មន្ត្រីនៅច្រកទ្វារអន្តរជាតិអូរយ៉ាដាវ បានឲ្យដឹងថា ឈើដែលឈ្មួញដឹក ជញ្ជូនចេញទៅស្រុកយួន ប្រមាណជាង១០ រថយន្តយីឌុបធំៗ ហៅថាខ្នាតយក្សកាលពីយប់ថ្ងៃទី២៦ ខែវិច្ឆិកា ឆ្នាំ២០១៧ គឺជារបស់ឈ្មួញ ៣ទៅ៤នាក់ដែលមានការ ឃុបឃិតជាប្រព័ន្ធ ជាមន្រ្តីគ្រប់លំដាប់ថ្នាក់ក្នុង ខេត្តនេះតែម្តង។ ទាក់ទង នឹងបញ្ហានេះប្រភពខ្លះបានរិះគន់ ថា លោក ថង សាវុន អភិ បាល ខេត្តរតនគិរី និងលោក កែប កត់ មេរដ្ឋបាលព្រៃឈើខេត្តរតនគិរី មិនយកចិត្តទុកដាក់បង្ក្រាបសកម្មភាពដឹកជញ្ជូនឈើទៅស្រុកយួនតាមច្រកទ្វារអន្តរជាតិអូរយ៉ាដាវនោះទេ។ ដូច្នេះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ ក៏ដូចជាប្រធានគណៈកម្មការបង្ក្រាបនិងទប់ស្កាត់បទល្មើសព្រៃឈើ ពិនិត្យឡើងវិញចំពោះសកម្មភាពដឹកជញ្ជូនឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ ដែលកំពុងតែកើតឡើងយ៉ាងគគ្រឹកគគ្រេងសំដៅទៅតាមច្រកទ្វារ អន្ត រជាតិអូរយ៉ាដាវតែម្តង។
ប្រភពពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងស្រុកអូរយ៉ាដាវ ខេត្តរតនគិរី បានឲ្យដឹងថា កាលពីយប់ថ្ងៃទី២៦ ខែវិច្ឆិកា ឆ្នាំ២០១៧ ឈ្មួញបានប្រើប្រាស់រថយន្តយីឌុបធំៗវែងៗប្រមាណ១០គ្រឿងដឹកជញ្ជូនឈើចេញទៅស្រុកយួនដោយគ្មានញញើតអ្វីទាំងអស់។ ប្រភពបានឲ្យដឹងទៀតថា ក្នុងរថយន្តយីឌុប១គ្រឿងអាចផ្ទុកឈើពី៤៥ទៅដល់៦០ម៉ែត្រគូបដោយសារតែមានការសម្របសម្រួលពីសមត្ថកិច្ចលើផ្លូវជាតិលេខ៨ និងសមត្ថកិច្ចនៅច្រកទ្វារអន្តរជាតិអូរយ៉ាដាវ។ ឈ្មួញខ្លះបានប្រើអាជ្ញាប័ណ្ណរបស់ក្រុមហ៊ុនមួយចំនួនដើម្បីអាចដឹកជញ្ជូនឈើចេញទៅស្រុកយួនបានរលូន ហើយក៏មានការបែងចែកផលប្រយោជន៍ដល់មន្ត្រីជំនាញនិងសមត្ថកិច្ចពាក់ព័ន្ធផងដែរ។
សូមបញ្ជាក់ថាកន្លងមកឈ្មួញដឹកឈើតាមរថយន្តសាំយ៉ុង រថយន្តឡិចស៊ីស ហាយឡេនឌ័រ និងរថយន្តតូចៗជាច្រើនប្រភេទទៀតដឹកឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ និងច្រករបៀងក្បែរៗនោះយ៉ាងរលូន ជាពិសេសនៅពេលយប់។ ក៏ប៉ុន្តែកាលពីយប់ថ្ងៃទី២៦ ខែវិច្ឆិកា ឆ្នាំ២០១៧ ឈ្មួញបានប្រើប្រាស់រថយន្តយីឌុបៗធំៗវែងៗដឹកឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ ប្រមាណជាង១០គ្រឿង ក្នុងនោះ៨គ្រឿងបានឆ្លងដែនចូលទៅក្នុងទឹកដីយួនប្រកបដោយសុវត្ថិភាព។ ប្រការនេះបង្ហាញឲ្យឃើញថាបទបញ្ជារបស់លោកនាយករដ្ឋមន្ត្រី ហ៊ុន សែន ក្នុងការទប់ស្កាត់បទល្មើសរត់ពន្ធឈើទៅស្រុកយួនកំពុងក្លាយទៅជារឿងឥតន័យ? ព្រោះឈ្មួញជាច្រើននាក់នៅតែអាចដឹកជញ្ជូនឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវ និងច្រករបៀងក្បែរៗនោះកាន់តែច្រើនជាងមុនទៅទៀត។ ចំណែកមន្ត្រីធំៗមួយចំនួននៅក្នុងខេត្តរតនគិរី ក៏ដូចជាលោក កែប កត់ នាយខណ្ឌរដ្ឋបាលព្រៃឈើខេត្តរតនគិរី ត្រូវគេរិះគន់ថាជាមេខ្លោងនៅពីក្រោយបទល្មើសដឹកជញ្ជូនឈើទៅស្រុកយួនដើម្បីជាថ្នូរនឹងផលប្រយោជន៍ផ្ទាល់ខ្លួនតែម្តង ។បឋម
