ភ្នំពេញ: គណបក្សសង្គ្រោះជាតិ បានប្រកាសថា លោក សុរិយា ប្រាសាទ ស៊ូប៊ែឌី តំណាងពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្ស ប្រចាំកម្ពុជា នឹងអមដំណើរលោកសមរង្ស៊ី ប្រធានគណបក្សសង្គ្រោះជាតិ និងលោក កឹមសុខា អនុប្រធានគណបក្សសង្គ្រោះជាតិ ចូលទៅកាន់អយ្យការអមសាលាដំបូង រាជធានីភ្នំពេញ នៅថ្ងៃទី១៤ ខែមករា ឆ្នាំ២០១៤ វេលាម៉ោង ១០ ព្រឹក តាមដីកាកោះរបស់តំណាងអយ្យការ អមសាលាដំបូងរាជធានីភ្នំពេញ។
សេចក្តីប្រកាសរបស់គណបក្សសង្គ្រោះជាតិ ចេញផ្សាយនៅព្រឹកថ្ងៃទី៩ ខែមករា ឆ្នាំ២០១៤ បានធ្វើឡើង បន្ទាប់ពីមានសេចក្តីប្រកាសពីដំណើរទស្សនកិច្ចរបស់លោកស៊ូប៊ែឌី មកកាន់កម្ពុជា ចាប់ពីថ្ងៃទី១២ ដល់ថ្ងៃទី១៧ ខែមករា ឆ្នាំ២០១៤។
លោកសមរង្ស៊ី និងលោកកឹមសុខា ត្រូវបានព្រះរាជអាជ្ញារង តុលាការសាលាដំបូង រាជធានីភ្នំពេញ ចេញដីកាដាច់ដោយឡែកពីគ្នា កោះហៅ កាលពីថ្ងៃទី៣ ខែមករា ឆ្នាំ២០១៤ ដើម្បីឲ្យចូលឆ្លើយបំភ្លឺ នៅព្រឹកថ្ងៃទី១៤ ខែមករា ឆ្នាំ២០១៤ ជុំវិញបទចោទប្រកាន់ពីបទ ស្តីពី ការញុះញង់ឲ្យប្រព្រឹត្តបទឧក្រិដ្ឋ ឬប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
ការចោទប្រកាន់ លើមេដឹកនាំគណបក្សប្រឆាំងនោះ បានកើតឡើង ក្រោយពីលោកសមរង្ស៊ី និងលោកកឹមសុខា បានដឹកនាំធ្វើបាតុកម្មតវ៉ា ប្រឆាំងនឹងលទ្ធផលបោះឆ្នោត ហើយរាលដាលដល់ការតវ៉ាទាមទារតម្លើងប្រាក់ខែកម្មកររោងចក្រកាត់ដេរ នាំឲ្យមានការប៉ះទង្គិចដោយហិង្សា កាលពីថ្ងៃទី២ និងថ្ងៃទី៣មករា ដែលនាំឲ្យកម្មករយ៉ាងហោចណាស់ ៤ ទៅ ៥ នាក់ បានស្លាប់ របួសជាង ៤០ នាក់ និងចាប់ខ្លួនបាតុករ សរុប ២៣ នាក់៕
