សេចក្ដីរាយការណ៍ពីមន្ត្រីរាជការ និងប្រជាពលរដ្ឋក្នុងខេត្តរតនគិរី បានឲ្យដឹងទៀតថា កុងត្រូលជជុះ ជាច្រើនកន្លែងនៅ លើផ្លូវជាតិ លេខ៧៨ គឺបង្កើតឡើងសម្រាប់ ប្រមូលលុយពីក្រុមឈ្មួញដឹកជញ្ជូន ឈើចេញទៅស្រុកយួនតាមច្រក ទ្វារអន្តរជាតិអូរយ៉ាដាវ និងច្រករបៀងក្បែរៗនោះ ។ ក្នុងចំណោមសមត្ថកិច្ចបង្កើតកុងត្រូល ជជុះលើផ្លូវជាតិលេខ៨មានដូចជា រដ្ឋបាលព្រៃ ឈើ នគរបាលប្រឆាំងបទល្មើសសេដ្ឋកិច្ចខេត្ត នគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ សមត្ថកិច្ចអាវុធហត្ថ គយចល័ត និងមន្ត្រីបរិស្ថានជាដើម។ ក៏ប៉ុន្តែសមត្ថកិច្ចទាំងនោះមិនបង្ក្រាបបទល្មើសសេដ្ឋកិច្ចដូចជា ករណីឈ្មួញដឹកឈើចេញទៅស្រុកយួន ឬឈ្មួញនាំចូលទំនិញគេចពន្ធ ទំនិញខុសច្បាប់ពីស្រុកយួនតាមតួនាទីរបស់ខ្លួននោះទេ។ ផ្ទុយទៅវិញពួកគេកំពុងសប្បាយប្រមូលលុយពីបទល្មើសសេដ្ឋកិច្ច ហើយសូម្បីតែកសិករដឹកជញ្ជូនកសិផលដូចជា ដំឡូងមី ពោត សណ្ដែក ល្ង ចេញទៅស្រុកយួន ក៏សមត្ថកិច្ចតាមកុងត្រូលជជុះទាំងនោះគាបយកលុយតាមរបៀបពុករលួយដែរ។
ប្រភពពីមន្ត្រីរាជការនិងមន្ត្រីអាជ្ញាធរក្នុងស្រុកបរកែវ និងស្រុកអូរយ៉ាដាវ ខេត្តរតនគិរី បានឲ្យដឹងថានៅលើផ្លូវជាតិលេខ៧៨ពីក្រុងបានលុង ដល់ច្រកទ្វារអន្តរជាតិអូរយ៉ាដាវ មានប៉ុស្ដិ៍ត្រួតពិនិត្យរបស់សមត្ថកិច្ចរាប់សិបកន្លែងដែលហៅថាកុងត្រូលជជុះ។ ក៏ប៉ុន្តែសមត្ថកិច្ចតាមប៉ុស្ដិ៍ជជុះទាំងនោះមិនចាត់វិធានការបង្ក្រាបក្រុមឈ្មួញដែលដឹកជញ្ជូនឈើចេញទៅស្រុកយួនតាមច្រកទ្វារអន្តរជាតិអូរយ៉ាដាវនោះទេ ហើយពួកគេគឺជាអ្នកសម្របសម្រួលឲ្យឈ្មួញដឹកជញ្ជូនឈើចេញទៅស្រុកយួនដើម្បីជាថ្នូរនឹងផលប្រយោជន៍ផ្ទាល់ខ្លួនទៅវិញ។ បញ្ហានេះជារឿងដែលថ្នាក់ដឹកនាំក្រសួងមហាផ្ទៃ និងស្ថាប័នពាក់ព័ន្ធដទៃទៀតគួរពិនិត្យឡើងវិញផងដែរ ព្រោះសមត្ថកិច្ចតាមកុងត្រូលជជុះរាប់សិបកន្លែងលើផ្លូវជាតិលេខ៧៨មិនបង្ក្រាបបទល្មើសដឹកជញ្ជូនឈើខុសច្បាប់ ឬបទល្មើសសេដ្ឋកិច្ចផ្សេងៗទៀតនោះឡើយ។
ចំណែកអាជីវករដែលដឹកទំនិញពីស្រុកយួន ចូលស្រុកខ្មែរ តាមច្រកទ្វារអន្តរជាតិអូរយ៉ាដាវ បានឲ្យដឹងថាមុខរបររបស់ពួកគាត់សព្វថ្ងៃនេះស្ទើរតែគ្មានសល់ផលចំណេញសម្រាប់ដោះស្រាយជីវភាពប្រចាំថ្ងៃដូចកាលពីមុនទៀតទេ ព្រោះសមត្ថកិច្ចនៅលើផ្លូវជាតិលេខ៧៨គាបយកលុយតាមអំពើចិត្ត។ សូម្បីតែប្រជាកសិករក្នុងស្រុកបរកែវ ឬស្រុកផ្សេងៗទៀត ដែលដឹកកសិផលឆ្លងកាត់ផ្លូវជាតិលេខ៧៨ចេញទៅស្រុកយួនតាមច្រកទ្វារអន្តរជាតិអូរយ៉ាដាវ ក៏ត្រូវសមត្ថកិច្ចតាមបណ្ដាក្រុងត្រូលជជុះរាប់សិបកន្លែងលើផ្លូវជាតិលេខ៧៨គាបយកលុយដោយគ្មានការយោគយល់ទាល់តែសោះ។ ប្រការនេះលោក ថង សាវុន អភិបាលខេត្តរតនគិរី បែរជារក្សាភាពស្ងៀមស្ងាត់បណ្ដោយឲ្យកុងត្រូលជជុះកើតឡើងយ៉ាងរាលដាលលើផ្លូវជាតិលេខ៧៨ ពីក្រុងបានលុង រហូតដល់ច្រកទ្វារអន្តរជាតិអូរយ៉ាដាវ ដែលផ្ទុយទាំងស្រុងពីបទបញ្ជារបស់លោកនាយករដ្ឋមន្ត្រី ហ៊ុន សែន។បឋម
