានឲ្យដឹងថា រហូតមកដល់ពេលនេះបទល្មើសកាប់ឈើនិងដឹកជញ្ជូនឈើចេញពីព្រៃឡង់ក្នុងស្រុកសណ្ដាន់ ខេត្តកំពង់ធំ នៅតែបន្តកើតមានយ៉ាងអនាធិបតេយ្យដោយសារមានការឃុបឃិតបើកដៃពីសំណាក់មន្ត្រីបរិស្ថាន ហើយព្រៃអង់តែនក្នុងស្រុកសន្ទុក ខេត្តកំពង់ធំ ក៏កំពុងប្រឈមនឹងការបំផ្លាញយ៉ាងមហន្តរាយដែរ។ លោក តុប កក្កដា ប្រធានមន្ទីរបរិស្ថានខេត្តកំពង់ធំ និងមន្ត្រីក្រោមឱវាទមិនចាត់វិធានការបង្ក្រាបបទល្មើសកាប់ឈើនិងដឹកជញ្ជូនឈើចេញពីព្រៃដែលស្ថិតក្រោមការទទួលខុសត្រូវរបស់មន្ទីរបរិស្ថានខេត្តកំពង់ធំ នោះទេ។ ហេតុនេះហើយទើបមានសេចក្ដីអំពាវនាវឲ្យលោក សាយ សំអាល់ រដ្ឋមន្ត្រីក្រសួងបរិស្ថាន ចាត់វិធានការទៅលើអំពើពុករលួយនិងភាពអសកម្មរបស់មន្ត្រីបរិស្ថានក្នុងខេត្តកំពង់ធំជាបន្ទាន់ ព្រោះពួកគេមិនយកចិត្តទុកដាក់បំពេញការងារតាមតួនាទីឡើយ។
រឿងដែលគួរឲ្យកត់សម្គាល់នោះ គឺក្រុមឈ្មួញដែលរកស៊ីដឹកជញ្ជូនឈើនៅស្រុកសណ្ដាន់ ខេត្តកំពង់ធំ បានឲ្យដឹងថា លោក តុប កក្កដា ប្រធានមន្ទីរបរិស្ថានខេត្តកំពង់ធំ បានចាប់ឃាត់រថយន្តដឹកឈើខុសច្បាប់១គ្រឿងទុករយៈពេល៣ថ្ងៃក៏ដោះលែងវិញដើម្បីជាថ្នូរនឹងលុយ២០០០ដុល្លារ?។ ប្រភពបានឲ្យដឹងទៀតថា រថយន្តដឹកឈើដែលមន្ត្រីបរិស្ថានដោះលែងទៅវិញស្រួលៗនោះ គឺជារបស់យាយយ៉ុន ជាមេឈ្មួញដុះស្លែម្នាក់នៅស្រុកសណ្ដាន់ ខេត្តកំពង់ធំ ហើយឈ្មួញម្នាក់នេះប្រកបអាជីវកម្មដឹកជញ្ជូនឈើខុសច្បាប់ជាយូរមកហើយ។ ការដែលលោក តុប កក្កដា ដោះលែងរថយន្តដឹកឈើរបស់ឈ្មួញឈ្មោះ យាយយ៉ុន ដើម្បីជាថ្នូរនឹងលុយ២០០០ដុល្លារ គឺជាអំពើពុករលួយយ៉ាងច្បាស់ក្រឡែត ហេតុនេះលោក សុខ លូ អភិបាលខេត្តកំពង់ធំ និងលោក សាយ សំអាល់ រដ្ឋមន្ត្រីក្រសួងបរិស្ថាន មិនគួរមើលរំលងតទៅទៀតនោះទេ។បឋម
