ប្រភពពីប្រជាពលរដ្ឋនៅ ក្នុងស្រុកកំពង់ត្របែក ខេត្តព្រៃវែង បានឲ្យដឹងថា មួយរយៈចុងក្រោយនេះ ពួកគាត់បាន ឃើញ ក្រុមហ៊ុនអង្គរសុខសារិទ្ធមានជ័យ របស់ឧកញ៉ា ជឹម សុខ បង្កើនសកម្មភាព ដឹកជញ្ជូនគោក្របីចេញ ទៅស្រុកយួន រាប់ម៉ឺនក្បាលក្នុងមួយខែៗ ហើយមិនឃើញក្រសួងនិងស្ថាប័នពាក់ព័ន្ធ ចាត់វិធានការទប់ស្កាត់នោះទេ ។ បើតាមមន្ត្រីពាក់ព័ន្ធក្នុងខេត្តព្រៃវែង បានឲ្យដឹងថា មេឈ្មួញ ជឹម សុខ សម្រុកដឹកជញ្ជូនគោប្របីចេញទៅស្រុកយួនតាមច្រកតំបន់ស្វាយអាង៉ោង ស្រុកកំពង់ត្របែក ខេត្តព្រៃវែង ជាប្រចាំ។ ប្រភពបានឲ្យដឹងទៀតថាក្រុមហ៊ុនអង្គរសុខសារិទ្ធមានជ័យ របស់មេឈ្មួញ ជឹម សុខ មានច្បាប់ត្រឹមត្រូវក្នុងការនាំចេញគោក្របីទៅស្រុកយួន ក៏ប៉ុន្តែចំណុចដ៏គួរឲ្យកត់សម្គាល់នោះ គឺមេឈ្មួញ ជឹម សុខ នាំចេញគោក្របីលើសចំនួនកំណត់។
ទង្វើមិនប្រក្រតីរបស់ឧកញ៉ា ជឹម សុខ ម្ចាស់ក្រុមហ៊ុនអង្គរសុខសារិទ្ធមានជ័យ ក្នុងការនាំចេញគោក្របីទៅស្រុកយួនតាមច្រកព្រំដែនក្នុងខេត្តព្រៃវែង ត្រូវបានបើកកកាយជាបន្តបន្ទាប់ ក៏ប៉ុន្តែរហូតមកដល់ពេលនេះលោក វេង សាខុន រដ្ឋមន្ត្រីក្រសួងកសិកម្ម នៅតែបណ្ដោយឲ្យឧកញ៉ា ជឹម សុខ ធ្វើអ្វីៗតាមអំពើចិត្ត។ ប្រភពដែលស្និទ្ធនឹងមេឈ្មួញ ជឹម សុខ បានឲ្យដឹងថា ក្រុមហ៊ុនអង្គរសុខសារិទ្ធមានជ័យ មាន៤ភាគហ៊ុនធំៗ ហើយក្នុងនោះឧកញ៉ា ជឹម សុខ កាន់កាប់ភាគហ៊ុនប្រមាណ៤០ភាគរយ គឺមានអំណាចធំធេងជាងគេ។ ដូច្នេះហើយទើបមេឈ្មួញ ជឹម សុខ ហ៊ានបំពានលើលិខិតអនុញ្ញាតរបស់ក្រសួងពាក់ព័ន្ធតាមរយៈការនាំចេញគោក្របីទៅស្រុកយួនលើសចំនួនកំណត់ដល់ទៅរាប់ម៉ឺនក្បាលក្នុងមួយខែៗ។
ប្រភពពីសមត្ថកិច្ចតូចតាចនៅច្រកតំបន់ស្វាយអាង៉ោង ស្រុកកំពង់ត្របែក ខេត្តព្រៃវែង បានឲ្យដឹងថា នៅក្នុងច្បាប់កំណត់តម្រូវឲ្យក្រុមហ៊ុនអង្គរសុខសារិទ្ធមានជ័យ នាំចេញគោក្របីត្រឹម១០០០ក្បាលប៉ុណ្ណោះក្នុងមួយខែ ហើយបែរជាគេនាំចេញគោក្របីក្នុងមួយខែៗរាប់ម៉ឺនក្បាល។ ជាងនេះទៅទៀតនៅពេលប្រជាពលរដ្ឋណាចង់នាំគោក្របី១ក្បាលឬ២ក្បាលទៅលក់ឲ្យឈ្មួញយួនដល់ច្រកព្រំដែន គឺត្រូវបង់ក្បាលកាក់ឲ្យមេឈ្មួញ ជឹម សុខ ក្នុង១ក្បាល៤ម៉ឺនរៀលសម្រាប់គោក្របីតូចៗ ចំណែកគោក្របីធំៗត្រូវបង់ក្នុង១ក្បាល៦ម៉ឺនរៀល។ មានន័យថាមេឈ្មួញ ជឹម សុខ កំពុងប្រើអំណាចគាបយកលុយធ្វើបាបប្រជាពលរដ្ឋយ៉ាងកំរោល ដូច្នេះថ្នាក់ដឹកនាំក្រសួងនិងស្ថាប័នពាក់ព័ន្ធមិនគួរទុកឲ្យមេឈ្មួញ ជឹម សុខ ធ្វើបាបប្រជាពលរដ្ឋតាមអំពើចិត្តទៀតទេ។
ប្រភពពីមន្ត្រីក្នុងក្រសួងកសិកម្ម មួយចំនួនបានបង្ហើបឲ្យដឹងថា ទោះបីមានការផ្លាស់ប្ដូរររដ្ឋមន្ត្រីក្រសួងកសិកម្មជាច្រើននាក់មកហើយក៏ដោយ ក៏ក្រុមហ៊ុនអង្គរសុខសារិទ្ធមានជ័យ របស់ឧកញ៉ា ជឹម សុខ នៅតែអាចធ្វើអ្វីៗតាមអំពើចិត្ត។ ក្នុងនោះករណីក្រុមហ៊ុនអង្គរសុខសារិទ្ធមានជ័យ នាំចេញគោក្របីទៅស្រុកយួនលើសចំនួនកំណត់បានធ្វើឲ្យរដ្ឋត្រូវខាតបង់ចំណូលពន្ធយ៉ាងច្រើន ហើយករណីឧកញ៉ា ជឹម សុខ ជំរិតយកលុយពីប្រជាពលរដ្ឋដែលនាំគោក្របី១ក្បាលឬ២ក្បាលទៅលក់ឲ្យឈ្មួញយួន គឺជាការគាបសង្កត់ធ្វើបាបប្រជាពលរដ្ឋយ៉ាងកំរោលបំផុត។ ប្រភពខ្លះបានឲ្យដឹងថា ការដែលឧកញ៉ា ជឹម សុខ ម្ចាស់ក្រុមហ៊ុនអង្គរសុខសារិទ្ធមានជ័យ ហ៊ានធ្វើអ្វីៗតាមអំពើចិត្ត គឺដោយសារអាងមានខ្នងបង្អែកយ៉ាងរឹងមាំនៅក្នុងក្រសួងកសិកម្ម ដែលឃុបឃិតទទួលផលប្រយោជន៍ពីមេឈ្មួញរូបនេះយ៉ាងសុខស្រួល។ ដូច្នេះប្រសិនបើលោក វេង សាខុន រដ្ឋមន្ត្រីក្រសួងកសិកម្ម មិនឃុបឃិតទទួលផលប្រយោជន៍ពីឧកញ៉ា ជឹម សុខ ម្ចាស់ក្រុមហ៊ុនអង្គរសុខសារិទ្ធមានជ័យ ទេនោះគឺត្រូវចាត់វិធានការទប់ស្កាត់ជាបន្ទាន់។បឋម
